“Yupela i Senisim Tingting Bilong Mi Long Ol Witnes Bilong Jehova”
WANPELA ofisa bilong haus kalabus long Polan i bin mekim dispela tok taim em i lukim wanpela stori long wok bilong ol Witnes Bilong Jehova, olsem i stap long Wastaua bilong Oktoba 15, 1998. Het-tok bilong dispela stori, “Bel i Strong Olsem Ston Tasol Ol i Laik Harim Tok,” em i stori long gutpela wok ol Witnes Bilong Jehova i mekim bilong helpim ol kalabusman long Vowuf, Polan.
Taim ol i laik kamapim dispela nius Wastaua long ol man, ol i stretim rot bilong mekim wanpela miting long Septemba 13, 1998, long Vowuf haus kalabus bilong tilim dispela nius long ol kalabusman. Ol i singautim ol Witnes bilong dispela ples, na ol kalabusman i baptais pinis na ol kalabusman i gat laik long harim tok, na sampela ofisa bilong haus kalabus. Ol stori i stap daunbilo em sampela tok ol man i bin kam long dispela bung ol i bin mekim.
Jerzy, em wanpela Witnes Bilong Jehova i bin baptais long haus kalabus long 5-pela yia samting i go pinis, na em i tok: “Mi amamas tru, long wanem, long nau mi inap kaunim stori bilong bikpela hatwok ol brata bilong ol kongrigesen i stap klostu i bin mekim bilong helpim mipela.” Em i tok moa: “Mi wok strong yet long kamap gutpela moa, na mi inap lukim ol samting Jehova i mekim bilong stretim mi.”
Narapela kalabusman, nem bilong em Zdzisław, em i tingim wok bilong autim tok long haus kalabus na i tok: “Long nau 4-pela kalabusman i redi long kisim baptais, na ol nupela man i gat laik long harim tok ol i save kam long ol miting long ples miting bilong mipela. Dispela stori i kirapim strong mipela long mekim moa yet wok autim tok long dispela teritori.” Maski Zdzisław i gat 19 yia moa bilong i stap long kalabus, dispela tok em i mekim i kamapim klia em i gat stretpela tingting na em i no les!
Wanpela ofisa bilong haus kalabus i kaunim pinis dispela stori bilong haus kalabus long Vowuf, na em i tok: “Ol i bin litimapim nem bilong mipela. Ol samting i kamap long dispela haus kalabus, mi no bin ting olsem ol bai kamapim gutpela stori bilong en long wanpela nius i save kamap long 130 tok ples. Mi laikim yupela, na mi laik tok tenkyu long hatwok yupela i mekim bilong helpim ol kalabusman.” Narapela ofisa i tok tu olsem: “Yupela i senisim tingting bilong mi long ol Witnes Bilong Jehova. Long bipo, mi bin tingim yupela i olsem wanpela lain i strong tumas long bihainim lotu. Nau mi save olsem yupela i lain bilong bihainim ol lo.”
Marek Gajos, em dairekta bilong Vowuf haus kalabus, em i lap liklik na i tok: “Pastaim mipela i ting olsem yupela i no inap kamapim gutpela samting long dispela wok bilong yupela. Mipela i bin ting olsem yupela i wankain tasol olsem ol narapela lotu em ol i gat laik long helpim ol kalabusman long Baibel. Tasol taim mipela i lukim ol samting i kamap long wok yupela i mekim, mipela i tingting long wok gut wantaim yupela. Inap 9-pela yia pinis yupela i no bin les long kam long hia, na mi amamas tru long ol samting yupela i bin mekim inap long nau.”
Na olgeta lain i stap long Vowuf haus kalabus i pilim olsem wanem taim ol i lukim dispela stori? Planti kalabusman i laikim tru dispela stori, na olgeta nius bilong ol Witnes long haus kalabus i pinis. Ol ofisa bilong haus kalabus i laikim tru dispela stori na ol i singaut long kisim 40 nius moa bilong ol yet. Planti man moa ol i laik kisim dispela nius, olsem na ol kongrigesen long dispela hap i helpim na givim 100 nius moa long ol brata long haus kalabus. Long dispela taim, namba bilong ol man i kam long miting tu i go antap.
Piotr Choduń, em wanpela ofisa i bin wok gut wantaim ol Witnes Bilong Jehova, em i tok: “Mipela i putim ol dispela stori long ples klia long haus kalabus bilong mipela. Mipela i ting olsem ol kalabusman em ol i no stadi yet wantaim yupela long Baibel ol bai kaunim dispela nius.”
Gutpela pasin bilong ol Witnes na pasin bilong ol long wok strong long autim tok i wok long kamapim gutpela samting. I gat 15 kalabusman i kamap strong na ol i winim mak bilong kisim baptais, na tupela ofisa bilong haus kalabus i bin dediket long Jehova, na wanpela ofisa i tok long stadi long Baibel. Tru tumas, ol brata i bin autim tok long Vowuf haus kalabus ol i givim biknem long God Jehova long ol dispela samting i bin kamap.—Skelim wantaim 1 Korin 3:6, 7.
[Piksa long pes 28]
Tripela Witnes na wanpela kalabusman long taim bilong kamapim “Wastaua” long rum bilong mekim bung long haus kalabus