Tok Bilong God i Gat Laip

Jisas i Dai na Dispela i Mekim Wanem Long Yumi?

JISAS i dai pinis na bihain Kliopas wantaim wanpela poroman bilong em tupela i wokabaut long rot na tupela i sanap “na bel hevi.” (Luk 24:17) Dai em i olsem wanpela birua, olsem na i save mekim yumi i bel hevi. Tasol dispela tupela man i ken amamas long Jisas i dai, na yumi tu yumi ken amamas long dispela samting. Bilong wanem yumi ken amamas? Yu laik save?

Baibel i tok: “Krais i bin i dai bilong tekewe olgeta sin bilong yumi.” “Em i dai bilong helpim … yumi stap laip.” (1 Korin 15:3; 1 Tesalonaika 5:10) Yes, God i salim Jisas i kam long graun bilong helpim yumi. Em yet i tok: “Pikinini Bilong Man … i kam … bilong givim laip bilong em bilong baim bek planti manmeri.” (Matyu 20:28) Tasol dispela samting Jisas i mekim i helpim yumi olsem wanem?

Long nau, taim ol man nogut i stilim wanpela man, ol save kalabusim em na tokim ol pren bilong em ol i mas baim bek em, nogut ol i kilim em i dai. Olsem na pe bilong baim bek man i save helpim man bambai em i ken lusim kalabus na em i no ken i dai. Orait, Jisas i kamap man long graun na givim nambawan gutpela laip bilong em olsem pe bilong baim bek ol manmeri, em ol i kalabus long pekato na i dai. (1 Pita 1:18, 19; Efesas 1:7) Olsem wanem ol i kalabus na em i mas baim bek ol?

Long wanem, Adam, em i tumbuna papa bilong yumi olgeta manmeri, em i bikhet long God. (Jenesis 2:17; 3:11, 12) Em i sakim lo bilong God na em i kamap sinman, long wanem “sin em i pasin bilong sakim lo.” (1 Jon 3:4; 5:17) Adam i no inap long kisim gutpela presen God i laik givim long em, em laip i stap oltaim. (Rom 6:23) Em i no inap i stap oltaim long gutpela ples paradais long graun, na olgeta pikinini bilong em tu i lus long kisim dispela gutpela samting. Tasol ating yu laik save, ‘Bilong wanem olgeta pikinini bilong em i mas i dai? Ol i no mekim rong. Adam i mekim rong.’

As bilong dispela samting i olsem Adam i kamap sinman na taim em i kamapim pikinini dispela sin na i dai tu i kisim yumi olgeta pikinini bilong em. (Jop 14:4; Rom 5:12) Yumi olgeta yumi kisim sin long Adam na yumi dai. Orait, olsem wanem ofa bilong Jisas inap helpim yumi long lusim kalabus bilong sin na i dai?

God i bihainim wanpela lo _.em i bin givim long ol Isrel, olsem: ‘laip i pe o bekim bilong laip.’ (Eksodas 21:23) Adam i gutpela man olgeta, tasol em i sakim tok na gutpela laip bilong em long paradais i lus. Olgeta pikinini bilong em tu ol i lus long dispela samting. Krais Jisas em i gutpela man olgeta na em i givim gutpela laip bilong em bilong baim bek olgeta samting Adam i lusim. Jisas i lusim laip bilong em yet [olsem pe i stret tru] bilong baim bek olgeta man.”—1 Timoti 2:5, 6.

Dispela samting Jisas i mekim i helpim tru yumi! Em i dai bambai yumi inap kisim laip i stap oltaim aninit long kingdom bilong God. Bai yu mekim wok bilong God na Krais na bai ol i ken save yu tenkyu long ol?—2 Korin 5:14, 15.

[Ol Piksa long pes 10]

Mani bilong baim bek man i helpim yumi olsem wanem long save long ofa Jisas i mekim bilong baim bek yumi?

[Ol Piksa long pes 11]

Pasin bikhet bilong Adam i mekim wanem long em yet na long yumi olgeta manmeri?

Jisas em i gutpela olgeta olsem Adam long pastaim na dispela samting i mekim wanem long yumi?