Sampela Tok i Kam Long Olgeta Hap

Pasin Bilong Bagarapim Graun na Sik Kensa

Inap 27 yia ol i bin glasim 22,400 pikinini long Briten na wanpela lain dokta i kisim save olsem, ol pikinini i bin kamap klostu long wanpela hap graun i bagarap​—⁠inap 5-pela kilomita​—⁠planti bilong ol (20 pesen) inap dai long lukimia na ol narapela kain sik kensa, winim ol narapela pikinini i gat ol dispela kain sik, tasol ol i sindaun long ol gutpela hap. Nius The Times bilong Landon i tok, ol i ting win i gat marasin nogut long en i “as” na planti pikinini moa i kisim ol sik kensa. Ol i ting win i bagarap, long wanem, ol faktori i wokim wel, ol ka, simen, ain, na paua, ol i kamapim smok nogut bilong bensin o sampela narapela marasin nogut. Ripot bilong ol dispela dokta i tok, ol pikinini i bin kamap long ol hap i stap klostu (inap 4-pela kilomita) long ol bikrot na rot bilong ol tren, planti moa bilong ol i dai long sik kensa. Ol man bilong raitim ripot i tok, ol i ting smok nogut bilong bensin na disel i as bilong dispela.

Lotu Long Brasil

Wanpela nius (ENI Bulletin) i tok, i no longtaim i go pinis na ripot bilong wanpela lain i tok, “klostu olgeta manmeri (99 pesen) long Brasil i bilip long God.” Ol i bin givim askim long klostu 2,000 manmeri, na 72 pesen bilong ol i tok ol i Katolik, na 11 pesen i tok ol i Talatala, na 9 pesen i no bilong wanpela lotu. Ol narapela i bihainim ol lotu bilong ol tumbuna bilong Brasil na Afrika. Dispela nius (ENI) i tok, “taim ol i askim ol dispela lain i bilip long God ol i bin go long lotu o long wanpela haus lotu long Sande i go pinis, inap 57 pesen bilong ol i tok ol i no bin go.” Inap 44 pesen tasol i bilip olsem man inap kisim strafe bilong i stap oltaim oltaim. Na maski 69 pesen bilong ol man long Brasil i bilip long heven, 32 pesen tasol i bilip olsem ol bai go long heven.

Husat i Bosim Liklik Masin Bilong Televisen?

Ol saveman bilong wanpela lain (EURISPES, Institute for Social, Political, Economic and Social Studies), long Itali, ol i bin skelim pasin bilong ol man long lukim televisen na nau ol i kamapim save ol i bin kisim. Ol i bin givim askim long klostu 2,000 famili long Itali. Wanpela askim ol i bin givim i olsem: Husat i save holim na wokim liklik masin bilong senisim ol program long televisen. Wanpela nius i bin kolim dispela masin olsem samting bilong bosim ol famili long nau. Planti i tok papa i stap olsem namba wan man bilong bosim televisen. Ol pikinini i stap namba 2 bilong bosim ol program bilong lukim. Na mama i las tru bilong holim liklik masin.

Ol Yangpela i Pamuk

Wanpela nius (Weekend Concord) bilong Naijiria i tok, wanpela ripot bilong nau i tok “i no gat narapela lain yangpela long olgeta hap bilong graun i save pamuk olsem ol yangpela long Naijiria.” Inap 68 pesen bilong ol manki na 43 pesen bilong ol pikinini meri em ol i gat 14 i go inap 19 krismas, ol i tokaut olsem ol i bin pamuk “liklik taim bihain long ol senis i bin kamap long bodi bilong ol.” Samting i kamap long dispela em planti yangpela meri i kisim bel nating. Narapela ripot i tok, “inap 71 pesen bilong ol yangpela meri long Naijiria ol i bin dai taim ol i no kisim yet 19 krismas, long wanem, hevi i kamap taim ol i laik rausim bel.”​—⁠Nius Concord.

Bikpela Hevi Long Wasim Han

I no longtaim i go pinis na wanpela nius bilong ol dokta long Frans (Le Quotidien du Médecin) i kamapim wanpela stori i toktok planti long wanpela pasin i save go bikpela moa na ol dokta i tingting planti long en​—⁠ol man i no save wasim han paslain long ol i kaikai o bihain long ol i go long toilet. Dokta Frédéric Saldmann i tok, i no hatwok long wasim han, tasol bikpela hevi i save kamap sapos man i no mekim. Em i bagarapim kaikai bilong em na dispela i givim sik long em. Planti man i no save wasim han. Dispela stori i tok, ol i bin glasim ol plet pinat long sampela klap long Inglan na ol i lukim olsem ol i no klin​—⁠liklik liklik hap pispis bilong 12-pela man i bin stap long en. Na taim ol i skelim ol samting bilong wanpela skul long Amerika ol i kisim save olsem: Ol pikinini i no sik tumas na ol i mas lusim skul taim wanpela tisa i bin bosim wok bilong ol pikinini long wasim han long olgeta taim. Namba bilong ol pikinini i save kisim sik long bel em i go daun inap 51 pesen, na namba bilong ol pikinini i lusim skul, long wanem, ol i sotwin em i go daun inap 23 pesen. Pinis bilong dispela stori i tok, em i bikpela samting long skulim ol pikinini long wasim han taim ol i liklik yet.

