Helpim Ol Man Long Go Klostu Long Jehova
“I no gat wanpela man inap i kam long Papa long narapela rot. Nogat. Long mi tasol.”—JON 14:6.
1. Taim Jisas i kirap bek pinis, em i givim wanem tok long ol disaipel bilong em? Ol Witnes Bilong Jehova i bihainim dispela tok na wanem samting i kamap long dispela?
KRAIS JISAS i tokim ol disaipel bilong em olsem: “Yupela i mas i go mekim olgeta lain manmeri i kamap disaipel bilong mi. Na yupela baptaisim ol long nem bilong Papa na bilong Pikinini na bilong Holi Spirit.” (Matyu 28:19) Insait long 10-pela yia i go pinis, ol Witnes Bilong Jehova i bin helpim planti manmeri long kam long God, winim 3,000,000. Bihain ol dispela man i bin kisim baptais bilong makim olsem ol i dediket long God bilong mekim laik bilong em. Yumi amamas tru long helpim ol dispela manmeri long go klostu long God, a?—Jems 4:8.
2. Planti nupela i kisim baptais, tasol wanem samting i bin kamap?
2 Long sampela kantri planti nupela disaipel i bin kisim baptais, tasol namba bilong ol pablisa bilong Kingdom i no go bikpela olsem. Tru, sampela ol i dai, olsem wan pesen long wanpela yia, tasol long sampela yia i go pinis, planti ol i bin lusim lain bilong Jehova. Bilong wanem? Dispela stori na stori i kamap bihain long en bai toktok long ol samting i save helpim ol man long go klostu long Jehova na wanem samting inap mekim na sampela i lusim Jehova.
I Gat Wanem As na Yumi Autim Tok
3. (a) Olsem wanem dispela wok Jisas i bin givim long ol disaipel bilong em i kamap long wankain taim olsem wok bilong ensel em Kamapim Tok Hait 14:6 i stori long en? (b) Wanem wanpela gutpela rot bilong kirapim ol man na ol i laik kisim save long tok bilong Kingdom? Tasol wanem hevi i kamap long dispela?
3 Nau long “taim bilong las de,” ol disaipel bilong Jisas i gat wok bilong autim stretpela save long “gutnius bilong kingdom.” (Daniel 12:4; Matyu 24:14) Wok ol i mekim i kamap long wankain taim olsem wok bilong ensel em “i gat gutnius bilong i stap oltaim oltaim, na em i . . . autim dispela gutnius long ol manmeri i stap long graun. Em i autim long ol manmeri bilong olgeta lain man na bilong olgeta kantri na bilong olgeta tok ples na bilong olgeta kain skin.” (KTH 14:6) Long nau, planti man i tingim tasol ol samting bilong skin, olsem na gutpela rot tru bilong kirapim ol man na ol i gat laik long kisim save long Kingdom bilong God na long helpim ol long go klostu long Jehova, em long rot bilong tokim ol olsem i gat gutpela samting ol inap wetim—em laip i stap oltaim long Paradais long graun. Tasol ol man i bung wantaim lain bilong God bilong kisim laip tasol long Paradais, ol i no stap strong long ol samting bilong spirit bambai ol i ken wokabaut long liklik rot i go long laip.—Matyu 7:13, 14.
4 Jisas i tok: “Laip bilong i stap gut oltaim, em i olsem. Ol man i kisim dispela laip, ol i save long yu, yu wanpela tasol yu God tru. Na ol i save long Jisas Krais, em yu bin salim i kam.” (Jon 17:3) Ensel i flai namel long skai em i autim “gutnius bilong i stap oltaim oltaim,” na em i tokim ol man i stap long graun olsem: “Taim i kamap pinis bilong God i skelim pasin bilong olgeta man long kot. Olsem na yupela i mas pret long em na litimapim nem bilong em. Yupela i mas lotu long God, em i bin wokim heven na graun na solwara na olgeta hul wara.” (KTH 14:7) Olsem na nambawan as na yumi autim gutnius em bilong helpim ol man long go klostu long Jehova long rot bilong Krais Jisas.
