Pasin Bilong Volantia i Save Kamapim Ol Blesing
1 Taim Goliat i tok bilas long ol ami bilong Israel, ol soldia inap volantia long pait wantaim em, tasol i no gat wanpela i mekim olsem. Man i volantia, em wanpela yangpela wasman bilong sipsip i no bin skul long pait. (1 Sml. 17:32) Taim ol Juda i lusim kalabus na go bek long Jerusalem na ol i no wokim gen banis, wanpela man i gat wok long bringim wain i go long king bilong Persia em i volantia long lusim dispela gutpela wok long haus bilong king na go long Jerusalem bilong stretim wok bilong wokim gen banis. (Neh. 2:5) Jehova i tingim pasin bilong Devit na Nehemia long volantia long mekim wok na em i givim blesing long tupela.—1 Sml. 17:45, 50; Neh. 6:15, 16.
2 Nau long dispela graun yumi no lukim planti man i volantia long mekim wok. Long dispela “taim bilong las de,” ol man i save bisi tru, na planti man i “laikim ol yet tasol.” (2 Ti. 3:1, 2) Taim man i tingting oltaim long ol samting bilong em yet tasol, em i no luksave long ol samting em i ken volantia long mekim bilong helpim ol narapela. Tasol yumi ol Kristen i laik volantia long mekim wok, long wanem, yumi laik bihainim pasin bilong Jisas, em i save go pas long mekim wok bilong helpim ol narapela. (Jo. 5:5-9; 13:12-15; 1 Pi. 2:21) Olsem wanem yumi ken kamapim pasin bilong volantia? Wanem ol blesing bai yumi kisim long mekim olsem?
3 Bilong Helpim Ol Brata Bilong Yumi: Yumi givim wanpela ‘presen bilong spirit’ long ol arapela taim yumi volantia long bekim tok long ol hap bilong miting i gat ol askim long en. (Ro. 1:11) Pasin bilong bekim tok i save givim biknem long Jehova, na tok i tru i pas strong moa long tingting na bel bilong yumi, na yumi amamas moa long ol miting. (Sng. 26:12) Yumi ken volantia tu long mekim tok long Skul Tiokratik Bilong Autim Tok long taim wanpela ol i makim bilong mekim tok i no inap mekim. Dispela bai helpim pasin bilong yumi long mekim wok tisa i kamap gutpela moa.
4 Ol brata inap kamapim pasin bilong volantia taim ol i tingting long kisim wok insait long kongrigesen. (Ais. 32:2; 1 Ti. 3:1) Olgeta i ken helpim ol kibung long ron gut long rot bilong volantia long helpim wok bilong wanpela dipatmen. Taim yumi volantia long wok wantaim wasman raun long autim tok o long givim kaikai long em, dispela i save “strongim bel bilong yumi” na i strongim bel bilong em tu. (Ro. 1:12) Taim yumi helpim ol pikinini i no gat papa, ol meri em man bilong ol i dai pinis, ol lain i gat sik o skin bilong ol i no strong, ol mama i gat ol yangpela pikinini, na ol arapela long kongrigesen, yumi kisim amamas na Jehova i orait long yumi.—Snd. 19:17; Ap. 20:35.
5 Narapela samting, yumi ken volantia long givim taim na strong bilong yumi long helpim wok bilong klinim na lukautim Haus Kingdom. Sampela taim i mas i gat ol volantia bilong helpim wok bilong sanapim o stretim ol Haus Kingdom. Long wanpela kantri, tupela marit i volantia long helpim wok bilong Komiti Bilong Wokim Ol Haus Kingdom, maski tupela i no gat save long wokim haus. Ol i lain long mekim dispela wok na nau ol i save helpim wok long putim ol brik. Meri i tok: “Mipela i wok wantaim ol arapela, na dispela i helpim mipela long kisim planti gutpela pren. Long pinis bilong de, skin bilong mipela i les tru, tasol long ol samting bilong spirit mipela i kisim nupela strong.” Olsem wanem? Yumi tu inap volantia na helpim wok bilong sanapim wanpela Haus Kingdom long hap bilong yumi?
6 Autim Tok: Nambawan bikpela wok volantia yumi ken mekim long nau, em wok bilong autim tok bilong Kingdom. Taim yumi helpim ol man long kliagut na bihainim ol tok bilong Baibel, orait nau i stap bilong ol i gat as bilong en, na ol i kisim strong long lusim ol pasin i save bagarapim man. Ol i kisim save long ol gutpela samting Baibel i tok bai kamap bihain. Taim yumi lainim ol man long ol tok bilong Baibel, yumi mekim wanpela gutpela wok volantia bilong helpim ol inap olgeta taim bihain. (Jo. 17:3; 1 Ti. 4:16) Sapos yumi gat rot, ating yumi inap mekim wok painia haptaim o painia oltaim, o go sindaun long wanpela hap long dispela kantri we i no gat planti pablisa, o lain long narapela tok ples.
7 King Devit i tok profet olsem long taim Mesaia i kirap mekim wok king, ol lain bilong God bai “amamas” long mekim wok. (Sng. 110:3, NW ) Jehova i wok long hariapim wok bilong bungim ol kaikai bilong gaden, olsem na i gat planti samting yumi ken volantia long mekim. (Ais. 60:22) Olsem wanem? Yu bin mekim dispela tok: “Salim mi”? (Ais. 6:8) Tru tumas, long rot bilong volantia, yumi mekim Jehova i belgut tru na yumi kisim planti gutpela blesing.
[Askim Bilong Stadi]
1. Olsem wanem Devit na Nehemia i kamapim pasin bilong volantia long mekim wok?
2. I gat wanem as na yumi ol Kristen i mas i gat laik long volantia long mekim wok?
3. Olsem wanem pasin bilong volantia inap helpim ol miting bilong kongrigesen?
4. Wanem sampela samting moa yumi ken mekim bilong kamapim pasin bilong volantia?
5. Wanem sampela wok bilong Haus Kingdom yumi ken volantia long mekim?
6. Bilong wanem wok autim tok i nambawan bikpela wok yumi ken volantia long mekim?
7. Long nau, bilong wanem pasin bilong volantia i bikpela samting tru?