Nius i Kam Long Olgeta Hap
◼ Wanpela ripot bilong wanpela lain (Institute of Actuaries) i tok: “Taim man i gat 30 krismas na em i kirap smok, dispela inap rausim 5 na hap yia long laip bilong em na 6 na hap yia long laip bilong meri.” Tasol taim man i gat 30 krismas na em i lusim smok, dispela bai helpim em long abrusim planti sik i kamap long rot bilong smok we inap kilim man.—THE TIMES, INGLAN.
◼ “Long nau inap 10 milion yangpela manmeri i gat binatang HIV. Long olgeta hap, inap 4.9 milion manmeri i save kisim dispela binatang long olgeta yia, na winim 2 milion bilong ol i namel long 15 na 24 krismas.”—UNITED NATIONS POPULATION FUND.
◼ Ol ripot i kamapim olsem wanpela yangpela husat i lukim man i yusim gan long bagarapim narapela, planti taim kain yangpela olsem bai mekim wankain pasin olsem insait long tupela yia.—NIUS SCIENCE, AMERIKA.
◼ Long São Paulo, Brasil, insait long wanpela yia ol i skelim ol meri long painim sik kensa bilong susu, na ol i kisim save olsem 16.8 pesen bilong ol i gat krismas i aninit long 35. I gat 90 pesen sans long pinisim dispela sik sapos ol i painim hariap.—FOLHA ONLINE, BRASIL.
“Tingim Tru Mama Bilong Yu”
Ol saveman i skelim olsem wanpela mama bilong Kanada husat i save stap long haus na lukautim tupela skul pikinini, sapos em i mas kisim pe long olgeta wok em i mekim, na pe bilong ovataim tu, pe bilong em insait long wanpela yia bai inap olsem 390,000 kina. Nius Vancouver Sun i tok dispela pe i stret wantaim pe ol wokman i save kisim long nau, olsem wanpela wokman “i wok 100 aua long wanpela wik—15 aua long 6-pela de na 10-pela aua long wanpela de.” Dispela kain mama i mekim ol wok olsem lukautim pikinini, tisa, draiva, klinim haus, kuk, nes, na stretim ol samting. Nius i tok: “Tingim tru mama bilong yu: Ating em i no kisim pe i stret long wok em i mekim.”
Fosim Man Long Mekim Wok
Lain Yunaitet Nesen Intenesenel Leba Oganaisesen (ILO), i tok, “long olgeta hap inap 12.3 milion manmeri i kisim hevi long pasin bilong fosim man long mekim wok.” Ol i tok winim 2.4 milion bilong ol dispela manmeri i kisim hevi long pasin bilong maketim ol man. Em ol kain wok olsem fosim wanpela long mekim wok pamuk, wok soldia, na sampela kain wok we man i kisim liklik pe tru o i no kisim pe, long wanem, pe bilong en i go bilong bekim dinau. Juan Somavia, em dairekta bilong lain ILO, em i tok dispela kain wok i “sakim raits bilong ol man na i daunim ol.”
Insait Bilong Ol Ka i Hat
Nius Pediatrics i tok long 2004, inap 35 pikinini long Amerika i dai taim bodi bilong ol i hat nogut tru, long wanem, ol i stap insait long ka i stap long ka pak. Ol wok painimaut i soim olsem taim hat bilong san i winim 30 digri Selsias, kwiktaim insait bilong ka bai hat olsem 57 i go 68 digri. Maski sapos hat bilong san em inap olsem 22 digri, hat insait long ka inap go antap olsem 22 digri moa insait long 15 i go 30 minit bihain long man i stopim pinis ka. Maski man i daunim windo inap 4-pela sentimita o putim eakon paslain long stopim ka, dispela i no inap. Lain i kamapim dispela ripot i tok ol manmeri inap abrusim hevi sapos ol i kisim save long dispela samting.