Hevi Tru Bilong Ol Haus Kalabus

“Wok bilong kamapim sampela haus kalabus moa bilong stretim hevi long pasin raskol i kain olsem tingting bilong wokim sampela matmat moa long stretim hevi bilong wanpela sik nogut.”​—⁠ROBERT GANGI, SAVEMAN BILONG LUKAUTIM OL WOK BILONG KALABUS.

LONG nau pasin bilong kamapim tok i no bagarapim bel bilong man i bikpela, tasol planti taim dispela pasin i save haitim hevi i stap tru tru. Olsem long planti kantri ol man i yusim ol tok i helpim bel bilong man i stap isi na i olsem senis bilong dispela tok “kalabus.” Ol i save tok “ples bilong stretim man,” we man inap “lainim sampela wok” na kisim “helpim bilong sindaun gut.” Na tu, ol i no laik yusim dispela tok “kalabusman.” Tasol taim yu skelim gut wok bilong ol haus kalabus, yu bai luksave olsem ol haus kalabus i gat planti hevi long nau, olsem pe bilong holim man long kalabus i go antap tru. Na samting i kamap tru tru long wok bilong kalabusim man i narapela olgeta long ol gutpela wok ol i laik bai kalabus i kamapim.

Sampela manmeri i tok pasin bilong kalabusim man i no wok gut. Ol i luksave olsem maski namba bilong olgeta man long graun i stap kalabus i go bikpela tru winim 8 milion, dispela i no mekim bikpela samting bilong daunim pasin raskol. Na maski bikpela lain i kalabus, long wanem, ol i brukim lo na kisim o salim ol drak, dispela wok bilong maketim ol drak i stap yet olsem bikpela hevi.

Tasol planti pipel i ting wok bilong kalabusim ol man em i namba wan rot bilong strafim ol. Ol i ting taim man i mekim rong i go kalabus, em i kisim stretpela strafe. Wanpela niusman i stori long dispela bikpela laik bilong kalabusim man na tok ol man i tingting long “lokim ol tasol.”

I gat 4-pela as bilong kalabusim man: (1) strafim man i brukim lo, (2) lukautim ol manmeri, (3) pasim man long mekim gen sampela rong, na (4) senisim pasin bilong man nogut, na lainim em long bihainim ol lo na mekim gutpela wok taim en i lusim kalabus. Nau bai yumi skelim, ol haus kalabus i mekim gut ol dispela wok o nogat.