Ol Stori i Kamapim Bilip i Kam Long Wanpela Haus Kalabus

Long olgeta hap, ol Witnes Bilong Jehova i save go long ol haus kalabus bilong helpim ol kalabusman em ol i gat laik tru long i go klostu long God. Winim 20 yia pinis, mipela i mekim gutpela wok bilong skulim ol man long Baibel long haus kalabus long Altanta, Georgia, Amerika. I gat hatwok long mekim Baibel-stadi long haus kalabus. Mipela i mekim wok volantia long autim tok, na long haus kalabus mipela i bungim ol man i stil long beng, ol man i pulim ol samting bilong ol narapela, ol man i kilim i dai man, ol man bilong baim na salim drak, ol man bilong paulim mani, na ol man bilong mekim ol pasin nogut olsem reipim meri samting. Mipela i helpim ol kain man olsem long wanem rot?

PASTAIM, ating yu laik save long namba wan taim na olsem wanem ol Witnes Bilong Jehova i bin i go insait long dispela haus kalabus. Em long Julai 4, 1918. Ol i bringim 8-pela Kristen i go antap long 15 step bilong haus kalabus. Long dispela taim, ol i save pasim sen long bel bilong ol kalabusman na pasim ol hankap i go long dispela sen, na tu, ol i save putim sen long lek bilong ol, tasol yumi no save ol i bin mekim olsem long ol dispela Kristen o nogat. Ol dispela nupela kalabusman em ol man i strong long ol samting bilong spirit na ol i go pas long wok bilong ol Sumatin Bilong Baibel, em nem bilong ol Witnes Bilong Jehova long bipo. Ol dispela man i no save olsem ol bai i no winim wanpela yia long kalabus na kot bai tokaut olsem ol i no bin mekim stretpela pasin long ol dispela man. Long Mas 1919, ol dispela 8-pela Witnes i lusim dispela haus kalabus na ol i wokabaut i go daun long wankain step ol i bin go antap long en, na nau i no gat ol sen na hankap na ol i stap fri. Bihain ol bikman i pinisim dispela kot, na ol i tokaut olsem ol i no gat asua.a

Taim ol dispela Kristen i stap kalabus long Atlanta, ol i bin mekim ol klas bilong stadi long Baibel. Wanpela bilong ol, em A. H. Macmillan, em i stori olsem pastaim wasman bilong haus kalabus i birua long ol, tasol bihain em i tok: “Dispela skul yupela i mekim [wantaim ol kalabusman] i gutpela tru!”

Nau, winim 80 yia bihain, ol klas bilong stadi long Baibel i wok yet long helpim gut ol man long dispela haus kalabus. Sampela taim ol bikman bilong haus kalabus i bin pilim tru gutpela wok bilong mipela na ol i bin givim prais bilong tok amamas long sampela bilong mipela. Nius Volunteer Today bilong wanpela dipatmen bilong gavman long Amerika (U.S. Department of Justice, Federal Bureau of Prisons) i stori long ol gutpela samting i kamap long wok bilong ol Witnes Bilong Jehova long skulim ol man.

Wanpela gutpela samting dispela program bilong Baibel-stadi i bin kamapim i olsem, em i helpim ol kalabusman long senisim tru pasin bilong ol. Olsem na sampela i lusim kalabus paslain long taim ol i makim bilong ol long pinis long kalabus. Ating sampela man bai tok long dispela as tasol na ol kalabusman i stadi long Baibel wantaim mipela. Tru, wan wan taim kain samting olsem i bin kamap, tasol ol samting i kamap i soim klia olsem planti kalabusman i no gat kain tingting olsem. Planti taim mipela i kisim bikpela amamas long harim olsem ol sumatin bilong mipela i bihainim yet gutpela pasin Kristen planti yia bihain long ol i pinis long kalabus. Orait nau mipela i laik kamapim sampela bilong ol planti gutpela ekspiriens mipela i bin kisim long dispela bikpela haus kalabus.

Painim Gutpela Samting Ol Inap Wetim

Long 1981 samting, mipela ol lain i autim tok long haus kalabus long Atlanta i amamas long helpim ol kalabusman em ol i bilong ol narapela kantri. Sampela i bin mekim ol bikpela senis tru long pasin bilong ol.

