“Jehova Em i Helpim Bilong Mi”

Planti Manmeri i Kam Long Lotu Bilong Jehova

OL TOK profet bilong Baibel i stori long taim bilong yumi, ol i tok profet olsem ol manmeri bilong olgeta lain bai kam long lotu tru bilong Jehova. Long rot bilong profet Hagai, God Jehova i tok: “Bai mi seksekim olgeta lain man na bai ol gutpela samting bilong olgeta lain ol i mas i kam insait; na bai mi pulapim ol gutpela gutpela samting long haus bilong mi.” (Hagai 2:​7, NW ) Aisaia na Maika i tok profet olsem long taim bilong yumi​—⁠em “wanpela taim bai i kamap bihain”​—⁠ol lain manmeri bai lotu long Jehova long pasin em i orait long en.​—⁠Aisaia 2:​2-4; Maika 4:​1-4.

Yu ting ol kain tok profet olsem i wok long kamap tru long nau? Yumi ken skelim ol samting i bin kamap. Insait long 10-pela yia i go pinis, winim 3,110,000 nupela man i bin dediket long Jehova long winim 230 kantri. Tru tumas, long olgeta 10-pela 10-pela Witnes Bilong Jehova i stap long olgeta hap, inap 6-pela i bin kisim baptais insait long 10-pela yia i go pinis. Long 2004, long olgeta 2-pela 2-pela minit, wanpela nupela wokman bilong God i dediket pinis i kam insait long kongrigesen Kristen!a

Olsem long taim bilong ol aposel, long nau tu “planti manmeri i bilip na i tanim bel na i kamap disaipel bilong Bikpela.” Tru, taim namba bilong ol man i lotuim God i go bikpela, dispela samting tasol i no makim olsem God i blesim wok, tasol em i soim olsem “strong bilong Bikpela” i stap wantaim lain bilong em. (Aposel 11:21) Wanem samting i kirapim planti milion manmeri long kam lotuim Jehova? Na dispela i mekim wanem samting long yu yet?

Ol Man i Gat Gutpela Bel i Kam

Jisas i tokaut stret: “I no gat wanpela man inap i kam long mi long laik bilong em yet. Nogat. Papa i mas kirapim tingting bilong en na bringim em i kam long mi.” (Jon 6:44) Olsem na Jehova i pulim ol man em “bel bilong ol i gutpela tru . . . bilong kisim laip i stap gut oltaim.” (Aposel 13:48) Spirit bilong God inap kirapim ol man long tingim ol samting bilong spirit. (Matyu 5:⁠3) Sapos maus bilong bel bilong man i gat tok, o em i wok long painim gutpela samting bilong wet long en, o em i gat wanpela bikpela hevi, ol dispela samting inap kirapim sampela long wok long painim God na long dispela rot ol i kisim save long ol samting God bai mekim bilong helpim ol manmeri.​—⁠Mak 7:​26-30; Luk 19:​2-10.

Planti man i laikim lotu bilong Jehova, long wanem, Baibel skul em kongrigesen Kristen i save givim i helpim ol long kisim bekim bilong ol askim ol i tingting planti long en.

“Sapos i gat wanpela God i stap, bilong wanem ol manmeri i wok long karim hevi long narapela i mekim pasin i no stret long ol?” Davide, em wanpela man Itali i save salim ol drak, em i bin tingting planti long dispela askim. Em i no gat bikpela laik tumas long save long ol samting bilong lotu, olsem na em i kamapim dispela askim bilong kirapim tok pait. Em i tok: “Mi no bin ting mi bai kisim wanpela gutpela bekim mi inap bilip long en. Tasol Witnes i toktok wantaim mi em i no les hariap, na em i kamapim ol skripsa bilong Baibel bilong strongim olgeta tok em i mekim. Mi pilim tru toktok mipela i mekim.” Long nau, Davide i stretim pinis laip bilong em na em i mekim wok bilong Jehova.

Sampela narapela i painim as bilong i stap bilong ol na dispela i bringim ol i kam long oganaisesen bilong Jehova. Wanpela dokta bilong stretim sik bilong tingting long Zagreb, Kroesia, em yet i gat bikpela bel hevi na em i go lukim narapela dokta i gat nem long stretim sik bilong tingting. Em i kirap nogut long dokta i givim telefon namba bilong brens ofis bilong ol Witnes Bilong Jehova long Zagreb, na nem bilong wanpela Witnes em i save long em. Dokta i tok: “Mi ting dispela lain inap helpim yu. Sapos mi salim yu i go long narapela lotu, bai yu painim ol imis tasol em ol i no gat laip​—⁠i no gat wanpela i toktok, na ples i tudak long ol samting bilong spirit. Mi no ting narapela lotu inap helpim yu. Mi bin salim sampela narapela sikman i go long ol Witnes Bilong Jehova, na mi ting ol inap helpim yu tu.” Orait ol Witnes i go lukim em na bihain liklik ol i kirap stadi wantaim em long Baibel. Insait long sampela wik tasol, dispela dokta bilong stretim sik bilong tingting i tokaut olsem save em i kisim long ol samting God bai mekim i helpim em na i stap bilong em i gat as tru bilong en.​—⁠Saveman 12:⁠13.

Taim wanpela bikpela hevi i kamap, planti man i luksave olsem tok i tru bilong Baibel tasol inap mekim gut bel bilong ol. Long kantri Grik, wanpela mangi i gat 7-pela krismas i pundaun long rup bilong skul i go daun long graun na em i dai. Inap sampela mun bihain, tupela Witnes i bungim mama bilong em na ol i traim long mekim gut bel bilong em long rot bilong toktok long kirap bek. (Jon 5:​28, 29) Dispela i mekim na meri hia i kirap long krai. Ol sista i askim em: “Sapos yu laik kisim sampela save moa long Baibel, orait mipela i ken i kam lukim yu long wanem taim?” Meri i tok: “Nau tasol.” Meri i singautim ol i kam insait long haus, na ol i kirap stadi long Baibel. Long nau, famili olgeta bilong meri i mekim wok bilong Jehova.

Yu Insait Long Dispela Wok?

Long olgeta hap bilong graun i gat ol kain stori olsem. Jehova i wok long bungim na skulim bikpela lain manmeri long olgeta hap i lotu tru long em. Dispela lain bilong olgeta hap inap abrusim bagarap taim pasin nogut bilong dispela graun i pinis na kisim laip long nupela taim i gat stretpela pasin long en.​—⁠2 Pita 3:⁠13.

Blesing bilong Jehova i mekim na lain bilong em inap pinisim gut dispela bikpela wok bilong bungim ol lain man. (Aisaia 55:​10, 11; Matyu 24:​3, 14) Olsem wanem? Yu save givim bel long wok bilong autim tok bilong Kingdom? Sapos yu mekim, yu ken save olsem God bai helpim yu na yu ken wanbel wantaim tok bilong man bilong raitim song: “Jehova em i helpim bilong mi.”​—⁠Song 121:​2, NW.

[Futnot]

[Rait long pes 9]

‘I no gat wanpela man inap i kam long mi long laik bilong em yet. Papa i mas kirapim em na bringim em i kam long mi.’​—⁠JON 6:44

[Blok long pes 8]

HUSAT I MEKIM NA WOK I GO BIKPELA?

“Sapos Bikpela i no wokim haus, ol kamda i wok nating.”​—⁠Song 127:⁠1.

“God i bin mekim kaikai i kamap. Olsem na man i planim pikinini kaikai, em i no gat nem. Na man i givim wara, em tu i no gat nem. Nogat. God i save mekim kaikai i kamap.”​—⁠1 Korin 3:​6, 7.