Wok Bilong Jehova Yumi Mas Mekim
5. Wanem tok bilong Pol na Jisas i kamapim olsem yumi mekim wok bilong Jehova, i no wok bilong yumi?
5 Aposel Pol i raitim pas i go long ol wanlain Kristen em God i bin makim ol long spirit holi na em i toktok long ‘wok bilong helpim ol [man] long kamap wanbel wantaim God,’ na em i tok God i mekim ol man i kamap wanbel wantaim em long rot bilong ofa bilong Krais Jisas. Pol i tok, i olsem “God yet i singaut long olgeta man long maus bilong mipela,” na mipela i save “autim tok bilong Krais yet long olgeta man, na mipela i tokim ol olsem ‘Mobeta yupela lusim pasin birua na kamap wanbel wantaim God.’ ” Man! Dispela em i gutpela samting tru, a? Maski yumi bilong lain God i bin makim long spirit holi na yumi “kisim maus bilong Krais na autim tok bilong en,” o yumi ol poroman bilong ol i gat tingting long i stap oltaim long graun, yumi no ken lusim tingting olsem dispela em i wok bilong Jehova, i no wok bilong yumi. (2 Korin 5:18-20) Ol man i kam long Krais, God yet i save pulim ol i kam na em i skulim ol. Jisas i tok: “I no gat wanpela man inap i kam long mi long laik bilong em yet. Nogat. Papa i mas kirapim tingting bilong en na bringim em i kam long mi. Na long las de bai mi kirapim em long matmat. Tok i stap long buk bilong ol profet olsem, ‘God bai i skulim olgeta manmeri.’ Orait olgeta manmeri i harim tok bilong Papa na i kisim save long em, ol i save kam long mi.”—Jon 6:44, 45.
6 Nau long taim bilong las de, olsem wanem Jehova i save pulim ol man i kam na opim “rot” long ol na ol i bilip? (Aposel 14:27; 2 Timoti 3:1) Nambawan rot bilong mekim olsem em long wok bilong ol Witnes bilong em long tokaut olsem God bai kisim bek ol man na em bai givim strafe long ol man nogut bilong dispela graun. (Aisaia 43:12; 61:1, 2) Dispela wok bilong autim tok long olgeta hap i seksekim olgeta lain manmeri—em i wanpela mak olsem klostu nau bikpela bagarap bai kamap. Na long wankain taim, God i pulim ol manmeri i “gutpela” long ai bilong em long lusim pasin bilong dispela graun na ol i kisim bel isi long “haus” bilong lotu tru. Long dispela rot Jehova i truim tok profet bilong em long maus bilong Hagai olsem: “Bai mi seksekim olgeta lain man na bai ol gutpela samting bilong olgeta lain ol i mas i kam insait; na bai mi pulapim haus bilong mi long ol gutpela gutpela samting.”—Hagai 2:6, 7, NW; KTH 7:9, 15.
7. Olsem wanem Jehova i save opim bel bilong ol man na pulim ol i kam long em na long Pikinini bilong em?
7 Jehova i save opim bel bilong ol dispela man i save aninit long em—“ol nambawan gutpela samting bilong olgeta lain manmeri”—bambai ol i “putim yau long dispela tok” bilong ol Witnes bilong em. (Hagai 2:7, long Baibel bilong lain Jewish Publication Society; Aposel 16:14) Wankain olsem long taim bilong ol aposel, sampela taim Jehova i save mekim wok long ol ensel bilong stiaim ol Witnes bilong em long go long ol man i gat gutpela bel na ol i singaut long em bilong helpim ol. (Aposel 8:26-31) Taim ol man i kisim save long ol gutpela samting God i bin mekim bilong helpim ol long rot bilong Pikinini bilong em, Krais Jisas, dispela save long pasin bilong Jehova long laikim tru ol man i mekim na ol i go klostu long em. (1 Jon 4:9, 10) Tru tumas, long rot bilong “gutpela pasin” bilong em, Jehova i save pulim ol man i kam long em na long Pikinini bilong em.—Jeremaia 31:3.
Jehova i Save Pulim Husat i Kam?
8. Jehova i save pulim wanem kain man i kam?
8 Ol man i wok long painim Jehova, em i save pulim ol i kam long em na long Pikinini bilong em. (Aposel 17:27) Sampela bilong ol, em ol man i ‘bel nogut na wari long olgeta pasin nogut’ i kamap long ol lotu i gat nem Kristen, na tu, ol i wari long ol pasin nogut i kamap long olgeta hap bilong graun. (Esekiel 9:4) Ol i pilim olsem “ol i stap rabis tru long ol samting bilong God.” (Matyu 5:3) Tru tumas, ol i man bilong ‘daunim ol yet,’ na ol bai stap oltaim long Paradais long graun.—Sefanaia 2:3.
