Rot Bilong Stretim Hevi Em i Kamapim Hevi?

“Pasin bilong daunim na bagarapim bel bilong man i kalabus, dispela i no helpim em long redi liklik long stap wantaim ol manmeri ausait.”​—⁠WANPELA STORI LONG NIUS THE ATLANTA CONSTITUTION.

PLANTI kalabus i mekim wok long pasim man inap sotpela taim tasol. Taim kalabusman i lusim kalabus, yu ting hap taim em i bin stap kalabus i olsem pe stret long rong bilong em?a Olsem wanem long man o meri dispela kalabusman i bin mekim nogut long en, o ol famili bilong ol? Rita i krai na tok: “Mi mama bilong pikinini, em man i bin kilim em i dai.” Meri i tok olsem taim dispela man i gat asua long kilim i dai pikinini bilong em i gat 16 krismas, em i lusim kalabus bihain long 3-pela yia tasol. Em i tok moa olsem: “Plis, tingim gut dispela samting. Yu ting yu inap pilim tru tingting bilong mi?” Samting i painim Rita i soim olsem, bel hevi i stap yet, maski kot i pinis longtaim, na i no gat stori moa bilong dispela samting long nius.

Dispela hevi em i bilong olgeta manmeri long tingim, i no bilong ol manmeri tasol i bin karim hevi long sampela pasin raskol. Tingim man i laik lusim kalabus, sapos i stap bilong em long kalabus i helpim em long senisim pasin, o i mekim em i kamap man i nogut moa, dispela i bikpela samting long yumi bai stap gut o nogat.

Skul Bilong Ol Raskol

Wok bilong stap kalabus, planti taim dispela i no daunim olgeta pasin nogut bilong man. Jill Smolowe i raitim wanpela stori long nius Time na tok: “Taim ol i tromoi mani bilong wokim narapela rum kalabus, na ol i no yusim dispela mani long helpim kalabusman long kisim gutpela tingting olsem em inap mekim gutpela wok, dispela i save mekim na bihain pasin raskol bilong em bai i go bikpela moa.” Peter,b em i stap 14 yia pinis long kalabus, na em i wanbel long dispela tok. Em i tok: “Planti ol wankalabus bilong mi, pastaim ol i bin mekim sampela liklik rong, bihain ol i mekim samting i nogut moa, olsem stilim samting bilong narapela man, na taim ol i lain pinis long ol dispela pasin nogut, ol i kirap na mekim pasin i nogut tru long ol man yet.” Peter i tok moa olsem: “Long ol dispela kain man, kalabus i olsem wanpela skul. Pasin bilong ol taim ol i lusim kalabus i nogut moa, winim bipo.”

Kalabus inap pasim raskol inap sotpela taim, tasol i luk olsem wok bilong kalabus i no mekim bikpela wok tumas bilong pinisim hevi bilong pasin raskol. Sampela manki bilong ol biktaun na sampela yangpela man, ol i ting kalabus i olsem mak bilong man tru. Planti taim ol kamap olsem raskol i nogut tru. Larry i bin kalabus planti taim, em i tok: “Kalabus i no senisim liklik pasin bilong man. Taim man i lusim kalabus, ol i mekim ol wankain samting gen.”

Ating pasin bilong go i kam long kalabus i as na wanpela ripot bilong Amerika i tok, 5 pesen bilong ol man i bin kalabus bipo i gat asua long 50 pesen bilong ol pasin raskol nogut tru. Nius Time i tok: “Taim ol man i stap long kalabus i no gat gutpela samting long mekim, ol i save tromoi planti aua long tingim ol samting i kirapim ol long bel nogut moa yet long ol man. Na tu, ol i lainim planti samting nogut, . . . ol bai mekim taim ol i lusim kalabus.”