Pastaim Raoulb i wanpela kalabusman nogut tru. Em na pren bilong em ol i save mekim ol bikpela rong na nau ol i kalabus, long wanem, ol i bin kilim i dai wanpela man. Ol elda i bin helpim tupela, ol i stori olsem dispela tupela man i gat hatpela pasin tru bilong pait na bagarapim ol samting. Raoul i gat ol birua. Wanpela man i bin tok tru antap long kilim i dai Raoul, na Raoul tu i bin mekim wankain tok long dispela man. Raoul i pret nogut tru taim ol i salim dispela nambawan birua bilong em i kam long haus kalabus long Atlanta. I no longtaim na dispela tupela birua bai bung long sampela hap bilong haus kalabus, olsem long ples bung, o long ples bilong kisim kaikai samting. Tasol Raoul i bin stadi long Baibel wantaim ol Witnes Bilong Jehova, olsem na em i bin senisim tru tingting, na pasin, na bilas bilong em. Taim dispela tupela man i bung long ples bung bilong haus kalabus, dispela nambawan birua i no luksave long Raoul! Olsem na maski i luk olsem wanpela taim tupela bai pait na kapsaitim blut bilong narapela, dispela samting i no kamap.

Taim Raoul i laik kisim baptais bilong kamapim olsem em i dediket pinis long God, mipela i mas painim wanpela tang wara. Pris bilong haus kalabus i helpim mipela na givim mipela wanpela blakpela kofin em mipela inap yusim olsem tang bilong baptais. Mipela i pulimapim wara long dispela kofin inap wara i pulap olgeta. Tasol skin bilong Raoul i bikpela moa long dispela kofin. Olsem na tupela elda i mas wok wantaim bilong putim bodi olgeta bilong Raoul i go insait tru long wara, olsem Baibel i makim. (Luk 3:​21, NW, lukim sta daunbilo) Long nau, Raoul i stap fri na em i givim bel yet long mekim wok olsem wanpela wokman Kristen.

Long 1987, ol i pasim tok long rausim ol kalabusman bilong ol narapela kantri i go bek long kantri bilong ol, na dispela i mekim na ol kalabusman i bikhet na bagarapim nabaut ol samting, na ol i holim tu sampela man. Planti nius long olgeta hap i stori long dispela samting. Tasol planti man i no save long stori bilong sampela kalabusman bilong ol narapela kantri em ol i no laik insait long dispela pasin bikhet bilong pait na bagarapim ol samting, maski bagarap inap painim ol. Ol i sumatin bilong ol Baibel-stadi klas bilong mipela. Bipo ol dispela man i bin redi kwik long pait i go inap long ol i kilim i dai man o ol yet i dai, tasol nau ol i no insait liklik long dispela pasin. Dispela samting i kamapim klia tru olsem Baibel i gat strong long senisim pasin bilong ol raskol na ol inap kamap ol Kristen i laikim tumas pasin bilong i stap isi!​​—⁠Hibru 4:​12.

God i Lusim Rong

Narapela gutpela ekspiriens em bilong James. Bipo em i wanpela Witnes Bilong Jehova, tasol em i bin slek long ol samting bilong spirit. Em i pundaun long traim na em i giaman na stilim mani long beng. Ol i rausim em long kongrigesen Kristen na em i kalabus long banis kalabus long Atlanta. Bihain em i tokim mipela: “Long i stap bilong mi, i no gat wanpela taim bel bilong mi i bin bagarap tru olsem long dispela taim mi stap kalabus.”

I stap bilong man long kalabus i hatwok. James i tok: “Mi pilim olsem mi stap wanpis na mi bel hevi tru.” Tasol taim em i stap long sel long haus kalabus, dispela i kirapim em long skelim gut pasin na i stap bilong em. Em i stori olsem: “Mi no wari long sindaun bilong mi long haus kalabus, tasol mi bel hevi, long wanem, mi no bin stap gut long Papa bilong mi long heven.” Bihain long sampela mun, wanpela kalabusman i stadi long Baibel wantaim ol Witnes, em i singautim James long kam long klas bilong stadi long Baibel. Pastaim James i pilim sem na em i tok nogat. Tasol dispela yangpela man i strong yet, olsem na bihain James i go long wanpela miting long Sande.

Em i pilim tru pasin bilong ol Witnes i mekim stadi long tingim gut ol sumatin. Tasol i gat narapela samting tu em i amamas long en. Ol samting i bin painim em long pastaim i mekim na James i kisim tingting olsem olgeta volantia bilong lotu ol i save kisim bikpela pe long wok ol i mekim wantaim ol kalabusman. Tasol em i kirap nogut long kisim save olsem ol Witnes i no save singaut long mani, na ol i no kisim pe long wok ol i mekim.​​—⁠Matyu 10:⁠8.

Kirap long dispela taim, James i save amamas long wetim taim bilong ol miting. Em i lukim olsem ol brata bilong mekim ol miting ol i save mekim gutpela pasin na strongim bel bilong ol kalabusman. James i amamas moa yet long pasin bilong wanpela elda, na em i tok: “Mi save kaunim namba bilong ol de inap long taim bilong em long kam lukim mipela, long wanem, em i save kamapim gut ol tok bilong Baibel na mekim mipela i pilim tru ol dispela tok; pasin bilong em i save kirapim tru mipela. Em i helpim mi long save olsem em i bikpela samting long ritim Baibel na skelim gut ol tok bilong en bilong kisim gut as tok bilong en, bambai mi ken pilim tru. Na bikpela samting moa yet, mi mas wok long kisim tingting bilong Krais.”