9. Olsem wanem Jehova inap lukim ol man i gat ‘bel i gutpela tru bilong kisim laip i stap gut oltaim’? Olsem wanem em i save pulim ol i kam?
9 Jehova inap lukim tingting na laik i stap long bel bilong man. King Devit i tokim pikinini bilong em, Solomon: “Bikpela i save long olgeta tingting na laik bilong yumi. Sapos yu wok strong long kisim save long laik bilong em, orait bai em i larim yu i save gut long em.” (1 Stori 28:9) Ol laik na tingting i stap long bel bilong man, dispela i mekim na Jehova i save lukim olsem man i ting olsem wanem long ol samting Jehova i bin mekim bilong wokim rot long lusim sin bilong yumi ol man, na em i ting olsem wanem long ol gutpela samting yumi inap wetim, olsem laip i stap oltaim long stretpela nupela taim God bai kamapim. (2 Pita 3:13) Long rot bilong Tok bilong em, em ol Witnes i autim na skulim ol man long en, ol man em ‘bel bilong ol i gutpela tru bilong kisim laip i stap gut oltaim’ Jehova i save pulim ol i kam long em na long Pikinini bilong em, na ‘ol i kamap manmeri i bilip.’—Aposel 13:48.
10 Olsem wanem? Pasin bilong Jehova long pulim sampela man na sampela nogat i makim olsem God i makim pinis ol samting i save painim ol man? Nogat tru! Laik bilong man yet i mekim na God i save pulim em. Em i larim ol man yet i makim ol samting ol i laik mekim. Long nau Jehova i givim rot long ol manmeri bilong graun long makim wanem rot ol i laik bihainim, olsem em i bin givim rot long ol Israel inap 3,000 yia i go pinis taim Moses i tok: “Nau mi soim yupela tupela rot. Sapos yupela i bihainim wanpela rot, yupela bai i kisim gutpela laip tru, na bai yupela i stap gut oltaim. Na sapos yupela i bihainim narapela rot, bai yupela i kisim taim nogut na bagarap, na bai yupela i dai. . . . Orait i gat rot bilong i stap gut na rot bilong i dai. Long wanpela rot God bai i mekim gut long yupela, na long narapela rot bai yupela i painim bagarap. Orait nau yupela i mas makim wanem rot yupela i laik bihainim. Na bai mi singautim heven na graun long lukim yupela na save long wanem rot yupela i makim. Tasol mi laikim yupela i mas bihainim rot bilong i stap gut. Yupela i mas laikim tru God, Bikpela bilong yumi, na yupela i mas harim tok bilong en na bel tru long em oltaim.”—Lo 30:15-20.
11. Ol Israel i mas mekim wanem bilong makim rot bilong kisim laip?
11 Tingim: Bilong makim rot bilong kisim laip, ol Israel i mas ‘laikim tru God, na harim tok bilong en na bel tru long em oltaim.’ Taim Moses i mekim dispela tok, ol Israel i no kisim yet Graun Bilong Promis. Ol i stap long ples stret bilong Moap, na ol i wok long redi bilong brukim wara Jordan na go insait long kantri Kenan. I no gat rong long ol i tingim dispela “bikpela graun i gat planti gris na ol kaikai i save kamap gutpela tumas” em klostu bai ol i kisim, tasol bilong kisim dispela gutpela samting ol i mas laikim tru Jehova, na harim tok bilong em, na bel tru long em oltaim. (Kisim Bek 3:8) Moses i kamapim dispela samting long tok bilong em olsem: “Mi tokim yupela long yupela i mas laikim God tru na bihainim olgeta tok bilong em na mekim ol pasin em i laikim. Na bai yupela i kamap bikpela lain manmeri na bai yupela i stap gut oltaim. Na God, Bikpela bilong yumi, bai i mekim gut long yupela long dispela graun nau yupela i laik i go sindaun long en.”—Lo 30:16.
