As na Planti Man i Sakim Blut
WANPELA bikpela toktok i kamap, na kot bilong Ontario i kotim lain Retkros Bilong Kanada, long wanem, ol i gat asua long binatang jem HIV bilong sik AIDS tupela man i bin kisim long blut ol i givim long ol. Tupela man wantaim i kisim blut bilong wanpela man tasol i gat dispela binatang jem. Wanpela jas, em Stephen Borins, em i tok: ‘Taim wanpela samting nogut olsem jem long blut, em inap bagarapim laip bilong man i kisim dispela blut, orait yumi mas hariap long mekim wanpela samting.’
Long 1980 samting, i gat 1,200 manmeri bilong Kanada i kisim jem HIV, na 12,000 manmeri moa ol i kisim sik hepataitis C—ol i kisim long blut na long ol samting ol i wokim long blut i gat binatang jem long en. Bilong daunim dispela hevi ol i glasim moa yet blut ol man i givim long haus sik. Tasol i no olgeta man i givim blut ol i tok tru long pasin bilong ol long ol samting bilong maritpasin. Wanpela lain long Yunaitet Stets i skelim ol manmeri bilong givim blut na ol i kisim save olsem, 1-pela long olgeta 50 50 manmeri i givim blut ol i no tok stret long pasin nogut ol i mekim, olsem ol i bin mekim pasin sem o slip wantaim wanpela pamukmeri.
Na narapela hevi moa i olsem: Ol i no gat rot bilong glasim gut blut olsem blut i klin o nogat. Wanpela nius (New Scientist) i tok: “Sapos wanpela man i kisim pinis jem HIV na 3-pela wik bihain ol i glasim blut bilong em, ol i no inap painim dispela jem long blut bilong em. Na long sik hepataitis C, em longtaim liklik olsem 2-pela mun.”
Inap sampela yia nau, namba bilong ol manmeri long Kanada i laik givim blut o kisim blut i go daun tru. Wanpela man bilong raitim nius, em Paul Schratz, em i tok: “Namba bilong ol man i laik givim blut i go daun na namba bilong ol man i no inap givim blut i go antap, olsem na tenkyu tru long ol Witnes Bilong Jehova em ol i go pas long painimaut ol samting i olsem senis bilong blut.”
Nius The Toronto Star i tok, long wanpela yia i go pinis, inap 40 manmeri i “go long ol haus sik long Kanada ol i mekim tok giaman olsem ol i Witnes Bilong Jehova, long wanem, ol i no laik kisim blut.” Ol lain i skelim dispela samting i tok, inap olsem 90 pesen bilong ol manmeri long Kanada ol i laik kisim narapela samting olsem senis bilong blut. Olsem na blut em i no wanpela samting bilong lotu tasol.