Sampela Tok i Kam Long Olgeta Hap
Ol i Kilim i Dai Yet Ol Man
Wanpela nius JAMA (Journal of the American Medical Association) i tok, ol i ting long Namba Wan Pait, long olgeta wan handet wan handet man i bin dai long pait, 19 manmeri bilong ples i dai. Tasol long taim bilong Namba 2 Pait, long olgeta wan handet wan handet man i dai, 50 man bilong ples i dai. Bihain long Namba 2 Pait i kam inap long nau inap olsem 150 bikpela pait i bin kamap long olgeta hap. Dispela nius i tok moa: ‘Ol i ting long ol dispela 150 pait, 20 milion manmeri i dai na 60 milion i kisim birua, na 80 pesen bilong ol dispela manmeri i no soldia, ol i man bilong ples, na planti bilong ol i pikinini. Long 10-pela yia i go pinis, ol i ting wan milion 500 tausen pikinini i bin dai na winim 4 milion i kisim bagarap long ol bikpela pait.’
Spot na Skin
Ol saveman i tok, sapos yumi subim skin long mekim wanpela samting i winim strong bilong skin, dispela inap kamapim sik. Wanpela nius (The European) i tok: ‘Ol saientis bilong marasin i kisim save olsem, ol hapman bilong spot i winim ol narapela man long kisim sik kus, na nek i pen, na ol sua. Wanpela nius (Süddeutsche Zeitung) i kamapim tok bilong wanpela dokta (Klaus Braumann) taim em i bin givim sampela askim long ol man i insait long tim Olimpik bilong Jemani. Em i bin toktok wantaim 481 man i save gut long pilai, na em i tok, planti taim ol i save kisim ol liklik sua long maus, winim ol narapela man i save kisim wankain sua. Ol saveman i ting long olgeta wan handet wan handet man long Jemani, 10-pela i save kisim ol dispela liklik sua long maus wan wan taim. Tasol long ol man bilong spot, 50 i save kisim. Narapela dokta (Heinz Liesen) i tok, ‘taim man i mekim wanpela wok o pilai spot, na dispela i winim strong bilong skin, orait, skin i no gat strong long pasim ol sik.’
Ol Pusi na Ol Pisin
Ol saveman i skelim pasin bilong ol pusi em ol man i save lukautim ol, na ol i ting, long Wiskonsin long Amerika, ol pusi i kilim 19 milion pisin long olgeta yia. Long Briten ol saveman i tok, 5 milion pusi em ol man i save lukautim ol, ol i save kilim 20 milion pisin long olgeta yia. Long Ostrelia long ples Serbruk ol bikman bilong ples i putim lo, olsem ol man long dispela ples i no ken larim pusi o dok i raun long nait. Sapos ol i no bihainim dispela tambu, ol i mas baim kot long 100 kina. Ol i putim dispela lo, long wanem, ol animal i save kilim ol pisin, em ol pisin i no gat planti bilong ol i stap. Long Amerika i gat 35,000 nupela pusi i kamap long olgeta de. Wanpela nius (National Wildlife) i tok, taim ol i skelim dispela hevi long Wiskonsin ol i kisim save olsem, long ol wan handet wan handet man ol i gat pusi, 94 i laik bai ol pisin bilong singsing i raun long hap graun bilong ol, na 83 i laik bai ol pisin bilong kaikai i raun long hap graun bilong ol, tasol 42 tasol i laik daunim namba bilong ol pusi na ol dispela pisin bilong bus i no ken bagarap.
Bikpela Sik na Indai
Long olgeta hap 50 milion manmeri i save dai long olgeta yia. Wanpela lain ol i kolim WHO (World Health Organization) i tok, long dispela 50 milion manmeri i dai, 46 milion 500 tausen i bin kisim bikpela sik na dai. Long olgeta yia 17 milion 500 tausen manmeri i dai long ol binatang nogut i pulap long bel o long ol sik i save kalap kalap long narapela man. Sik long klok na ol rop bilong blut i save kilim i dai 12 milion manmeri, na sik kensa i save kilim i dai 5 milion manmeri. Bikman Hiroshi Nakajima bilong lain WHO i tok: ‘Sapos olgeta man inap kisim marasin na sut, na gavman i wokim gut etpos samting, na skulim ol long wanem wanem samting ol i mas mekim bilong helpim skin, ating 20 milion manmeri i no inap i dai long olgeta yia.’
Planti Kaikai Tasol Planti Man i Hangre
Wanpela bung i bin kamap long Jeniva long Swiselan na long dispela bung tupela lain bilong Yunaitet Nesen i tok, ol bai wok wantaim ol narapela man long mekim bikpela wok bilong helpim olgeta man i sot long kaikai. Dispela wok bai winim ol narapela wok ol man i bin mekim bipo. Wanpela nius (Le Monde) bilong Paris i tok, dispela tupela lain bilong Yunaitet Nesen (Food and Agriculture na World Health) i tok, ol bai mekim sampela samting bilong pinisim dispela hevi long planti man i hangre. Dispela graun i save kamapim kaikai inap long olgeta manmeri, tasol pasin bilong tilim kaikai i no stret—sampela man i save kisim kaikai na sampela nogat. Long Afrika long olgeta de 40 milion i save hangre. Na 192 milion pikinini i sot long kaikai na 40,000 bilong ol i save dai long olgeta de.
