Baibel i Tok Wanem?
Tru Jisas Em Pikinini Bilong God?
APOSEL Pita i tokim Jisas: “Yu dispela man God i bin makim bilong kisim bek ol manmeri bilong en. Yu Pikinini Bilong God i gat laip.” (Matyu 16:16) Dispela em wanpela bilong planti ves long Baibel i tok long Jisas olsem Pikinini Bilong God, na em wanpela tok i bin kamapim kain kain tingting namel long ol man bilong lotu.
Planti man em ol i bilip olsem Jisas Krais em i God, ol i hatwok long kamapim as na Baibel i kolim em Pikinini Bilong God. Em i no inap i stap tupela man wantaim, a? Na sampela i tingim Jisas olsem wanpela bikman i bin i stap long bipo, o wanpela saveman, o wanpela trupela profet bilong God, na em tasol. Orait Baibel i tok wanem? Samting yumi bilip long en i bikpela samting o nogat?
Namba Wan Pikinini Bilong God
Baibel i tok i gat wanpela taim bipo na God wanpela tasol i stap. Em i gat pasin laikim na dispela i kirapim em long givim laip, olsem presen, long ol narapela, na kamap olsem papa bilong ol. Bilong mekim olsem, Jehova i mekim wok long bikpela strong bilong em na i wokim wanpela spirit i gat laip na tingting—em i “as [“namba wan,” NW ] bilong olgeta samting God i bin wokim,” em yumi kolim Jisas Krais. (KTH 3:14; Sindaun 8:22) Taim God wanpela tasol i stap, em wanpela yet i wokim Jisas, olsem na i stret Baibel i kolim Jisas dispela “wanpela Pikinini tasol” na “namba wan pikinini bilong God.”—Jon 1:14; Kolosi 1:15.
Jisas i namba wan samting God i bin wokim, olsem na Jisas i no dispela Man Bilong Wokim olgeta samting em “wanpela tasol em i God tru,” nogat. (1 Timoti 1:17) Tasol God i bin givim planti gutpela wok tru long dispela Pikinini bilong em. Olsem: Long han bilong Jisas, God i bin wokim “olgeta samting,” na ol ensel tu. Baibel i kolim ol dispela ensel “ol pikinini man bilong God”—Jehova i Man Bilong Givim Laip long ol tu.—Kolosi 1:16; Stat 6:2, sta.
Taim God i redim pinis graun bambai em i ken putim man long en, em i tokim namba wan Pikinini bilong em: “Nau yumi wokim ol manmeri bai ol i kamap olsem yumi yet.” (Stat 1:26; Sindaun 8:22-31) Orait nau Jehova i wokim namba wan pikinini bilong em long graun, em Adam, long rot bilong dispela spirit em bihain em i kisim nem Jisas.—Luk 3:38.
Jisas i Kamap Pikinini Bilong God Long Graun
Aposel Jon i tok olsem long taim God i makim, Pikinini spirit bilong God i “kamap man, na em i kam i stap namel long mipela.” (Jon 1:14) Bilong mekim olsem, God i wokim mirakel na kisim laip bilong Jisas long heven na putim long bel bilong wanpela meri Juda i no bin slip wantaim man, nem bilong em Maria. Long dispela rot Jisas i stap yet olsem Pikinini Bilong God, maski em i gat bodi bilong graun. God yet—na i no wanpela man bilong graun—i bin givim laip long Jisas, olsem na taim Jisas i kamap nupela pikinini long graun, em i gutpela man olgeta, em i no gat sin. Ensel Gebriel i tokim Maria: “Dispela pikinini bihain bai yu karim, em bai i stap gutpela na stretpela man bilong God, na ol bai i kolim em Pikinini Bilong God.”—Luk 1:35; Hibru 7:26.
Jisas i Pikinini Bilong God hia long graun, na Papa bilong em yet i bin kamapim klia dispela samting. Taim Jisas i kisim baptais, heven i op na Jon Bilong Baptais i harim wanpela maus i singaut olsem: “Dispela em i Pikinini bilong mi. Mi laikim em tumas. Bel bilong mi em i amamas long em.” (Matyu 3:16, 17) Olsem na i gat as na Jon i tokim ol disaipel bilong em: “Mi yet mi lukim na mi autim tok pinis olsem, dispela em i Pikinini Bilong God.”—Jon 1:34.