12. Ol samting bilong ol Israel i mas skulim yumi olsem wanem long wok bilong autim tok na skulim ol man?
12 Ol samting nau yumi stori long en i mas skulim yumi long wok bilong autim tok na skulim ol man nau long dispela taim bilong pinis, a? Yumi save tingim Paradais bai kamap bihain na yumi toktok long en taim yumi mekim wok autim tok. Tasol yumi na ol disaipel yumi kamapim bai no inap lukim truim bilong dispela tok promis sapos yumi tingim yumi yet tasol na mekim wok bilong God. Wankain olsem ol Israel, yumi na ol man yumi skulim i mas lain long ‘laikim tru God, na harim tok bilong en na bel tru long em oltaim.’ Sapos yumi tingim dispela samting taim yumi autim tok, bai yumi wok wantaim God long pulim ol man i kam long em.
Wanwok Bilong God
13, 14. (a) Olsem 1 Korin 3:5-9 i tok, olsem wanem yumi save kamap wanwok bilong God? (b) Sapos namba bilong ol manmeri i autim tok bilong Kingdom i go bikpela, yumi mas litimapim nem bilong husat? Bilong wanem yumi mas mekim olsem?
13 Aposel Pol i mekim tok piksa long pasin bilong wok wantaim God taim em i toktok long pasin bilong wokim gaden. Em i tok: “Yupela tingim gut. Apolos em i husat? Mi Pol, mi husat? Mitupela i wokman tasol. Bikpela i givim narapela narapela wok long mitupela, na long dispela wok bilong mitupela yupela i bin bilip long Krais. Mi bin planim pikinini bilong kaikai. Apolos em i bin givim wara long en. Tasol God i bin mekim kaikai i kamap. Olsem na man i planim pikinini kaikai, em i no gat nem. Na man i givim wara, em tu i no gat nem. Nogat. God i save mekim kaikai i kamap, em wanpela tasol i gat nem. Man i planim pikinini kaikai na man i givim wara, tupela wantaim i mekim wok bilong God. Na tupela wan wan bai i kisim pe inap long wok tupela i bin mekim. Mitupela i wanwok bilong God, na yupela i olsem gaden bilong en.”—1 Korin 3:5-9.
14 Yumi ol wanwok bilong God, yumi mas planim “gutnius bilong kingdom” i go insait long bel bilong man, na taim yumi mekim gobek na Baibel-stadi yumi mas redim gut ol tok yumi bai mekim—dispela i olsem yumi givim wara long ol. Sapos graun, olsem bel, i gutpela, Jehova bai mekim na pikinini kaikai bilong tok i tru bilong Baibel bai kamap olsem wanpela diwai i karim planti kaikai. (Matyu 13:19, 23) Em bai pulim man i kam long em na long Pikinini bilong em. Olsem na sapos namba bilong ol manmeri i autim tok bilong Kingdom i go bikpela, as bilong dispela i olsem Jehova i stiaim bel bilong ol man—em i mekim na pikinini kaikai bilong tok i tru i go bikpela na em i pulim kain man olsem i kam long em na long Pikinini bilong em.
Wanpela Wok Bai Stap
15. Pol i mekim wanem tok piksa bilong soim yumi long olsem wanem yumi ken helpim ol narapela long kisim bilip?
15 Yumi amamas long namba bilong ol manmeri i autim tok i go bikpela, tasol yumi laik tru olsem ol dispela manmeri i wok yet long laikim tru Jehova, na harim tok bilong em, na bel tru long em oltaim. Yumi bel hevi taim yumi lukim sampela i lusim pasin bilong laikim tru Jehova na ol i givim baksait long em. Olsem wanem? Yumi inap mekim wanpela samting bambai dispela samting i no ken kamap? Long narapela tok piksa, Pol i soim yumi long olsem wanem yumi ken helpim ol narapela long kisim bilip. Em i tok: “Yupela i save, God i putim pinis Jisas Krais olsem namba wan ston bilong haus, na i no gat wanpela man inap long putim narapela ston bilong wokim haus antap long en. Na taim ol man i wokim haus antap long dispela ston, ating sampela bai i wokim long gol, na sampela bai i wokim long silva, na sampela bai i wokim long ol ston i dia tumas, na sampela bai i wokim long diwai, na sampela bai i wokim long kunai, na sampela bai i wokim long ol bun bilong wit. Orait bihain wok bilong olgeta man bai i kamap ples klia long de God i makim bilong kotim ol manmeri. Dispela de bai i kamap olsem paia, na dispela paia bai i traim wok bilong olgeta man wan wan, bilong painimaut wok bilong ol i gutpela o nogat.”—1 Korin 3:11-13.