Dispela i no samting i kamap long Amerika tasol. John Vatis, em wanpela dokta bilong wanpela kalabus bilong ami long Grik, em i tok: “Ol haus kalabus bilong mipela i save lainim ol man long bihainim pasin bilong bagarapim ol narapela, pait, na mekim hatpela pasin. Taim ol i lusim kalabus, planti ol i gat tingting long ‘bekim nogut’ long olgeta manmeri.”

Pe Olgeta Man i Baim

Sampela mani bilong yu yet i save go bilong helpim hevi bilong ol haus kalabus. Long olgeta yia long Amerika i gat bikpela pe olsem 21,000 dola bilong lukautim ol wan wan kalabus. Dispela mani i kam long takis ol man i givim long gavman. Pe bilong lukautim ol kalabus i winim 60 krismas inap bikpela moa. Long planti kantri, i gat ol narapela as na ol manmeri i no save bilip tumas long wok bilong kalabus. Ol i tingting planti long ol man nogut i lusim kalabus hariap tumas, na long ol man nogut i abrusim kalabus, long wanem, loya bilong ol i painim rot bilong abrusim sampela lo em ol i gat wok long pasim ol raskol. Planti taim husat i bin karim hevi long man nogut, ol i pret long em bai mekim nogut gen long ol, na ol i pilim olsem kot i no wari long tingting bilong ol.

Ol Manmeri i Tingting Planti

Sindaun bilong ol man i kalabus i nogut tru olsem stori bilong blok i kamapim, na dispela i mekim na ol manmeri i no bilip tumas olsem kalabus bai kamapim gutpela wok. Ol man i karim hevi long pasin nogut taim ol i kalabus, em bai i hatwok long helpim ol long senisim pasin bilong ol. Na tu, sampela lain ol i tingting planti, long wanem, i gat planti man moa i kalabus, em ol man bilong ol narapela kain skin. Olsem na ol i no save, dispela i kamap nating o i makim olsem ol polis i birua long sampela lain.

Ripot bilong 1998 bilong lain Associated Press i stori long hevi bilong ol man i bin stap long kalabus long Holmesburg, Pennsylvania, long Amerika. Ol dispela man i laik kisim kompensesen, long wanem, ol i tok dokta bilong kalabus i bin wok hait na givim sampela marasin long ol bilong kisim save long marasin bai mekim wanem long man. Na tu, sampela haus kalabus long Amerika i kirapim gen pasin bilong yusim sen na pasim lek daunbilo bilong man wantaim lek bilong narapela man. Ripot bilong wanpela lain (Amnesty International) i tok: “Ol man em sen i pasim ol, ol i wok inap 10-pela o 12-pela aua long hatpela san. Ol inap malolo sotpela taim tasol bilong dring wara, na ol i ken malolo wanpela aua long belo. . . . Toilet bilong ol em wanpela baket i stap baksait long wanpela banis ol i wokim nating. Taim ol i gat wok long en, ol i pas yet wantaim narapela. Taim rot i no op bilong go long toilet, ol i mas pekpek long ples klia.” Olgeta haus kalabus i no save mekim olsem. Tasol pasin bilong daunim man olsem em i wanpela animal, dispela i bagarapim tingting bilong kalabusman na bilong ol man i mekim dispela pasin.

Wok Bilong Kalabus i Helpim Komiuniti?

Tru, bel bilong planti man i stap isi taim ol man nogut i kalabus. Tasol i gat sampela narapela as na ol man i laikim wok bilong kalabus. Taim ol i laik pasim wanpela haus kalabus long wanpela liklik taun bilong Australia, em Cooma, ol manmeri bilong dispela hap i no amamas. Bilong wanem? Long wanem, i no gat planti wok bisnis long dispela hap, na long rot bilong dispela haus kalabus sampela man inap kisim wok mani.

Long nau sampela gavman i larim ol bisnisman i baim ol haus kalabus na bai gavman i no ken tromoi planti mani long lukautim. Tasol sori tru, planti kalabusman na ol man i stap kalabus longpela taim, dispela i save helpim bisnis. Olsem na stretpela kot inap paul long ol samting long sait bilong wok bisnis.