Wok Bisnis na Pasin Bilong i Stap Rabis

Wanpela nius (HCHR News em bilong Office of the High Commissioner for Human Rights) i tok, kirap long 1975 i go inap 1985, wok bisnis long olgeta hap i bin go bikpela inap 40 pesen, tasol “namba bilong ol manmeri i stap rabis i go bikpela inap 17 pesen.” Long nau, long 89 kantri ol manmeri i stap rabis moa yet, winim 10-pela yia i go pinis o sampela yia moa. Long 70 kantri i stap rabis, mani ol man i kisim long nau i liklik tumas, em i daun long mani ol i bin kisim 20 o 30 yia i go pinis. Dispela nius (HCHR News) i tok, tru ol wok bisnis i go bikpela, tasol dispela i bin helpim “sampela kantri tasol.”

Ol Haus i No Gutpela Long Itali

Kirap long yia 1900 na i kam inap long nau, winim 120,000 manmeri long Itali ol i bin dai long ol guria. Wanpela nius (Corriere della Sera) i tok, tasol inap olsem 25 milion manmeri long Itali i sindaun long ol hap em “64 pesen bilong ol haus i no gutpela tumas​—⁠ol inap bagarap long taim bilong guria.” Sampela kain haus olsem em ol haus sik, ol paia-stesin, na sampela haus moa, na ol dispela haus i bikpela samting bilong helpim ol man sapos bikpela hevi i kamap. Long olgeta yia long Itali, ol i save tromoi 7,000 bilion lira (5.3 bilion kina) bilong stretim ol samting guria na ol samting nogut bilong ol faktori i bin bagarapim. Wanpela saveman i tok, “planti taim dispela bikpela mani ol i tromoi bihain long ol bikpela hevi . . . ol i bin mekim wok long en bilong wokim gen ol haus long wankain pasin kranki na long wankain ples nogut.”

Blut na Binatang Jem HIV

Klostu 22 milion manmeri long olgeta hap ol i gat binatang jem HIV o ol i kisim pinis sik AIDS, na winim 90 pesen bilong ol i stap long ol kantri i stap rabis. Wanpela lain long Landon i gat nem Panos i tok: “Inap 10 pesen bilong ol nupela man i kisim binatang jem HIV long ol kantri i stap rabis, ol i kisim long rot bilong kisim blut.” Long planti kantri ol man inap kisim sik long blut, long wanem, pasin bilong ol laboritori long glasim blut bilong save blut i gat binatang jem HIV o nogat i no gutpela tumas. Olsem: Long Pakistan, klostu 50 pesen tasol bilong ol klinik i bungim blut bilong ol man, ol i gat masin bilong glasim blut, ol narapela nogat. Olsem na inap 12 pesen bilong ol nupela man i save kisim binatang jem HIV long dispela kantri, ol i kisim long rot bilong kisim blut. Inap 15 yia i go pinis ol i kamapim long namba wan taim olsem sampela man i gat sik AIDS. Kirap long dispela taim na i kam inap long nau, inap olsem 30 milion manmeri long olgeta hap ol i kisim binatang jem HIV, em binatang i save kamapim sik AIDS.

Ol i Pret Tumas Long God

I no longtaim i go pinis na wanpela lain i givim sampela askim long ol pikinini bilong Brasil em bel na tingting bilong ol i no stap isi. Wanpela nius (ENI Bulletin) i tok, ol i kisim save olsem planti bilong ol dispela pikinini i tingting planti, long wanem, ol i pret tumas long God. Inap 25 pesen bilong ol dispela pikinini em bel bilong ol i no stap isi, ol i gat hevi insait long famili o wanpela wanblut i bin dai, tasol 75 pesen bilong ol i tingting planti, long wanem, ol i ting God em i man bilong bekim nogut na givim strafe long ol man. Nius ENI i tok, dispela lain i “kirapim ol papamama long skulim ol pikinini olsem God bai helpim ol na em i save tru long ol.”

Toktok Bilong Elefan

Hap bilong nek bilong elefan em krai bilong en i save kamap long en i traipela tru, tasol dispela hap bilong nek i no inap wok hariap, olsem na yumi man i no inap harim olgeta krai bilong elefan. Tasol ol krai bilong elefan inap go longwe tru na ol narapela elefan i stap longwe inap olsem 2-pela kilomita, ol inap save long ol dispela krai. Na ol elefan inap harim 150 narapela narapela krai, na ol bai bekim sapos em krai bilong wanpela elefan i insait long famili o lain bilong ol. Ol elefan i no save bekim krai bilong ol elefan ol i no save long en o taim ol i harim krai bilong ol, ol i no amamas. Nius The Times bilong Landon i tok, savemeri Karen McComb bilong Yunivesiti Bilong Saseks long Briten, em i bin skelim pasin bilong ol elefan long Amboseli Nesenel-Pak long Kenya, na em i tok, “i no gat narapela animal i ken kamapim ol kain krai olsem elefan.”