16 Long tok piksa Pol i mekim long gaden em i tok, kaikai bai kamap bikpela sapos man bilong wokim gaden em i planim gut pikinini kaikai, na givim wara long en long olgeta taim, na God i mekim kaikai i kamap. Narapela tok piksa bilong Pol i kamapim klia olsem ol samting i save kamap long wok bilong wanpela wokman Kristen—gutpela samting o samting nogut—dispela em wok bilong em. Olsem wanem? Em i bin wokim haus antap long gutpela as na mekim wok long ol gutpela samting olsem gol na silva? Pol i tok: “Olgeta man i mas lukaut gut long pasin ol i wokim haus long en.” (1 Korin 3:10) Olsem wanem? Taim yumi stori long wanpela man o meri long gutpela samting yumi wetim, em laip i stap oltaim long Paradais, na dispela i kirapim tingting bilong em, yumi save skulim em long ol as tok bilong Baibel tasol na tokim em long ol samting em i mas mekim bilong kisim laip na yumi no skulim em long sampela samting moa? Yumi skulim em long dispela samting tasol, olsem: ‘Sapos yu laik i stap oltaim long Paradais, yu mas stadi, na go long ol miting, na autim tok.’ Sapos yumi mekim olsem, yumi no helpim dispela man long kisim bilip i gat strongpela as bilong en, na dispela bilip yumi bin helpim em long kisim bai no inap sakim ol traim i olsem paia o bilip bilong em bai no inap stap longtaim. Sapos yumi traim long pulim man i kam long God long rot bilong tokim em olsem em inap kisim laip oltaim long Paradais sapos em i mekim wok bilong God inap sampela yia, dispela i olsem yumi wokim haus long ‘diwai, na kunai, na bun bilong wit.’
Skulim Man Long Laikim Tru God na Krais
17, 18. (a) Wanem samting i olsem bikpela samting bambai bilip bilong man i ken stap strong? (b) Olsem wanem yumi inap helpim wanpela man o meri na Krais i ken stap long bel bilong em?
17 Bilong bilip i ken stap strong, pasin bilong pas gut wantaim God Jehova long rot bilong Krais Jisas i mas i stap olsem as bilong en. Yumi man bilong graun i gat sin, olsem na yumi ken kamap wanbel wantaim God long rot bilong Pikinini bilong em tasol. (Rom 5:10) Tingim tok bilong Jisas, em i tok: “I no gat wanpela man inap i kam long Papa long narapela rot. Nogat. Long mi tasol.” Bilong helpim ol narapela long kisim bilip, i “no gat wanpela man inap long putim narapela ston bilong wokim haus antap long en,” em i mas putim Krais Jisas tasol olsem as ston. Olsem wanem ol inap mekim olsem?—Jon 14:6; 1 Korin 3:11.
18 Bilong putim Krais olsem as bilong bilip bilong wanpela Baibel-stadi, yu mas skulim em long kain pasin i kirapim em long laikim tru Jisas, na em i mas kisim dispela pasin long rot bilong ol save em i kisim long wok bilong Jisas olsem Man bilong baim bek ol sinman bilong graun, na Het bilong kongrigesen, na Hetpris i gat pasin sori, na King. (Daniel 7:13, 14; Matyu 20:28; Kolosi 1:18-20; Hibru 4:14-16) Dispela i makim olsem yumi mas helpim ol long tingim Jisas olsem em i stap tru, na i olsem em i stap long bel bilong ol. Taim yumi beten bilong helpim ol, beten bilong yumi i mas i stap olsem beten bilong Pol taim em i askim God long helpim ol Kristen long Efesus, em i tok: “Mi ting long ol dispela samting Papa i bin mekim na mi save brukim skru long en. . . . Mi save brukim skru na prea olsem, . . . long bilip bilong yupela, Krais i ken i stap long bel bilong yupela. Na pasin bilong laikim tru ol arapela, em i ken kamap strong tru insait long bel bilong yupela na mekim yupela i sanap strong, olsem graun i save holimpas rop bilong diwai na mekim diwai i sanap strong.”—Efesus 3:14-17.