James i hatwok long bilip olsem God inap lusim ol rong bilong em. Wanem samting i helpim em? Em i tok: “Pasin bilong God long lusim rong i kamap ples klia long pasin ol dispela man i mekim long mipela, em ol man i stap gut long God na lusim ol samting bilong ol yet bilong helpim ol narapela.c Wanpela samting i bin kamap klia tru: Maski mi bin mekim ol bikpela rong, i no gat wanpela taim dispela brata i bin mekim samting i soim olsem God i no inap lusim rong bilong mi. Jehova i no bin lusim mi. Em i lukim olsem mi tanim bel tru na givim baksait olgeta long pasin giaman mi bin mekim; na em i mekim gut tru long mi.” Tru tumas, kongrigesen Kristen i kisim bek James. Inap 10-pela yia i go pinis em i bin lusim kalabus, na i kam inap long nau em i save givim bel tru long mekim ol wok bilong God. Meri na famili bilong em ol i amamas tru, long wanem, nau em i wanpela kongrigesen sevent na em i mekim pinis namba wan pablik tok bilong em.

Painim Rot

Mipela i bungim Johnny long 1991 samting. Famili bilong em i bin stadi liklik wantaim ol Witnes Bilong Jehova, tasol i no gat wanpela bilong ol i bin kamap strong long ol samting bilong spirit taim Johnny i stap yangpela yet​—⁠em long dispela taim Johnny i bin sot tru long ol tok bilong stiaim em long ol samting bilong spirit na long bihainim stretpela pasin. Johnny i kirap na i go insait long pasin raskol. Ol i kalabusim em long wanpela haus kalabus i stap klostu long bikpela haus kalabus long Atlanta. Taim em i stap long kalabus, em i harim sampela tok long klas bilong mipela bilong stadi long Baibel na em i kam.

Pastaim Johnny i no save tumas long rit. Tasol em i gat bikpela laik tru long kisim sampela save moa long Jehova na Jisas Krais, olsem na em i wok strong long lain long ritim gut ol tok. (Jon 17:⁠3) Planti taim ol klas bilong mipela i save helpim ol kalabusman long lain long pasin bilong ritim tok long ai bilong planti man na kisim gut insait bilong tok ol i ritim. Johnny i givim bel tru long ol stadi bilong em, olsem na ol wanlain sumatin bilong em i tingim em olsem gutpela piksa long pasin bilong stap gutpela sumatin bilong Baibel.

Planti mun i lus na bihain ol i salim Johnny i go long banis kalabus long Talladega, Alabama, na bai em inap insait long wanpela program i stori long ol drak. Taim em i kamap, kwiktaim em i kirap insait long ol miting bilong ol Witnes Bilong Jehova long dispela haus kalabus. Em i givim bel yet long mekim stadi bilong em i go inap long taim em i pinis long kalabus. Na taim em i pinis long kalabus, kwiktaim em i painim ol Witnes long liklik ples bilong em. Ol i amamas long bungim em na em i mekim yet stadi na wok long kamap strong long ol samting bilong spirit.

Pasin bilong Johnny long givim bel na laikim tumas tok i tru bilong Baibel i bin strongim mama bilong em long insait moa long ol wok bilong kongrigesen. Em i save strongim na helpim tru mama bilong em. I no longtaim i go pinis na em i bin kisim baptais bilong makim olsem em i dediket pinis long God Jehova, na em i wok strong yet long mekim wok autim tok.

Bungim Planti Kaikai

Insait long 20 yia i go pinis, mipela i bin helpim olsem 40 kalabusman long haus kalabus long Atlanta long kamap Witnes Bilong Jehova i baptais pinis; na ol Baibel-stadi mipela i save mekim long olgeta wik i bin helpim olsem 90 kalabusman moa. Sampela narapela kalabusman i bin kisim baptais long taim ol i pinis long kalabus o long taim ol i go long ol narapela haus kalabus.

Mipela ol lain i save go long dispela haus kalabus long olgeta wik bilong helpim ol kalabusman em ol i hevi tru long ol rong bilong ol, mipela i amamas long mekim dispela wok Kristen i narapela kain. (Aposel 3:​19; 2 Korin 7:​8-​13) Long dispela ples i gat ol taua i go antap na ol gad i stap long en na ol i holim ol gan na was i stap, na ol dua i wok long paua, na ol banis i raunim haus kalabus i gat ol resa waia i sap tru, tasol mipela i kirap nogut na amamas tru long lukim ol kalabusman i senisim tru pasin bilong ol na kamap man i bihainim stretpela pasin na i stap gut long lotuim God.​​—⁠1 Korin 6:​9-​11.​​—⁠Wanpela man i salim dispela stori i kam.

