Yu Ting Blut Ol i Testim Long HIV Em i Seif Long Kisim?

DISPELA STORI I KAM LONG NAIJIRIA

◼ DISPELA askim i kamap long Naijiria taim ol i painimaut olsem wanpela bebi gel i bin kisim binatang jem HIV long rot bilong kisim blut long wanpela bikpela haus sik long Naijiria.

Dairekta bilong haus sik i tok, kwiktaim bihain long mama i karim Eniola, ol i kisim save olsem bebi i gat sik bilong skin i go yelo. Ol dokta i tok long senisim blut bilong em wantaim blut bilong narapela. Papa bilong bebi i givim blut bilong em yet bilong mekim olsem, tasol blut bilong papa na bebi i no wankain, olsem na ol i givim blut bilong haus sik long bebi. Bihain liklik ol i testim blut bilong bebi na ol i luksave olsem em i gat HIV, maski papamama i no gat dispela sik. Haus sik i tok, “ol i bin testim blut ol i givim long bebi na blut i no gat HIV long en taim ol i givim long bebi.”

Olsem wanem na bebi i kisim HIV? Gavman bilong Naijiria i mekim wok painimaut na ol i kisim save olsem HIV i bin stap insait long blut em haus sik i bin givim long bebi. Niuspepa Nigerian Tribune i kamapim tok bilong wanpela saientis, i tok: “Taim man i bin givim blut, em i stap long wanpela haptaim [ol i kolim window period] bilong kisim HIV.”

Tru, dispela em wanpela taim tasol dispela samting i kamap, tasol dispela i kamapim klia olsem ol hevi inap painim man i kisim blut. Lain U.S. Centers for Disease Control and Prevention i stori long dispela haptaim (window period) bilong HIV, na i tok: “Bodi bilong man i kisim HIV i save kamapim ol antibodi (em ol liklik samting insait long blut bilong sakim sik), na em ol dispela antibodi ol dokta i wok long painim taim ol testim blut. Tasol ol dispela antibodi i no kamap planti hariap insait long blut we tes i ken luksave man i gat HIV o nogat. Dispela haptaim namel long taim man i kisim HIV na long taim ol inap luksave long en long blut, ol i kolim window period. Long klostu olgeta man ol dispela antibodi bai kamap ples klia long blut tes insait long 2-pela wik i go inap long 8-pela wik bihain (averes em 25 de) long taim man i kisim HIV. Tasol long sampela man em i longpela taim moa. . . . Sampela taim inap 6-pela mun i lus bilong ol dispela antibodi i kamap ples klia.”

So maski ol i bin testim blut na tok blut i no gat HIV long en, dispela i no makim olsem dispela blut i seif. Lain San Francisco AIDS Foundation i tok lukaut olsem: “Insait long dispela haptaim ol i kolim window period ol i no inap luksave olsem blut i gat HIV o nogat, tasol man inap kisim HIV long dispela haptaim. Tru tru, em i isi moa long man i givim HIV long narapela insait long dispela haptaim (olsem taim em i kisim HIV nupela).”

Inap longpela taim ol Witnes Bilong Jehova i bin bihainim tok bilong Baibel long ‘abrusim blut.’ (Aposel 15:29) Dispela i bin lukautim ol na i kamapim klia olsem em i savetingting long bihainim tok bilong God. Bilong kisim save moa long ol marasin samting ol dokta i ken yusim olsem senis bilong blut, plis lukim nius How Can Blood Save Your Life?a

[Futnot]