Taim Jisas i stap long graun na mekim wok autim tok, em i no tokim olgeta man olsem em i Mesaia na Pikinini Bilong God, nogat. (Mak 8:29, 30) Em i save larim ol yet i kisim dispela tingting long rot bilong harim ol tok em i skulim ol man long en, na lukim wokabaut bilong em, na ol mirakel tu, planti bilong ol dispela mirakel em i wokim long ai bilong ol man. Olsem: Em i oraitim “olgeta man ol kain kain sik i bagarapim ol na ol i karim pen nogut.” (Matyu 4:24, 25; 7:28, 29; 12:15) Ol aipas, ol yaupas, ol lek nogut, na ol sikman, olgeta i kam long Jisas, na em i mekim ol i kamap orait. Na tu, em i kirapim bek ol man i dai pinis! (Matyu 11:4-6) Long ai bilong ol disaipel bilong em, Jisas i wokim mirakel na wokabaut antap long wara na mekim i dai traipela win na bikpela si. Dispela bikpela strong ol i lukim em i kirapim ol disaipel long tok: “Tru tumas, yu Pikinini Bilong God.”—Matyu 14:24-33.
Pikinini Bilong God i Ken Helpim Yu
Bilong wanem God i salim dispela wanpela Pikinini bilong em i lusim heven na i kam long graun bilong kisim bikpela pen na i dai? “Em i mekim olsem bilong olgeta manmeri i bilip long em ol i no ken lus. . . . Bai ol i kisim laip i stap gut oltaim oltaim.” (Jon 3:16) Yes, bilong “givim laip bilong em bilong baim bek planti manmeri,” Jisas i mas i dai—i no gat narapela rot. (Matyu 20:28) Tru tumas, kirap long bipo yet i kam inap nau, i no gat wanpela man i bin laikim tru ol manmeri olsem Jehova na namba wan Pikinini bilong em i bin mekim.—Rom 8:32.
Bihain long Jisas i dai, God i tokaut olsem Jisas i Pikinini bilong em long wanpela rot i narapela kain—God i “kirapim em long matmat” na givim laip gen long em olsem Pikinini spirit bilong Em. (Rom 1:4; 1 Pita 3:18) Jisas i wet i stap long han sut bilong Papa inap olsem 1,900 yia, na bihain em i kamap King bilong Kingdom Bilong God—em wanpela gavman long heven em klostu nau bai kirap bosim graun olgeta.—Song 2:7, 8; Daniel 7:13, 14.
Olsem wanem? Yu laik bai dispela Pikinini Bilong God i gat bikpela strong i ken amamas long yu? Sapos olsem, mipela i laik kirapim yu long kisim save long ol tok bilong em na bihainim long wokabaut bilong yu. Jisas yet i bin tok: “Laip bilong i stap gut oltaim, em i olsem. Ol man i kisim dispela laip, ol i save long yu, yu wanpela tasol yu God tru. Na ol i save long Jisas Krais, em yu bin salim i kam.” (Jon 17:3) Yes, bilip bilong yumi long Pikinini Bilong God em i husat, dispela em i bikpela samting!—Jon 3:18; 14:6; 1 Timoti 6:19.
YU LAIK SAVE?
◼ Olsem wanem na Jisas em dispela wanpela Pikinini tasol bilong God?—Jon 1:3, 14; KTH 3:14.
◼ Bilong wanem yu ken bilip olsem Jisas i Pikinini Bilong God?—Matyu 3:16, 17.
◼ Sapos yu bilip olsem Jisas i Pikinini Bilong God, dispela inap helpim yu olsem wanem?—Jon 3:16; Jon 14:6; 17:3.
[Ol Piksa long pes 28, 29]
Ol tok bilong Jisas i gat savetingting long en na ol strongpela mirakel em i bin wokim i soim klia olsem em i no wanpela man nating