Tasol dispela bikpela askim i stap yet: Yu ting wok bilong ol haus kalabus i helpim man nogut long senisim pasin bilong em? Planti man i tok nogat, tasol ating yu bai kirap nogut long kisim save olsem sampela ol kalabus i bin kisim helpim long senisim pasin bilong ol. Nau yumi ken skelim olsem wanem dispela inap kamap.

[Ol Futnot]

[Blok/Piksa long pes 6, 7]

Insait Long Haus Kalabus

OL MAN I PAS PAS: Ol haus kalabus long Briten i gat bikpela hevi long ol man i pas pas insait long ol. Long olgeta wan handet tausen wan handet tausen man long Briten, i gat 125 kalabusman. Ol i bin wokim nambawan bikpela haus kalabus long São Paulo, Brasil bilong 500 man i ken stap long en. Tasol 6,000 ol i stap. Long Rasia, ol i wokim sampela sel bilong 28 man i ken stap long en, tasol i gat 90 i go inap 110 ol man i stap. Em hevi i bikpela tru, olsem na ol kalabus i mas senis senis long slip. Long wanpela kantri long Esia, i gat 13 o 14 man ol i pas pas insait long sel i liklik tru olsem 3-pela skwe mita tasol. Na long Westen Australia, ol i hatwok long painim spes bilong putim ol kalabus, olsem na ol i wokim sampela sel long ol kontena bilong sip.

PAIT: Nius Der Spiegel bilong Jemani i tok sampela man nogut i kalabus long Jemani, ol i kilim i dai o givim pen long sampela wankalabus, long wanem, ol i “jeles na laik pulim wok bisnis bilong ol​—⁠em ol i brukim lo na maketim bia samting, ol drak, pasin pamuk, na kisim win mani bilong dinau man i bekim.” Planti taim pasin bilong birua long ol narapela lain i save kirapim pait. Nius Der Spiegel i tok: “Ol man i stap long kalabus i kam long 72 narapela narapela kantri. Olsem na i no gat samting em inap pasim bel nogut na kros pait.” Nius Financial Times bilong London i stori olsem sampela hetman bilong wanpela kalabus long Saut Amerika i tok 12-pela em averes bilong hamas man i dai long han bilong ol wankalabus long olgeta mun. Ol kalabus i tok namba tru i dabol long dispela.

PASIN SEM: Wanpela stori long “Hevi Bilong Pasin Reip Insait Long Ol Haus Kalabus,” i stap long nius The New York Times, na stori i tok olsem long Amerika, ol man i no save long namba stret tasol ol i ting “long olgeta yia i winim 290,000 man i karim hevi long ol wankalabus i mekim pasin sem long ol.” Stori i tok moa olsem: “Dispela pasin nogut i no kamap long man wanpela taim tasol, planti taim em hevi i kamap long em long olgeta de.” Wanpela lain i stori long ol kalabus bilong Amerika, na tok olsem, long olgeta de i gat 60,000 i kisim hevi long narapela i mekim pasin sem long ol.

HELT NA STAP KLIN: Planti man i save olsem sik bilong pamuk i bikpela long ol haus kalabus. Nius i kamap long olgeta hap i stori long sik TB bilong ol kalabusman bilong Rasia na sampela kantri long Afrika. Na nius i stori tu olsem ol man i no save lukautim ol kalabusman na helpim ol long lukim dokta, o stap klin, o kisim gutpela kaikai.

[Piksa]

Ol man i pas pas long wanpela haus kalabus long São Paulo, Brasil

[Kredit Lain]

AP Photo/Dario Lopez-Mills

[Piksa long pes 4, 5]

Strongpela haus kalabus long La Santé, Paris, Frans

[Kredit Lain]

AP Photo/Francois Mori

[Piksa long pes 6]

Ol meri long haus kalabus long Managua, Nikaragua

[Kredit Lain]

AP Photo/Javier Galeano