Buai na Sik Kensa
Wanpela nius (Post-Courier) bilong Papua Niugini i bin kamapim wanpela askim long buai olsem: “Gutpela yumi kaikai o yumi no kaikai?” Wanpela bikpela dokta (Barrie Milroy) bilong katim ol man i tok: ‘I gat tupela bikpela sik long Papua Niugini—malaria na sik kensa long maus. Sik kensa long maus i save kamap, long wanem, ol i kaikai buai.’ Planti pikinini tu i save kaikai buai. Dokta Milroy i tok moa: “Sapos wanpela man i kaikai buai, yumi no ken askim olsem: ‘Em bai kisim sik kensa o nogat?’ Yumi mas askim olsem: ‘Wanem taim em bai kisim sik kensa?’ Sapos ol man i no lusim tru pasin bilong kaikai buai, i no gat planti samting ol dokta inap mekim bilong helpim ol.”
Ol i No Tingim Ol Lapun
Long Esia i gat planti lapun, na namba bilong ol i wok long go antap. Long Japan i gat 15 milion 500 tausen lapun i gat 65 krismas o winim 65 krismas. Sampela i tok inap 30 yia bihain dispela namba bai go antap moa inap long 32 milion. Wanpela nius (Asiaweek) i tok, long yia 2020 long olgeta 4-pela 4-pela Japan, wanpela bai stap lapun. Na dispela nius i tok moa: ‘Long Singapo long olgeta wan handet wan handet man, winim 9-pela i gat 60 krismas. Na long yia 2000 inap wan milion 500 tausen manmeri long Malesia bai winim mak bilong lapun.’ I gat planti lapun, tasol tarangu, nau planti man i no givim bel na lukautim ol na ol i no save daun long ol lapun olsem ol i bin mekim bipo. Henry Lim long Singapo i save mekim sampela tok bilong helpim ol lapun, na em i tok: ‘Planti man long nau i no tingim ol lapun. Ol yangpela i tromoi bikpela hap taim long lukautim dok bilong ol na liklik hap taim tasol long lukautim lapun papamama.’
Pret Long Ol Sikman
Wanpela nius (The New York Times) i tok, planti dokta na ol man i lukautim ol sikman i pret long kisim sik long sikman. Planti dokta i pret long kisim sik AIDS o hepataitas taim ol i wok long stretim sik bilong wanpela sikman i gat dispela sik. Ol i pret, nogut ol i mekim wok long nil bilong sut o wanpela tul bilong dokta na ol i popaia na skrapim skin bilong ol na ol bai kisim dispela sik. Na ol i no pret nating. Ol man i skelim dispela samting long wanpela haus sik long Nu Yok, i kisim save olsem 60 pesen bilong ol dokta i lukautim ol man i gat sik TB, ol tu i bin kisim sik TB. Na olgeta yia 12,000 manmeri i wok long ol etpos o klinik samting i kisim sik hepataitas long ol man i gat dispela sik. Kirap long taim sik AIDS i kamap nupela long Amerika, 47 manmeri i wok long ol klinik samting ol i bin kisim sik AIDS long sikman.
Wanpela Bisnis
Long Ajentina ol man i tingting planti, long wanem, sampela lotu i wokim ofa long animal o long man. Wanpela nius (Clarín) i tok, i gat 5,000 narapela narapela kain lotu long Ajentina na ol i save mekim sampela samting bilong ol spirit nogut na lotuim Satan. Planti bilong ol dispela lotu i save mekim wok long ol piksa olsem imis. Long planti stua long biktaun Buenos Ares i gat ol piksa bilong Jisas na ol “santu” bilong lotu Katolik na ol piksa bilong ol spirit nogut tu. Wanpela piksa planti man i laikim em piksa bilong Satan na em i gat nem olsem: ‘Lusifa—Nambawan Kepten na god i winim olgeta narapela god nogut.’ Dispela nius i tok, ol kampani i save wokim ol dispela piksa nogut, olsem ol piksa bilong Satan samting, ol i save wokim ol piksa bilong lotu Katolik tu. Papa bilong wanpela stua i tok, bisnis bilong em i wok gut, long wanem, em i salim ol piksa bilong lotu Katolik na ol piksa bilong Satan.
Pasin Bilong Narapela i Lainim Ol
Wanpela nius (Le Figaro) bilong Paris i tok, ‘Sapos papamama i smok, ating ol pikinini bai bihainim pasin bilong ol.’ Ol saveman i skelim 10,000 yangpela bilong Frans em ol i gat 11-pela krismas i go inap 18 krismas, na long olgeta wan handet wan handet, 4-pela i save smok wanpela taim samting long olgeta de; na 50 yangpela i gat papa i save smok; na 72 yangpela i gat bikpela laik long lusim pasin bilong smok oltaim.
Planti Man i Gat Sik Sotwin i Dai
Wanpela nius (Süddeutsche Zeitung) i tok, ‘Namba bilong ol man i gat sik sotwin long Jemani na ol i dai long dispela sik i go antap. Wanpela lain (German Respiratory Tract League) i tok, long 1991, winim 5,000 manmeri long Jemani i dai long sik sotwin. Long 1975 samting, 2,000 manmeri i dai long sik sotwin long olgeta yia. Long Jemani i gat 20 milion manmeri i save sik, long wanem, skin bilong ol i no laikim wanpela samting. Long 3-pela 3-pela bilong ol dispela 20 milion manmeri, wanpela i save kisim sik sotwin, long wanem, skin i no laikim wanpela samting.