[Ol Futnot]

[Blok/Ol Piksa long pes 28, 29]

“Yupela i Bin Lukautim Sampela Gutpela Pren Bilong Mi”

LONG Epril 1983, Frederick W. Franz, em i wanpela memba bilong Gavening Bodi bilong ol Witnes Bilong Jehova long dispela taim, em i go long haus kalabus long Atlanta, Amerika. Em i gat laik tru long i go lukim dispela banis kalabus. Taim em i go insait long haus kalabus, em i tokim gad i sindaun long dua: “Mi laik yupela i mas save olsem yupela i bin lukautim sampela gutpela pren bilong mi long hia!” Dispela gad i tingting planti long tok bilong em. Brata Franz i toktok long wanem samting?

Inap olsem 64 yia paslain long dispela taim, kot i bin giaman long tok olsem Joseph F. Rutherford na 7-pela wanwok bilong em ol i birua long gavman. Bihain Rutherford na Franz ol i kamap gutpela pren na wanwok. Orait nau, winim 40 yia bihain long taim Rutherford i dai​​—⁠na taim em yet i gat 90 krismas​​—⁠Brata Franz i amamas long i go lukim dispela hap em pren bilong em i bin kalabus long en inap planti yia i go pinis. Yumi ken ting em i tingim ol wok Rutherford na ol wanwok bilong em i bin mekim taim ol i stap long dispela haus kalabus. Em wanem wok?

Bihain liklik long taim Rutherford na ol wanwok bilong em i kamap, bikman bilong haus kalabus i tokim ol: “Mipela bai givim sampela wok long yupela. Orait, yupela inap mekim wanem wok?”

Wanpela bilong ol dispela 8-pela man, em A. H. Macmillan, em i tok: “Bikman, long i stap bilong mi i gat wanpela wok tasol mi save mekim, em wok bilong autim tok. Mi no save mekim narapela wok, nogat tru. Yu gat kain wok olsem long hia?”

“Nogat! Em long dispela as tasol na yu kam long hia, na nau mi tokim yu olsem yu no ken autim tok long hia.”

Sampela wik i lus. Ol i putim lo olsem olgeta kalabusman i mas i go long lotu long Sande, na bihain long lotu, husat i laik ol i ken stap bek na insait long Sande-skul. Ol dispela 8-pela man i pasim tok long kirapim klas bilong ol yet bilong stadi long Baibel, na ol i save senis senis long lukautim stadi. Bihain Rutherford i tok: “Sampela man i laik save long samting mipela i mekim ol i kam na bihain planti moa i kam.” I no longtaim na dispela liklik grup i gat 8-pela man long en i go bikpela na inap 90 man i bung!

Ol kalabusman i ting olsem wanem long dispela klas bilong stadi long Baibel? Wanpela kalabusman i tok: “Mi gat 72 krismas, na mi mas go kalabus bambai mi inap kisim save long tok i tru. Long dispela as na mi amamas long mi bin kalabus.” Narapela kalabusman i tok: “Klostu nau taim bilong mi long pinis long kalabus i kamap; mi sori long lusim yupela. . . . Inap yupela i tokim mi long wanem hap mi inap painim ol kain man olsem yupela taim mi lusim kalabus?”

Long nait paslain long ol dispela 8-pela man i lusim kalabus, ol i kisim wanpela gutpela pas bilong wanpela yangpela man i go long klas bilong ol. Em i raitim tok olsem: ‘Mi laik bai yupela i save olsem yupela i bin kirapim laik bilong mi long kamap gutpela man, sapos kain samting olsem inap kamap long wanpela pipia man nogut tru olsem mi. Mi no gat strong liklik long sakim ol pasin nogut, na mi yet i save gut long dispela hevi bilong mi. Tasol bai mi traim, na wok strong tru long daunim ol dispela pasin, na long dispela rot gutpela samting inap kamap long pikinini kaikai yupela i bin planim, na bai mi inap helpim mi yet na ol narapela tu. Ating yupela i kirap nogut long kisim dispela tok long kain man olsem mi, tasol long bel mi pilim tru olgeta tok mi raitim.’

Nau, winim 80 yia bihain, ol Witnes Bilong Jehova i wok yet long planim ol dispela pikinini kaikai bilong tok i tru bilong Baibel long haus kalabus long Atlanta​​—⁠na long planti narapela haus kalabus tu.​​—⁠1 Korin 3:​6 7.