Bilong Wanem i Gat Pen na Hevi?

“PAPA GOD, BILONG WANEM?” Dispela het-tok i stap long namba wan pes bilong wanpela niuspepa bihain long wanpela guria i bagarapim planti samting long Esia Maina. Piksa bilong niuspepa i soim wanpela tarangu papa i karim pikinini meri i gat sampela bagarap i kam ausait long haus bilong ol i pundaun pinis.

Pait, bikpela hangre, bikpela sik, na ol bikpela win na guria samting i bagarapim tru bel bilong planti manmeri, na i kamapim planti tumas aiwara, na indai. Na tu, i gat ol bel hevi bilong ol lain em wanpela i bin reipim ol, o mekim nogut long ol taim ol i liklik, o mekim sampela narapela pasin nogut long ol. Tingim tu bikpela lain manmeri i kisim bagarap o indai taim ka i bam long rot samting. Na tu, planti bilion pipel i karim hevi, long wanem, ol i sik, lapun, o wanpela long famili i dai.

Insait long 100 yia i go pinis, ol hevi i bikpela moa winim long bipo. Namba Wan Pait long 1914 i go 1918, i kilim i dai klostu 10 milion soldia. Sampela saveman i tok namba bilong ol narapela man i dai long dispela pait i wankain. Long Namba Tu Pait, klostu 50 milion i dai​—⁠em ol soldia, ol manmeri i no insait long ami, na ol lain i no inap lukautim ol yet, olsem ol meri , ol pikinini, na ol lapun man. Na planti milion moa i kisim bagarap insait long dispela 100 yia i go pinis, long ol pait bilong pinisim wanpela lain, pait bilong daunim gavman, pasin birua namel long tupela lain, hangre, na pasin bilong stap rabis tru. Wanpela buk (Historical Atlas of the Twentieth Century) i tok, ol kain hevi olsem i mekim na winim 180 milion pipel i dai long ol “bikpela hevi nogut.”

Bikpela sik kus bilong Spen long 1918 i go 1919 i bin kilim i dai 20 milion pipel. Insait long laspela 20 yia, klostu 19 milion i dai long sik AIDS, na long nau binatang jem i kamapim dispela sik i stap pinis long skin bilong 35 milion pipel. Dispela sik i mekim na papamama bilong planti milion pikinini i dai pinis. Na planti bebi bai dai long sik AIDS ol i bin kisim taim ol i stap yet long bel bilong mama.

Ol pikinini i wok long kisim ol bikpela pen na hevi long ol narapela samting tu. Long pinis bilong 1995, wanpela nius bilong Inglan (Manchester Guardian Weekly) i stori long sampela tok bilong Yunaitet Nesen olsem: “Pait insait long 10-pela yia i go pinis i mekim na 2 milion pikinini i dai, na 4 o 5 milion samting i kisim sampela bagarap long skin, 12 milion i slip long rot, na winim wan milion i no gat papamama o ol i no inap painim ol, na 10 milion i gat sampela bagarap bilong tingting.” Na tu, pasin bilong rausim bel i kilim i dai 40 i go inap 50 milion bebi long olgeta yia!

Wanem Samting Bai Kamap Bihain?

Planti manmeri i ting samting nogut tru bai kamap bihain. Wanpela lain saientis i tok: “Ol samting ol manmeri i mekim . . . inap kamapim bikpela senis long dispela graun na graun bai i no inap helpim ol manmeri long stap laip olsem bipo.” Ol i tok moa: “Long nau, wanpela bilong olgeta 5-pela 5-pela manmeri bilong dispela graun i stap rabis tru, na ol i no gat inap kaikai, na wanpela bilong ol 10-pela 10-pela man i bagarap tru, long wanem, ol i no kisim kaikai i save strongim bodi.” Taim ol i kamapim dispela tok, ol i laik “tokaut long olgeta manmeri long ol samting i laik kamap bihain” na ol i tok: “Sapos yumi laik helpim ol manmeri long abrusim planti hevi na abrusim pasin bilong bagarapim graun olgeta, i mas i gat bikpela senis long ol samting yumi mekim bilong lukautim graun na ol manmeri i stap long en.”

Bilong wanem God i larim planti pen na pasin nogut i stap? Em bai mekim wanem bilong stretim ol dispela hevi? Na em bai mekim long wanem taim?

[Ol Piksa Kredit Lain long pes 3]

Top, wheelchair: UN/DPI Photo 186410C by P.S. Sudhakaran; middle, starving children: WHO/OXFAM; bottom, emaciated man: FAO photo/B. Imevbore