19. Taim yumi helpim Baibel-stadi long laikim tru Krais long bel bilong em, wanem samting i mas kamap long dispela? Tasol yumi mas skulim em long wanem samting?
19 Sapos yumi helpim Baibel-stadi bilong yumi long laikim tru Krais, dispela bai helpim em tu long laikim tru God Jehova. Pasin sori bilong Jisas, na ol samting em i pilim, na gutpela pasin bilong em i kamapim klia ol gutpela pasin bilong Jehova. (Matyu 11:28-30; Mak 6:30-34; Jon 15:13, 14; Kolosi 1:15; Hibru 1:3) Olsem na taim ol man i kisim save long Jisas na laikim tru em, bai ol i kisim save tu long Jehova na laikim tru em.a (1 Jon 4:14, 16, 19) Yumi mas skulim ol Baibel-stadi olsem Jehova i as bilong ol samting Krais i bin mekim bilong helpim ol manmeri, olsem na yumi mas tenkyu long Em, na litimapim nem bilong em, na lotu long em olsem em i ‘God i save kisim bek yumi.’—Song 68:19, 20; Aisaia 12:2-5; Jon 3:16; 5:19.
20. (a) Olsem wanem yumi ken helpim ol man long kam klostu long God na long Pikinini bilong em? (b) Long stori i kamap bihain long dispela bai yumi toktok long wanem samting?
20 Yumi wanwok bilong God, olsem na i gutpela yumi helpim ol manmeri long go klostu long God na long Pikinini bilong em, na yumi kirapim bel bilong ol long kisim pasin bilong laikim tru God na pasin bilong bilip. Long dispela rot Jehova bai stap olsem wanpela man tru long ol. (Jon 7:28) Long rot bilong Krais, bai ol inap pas gut wantaim God, na ol bai laikim tru em na bel tru long em oltaim. Ol bai no inap mekim wok bilong God inap sampela yia tasol, nogat; ol i bilip tru olsem long taim Jehova i makim em bai truim ol gutpela promis bilong em. (Krai 3:24-26; Hibru 11:6) Yumi helpim ol narapela long kisim pasin bilong bilip, na wetim gutpela samting long bihain, na laikim tru ol narapela, tasol yumi tu i mas kisim strongpela bilip bambai yumi ken sanap strong, maski ol man i mekim nogut tru long yumi—bilip i mas kamap olsem wanpela strongpela sip em inap sanap strong long taim bilong bikpela win na ren. Bai yumi toktok long dispela samting long stori i kamap bihain long dispela.
[Futnot]
a Wanpela gutpela helpim tru bilong save gut long Jisas, na Papa bilong em, Jehova, em buk Nambawan Man Tru i Winim Olgeta Narapela Man, em Sosaiti Wastaua Bilong Nu Yok i wokim.
Sampela Askim
◻ Olsem wanem yumi save kirapim tingting bilong ol man na ol i gat laik long harim tok bilong Kingdom? Wanem hevi inap kamap long dispela?
◻ Jehova i save pulim wanem kain man i kam long em na long Pikinini bilong em?
◻ Ol Israel i mas mekim wanem bambai ol i ken go insait long Graun Bilong Promis? Dispela inap skulim yumi long wanem samting?
◻ Yumi gat wanem wok bilong helpim ol man long go klostu long Jehova na long Pikinini bilong em?
4. Olsem Jisas na ensel i flai namel long skai i tok, i gat wanem as bilong wok bilong yumi long autim tok?
6. Olsem wanem Jehova i seksekim olgeta lain manmeri? Na long wankain taim, husat i stap bel isi long “haus” lotu tru?
10. Wanem samting i soim olsem pasin bilong Jehova long pulim sampela man na sampela nogat, i no makim olsem Jehova i makim pinis ol samting i save painim ol man?
16. (a) Olsem wanem tupela tok piksa bilong Pol i stori long narapela narapela samting? (b) Olsem wanem wok bilong yumi bilong helpim man long kisim bilip em inap kamap wok nogut na i no inap sakim paia?
[Piksa long pes 10]
Yumi tokim ol man long ol inap kisim laip oltaim long Paradais, tasol nambawan samting yumi laik mekim em long helpim ol long pas gut wantaim Jehova
[Ol Piksa long pes 13]
Sapos yumi redi gut pastaim, bai yumi inap helpim gut ol man em yumi go bek long ol