Namba 1 Hap
Tru God i Save Tingim Yumi?
1, 2. Sampela man i gat wanem askim long God? I gat wanem as na ol i askim olsem?
ATING wanpela taim yu bin tingting olsem: ‘Sapos tru God i stap na em i save tingim yumi, orait bilong wanem em i larim bikpela pen na hevi i stap?’ Yumi olgeta i bin karim hevi long sampela taim, o yumi save long wanpela man i gat hevi.
2 Tru tumas, long bipo yet na i kam inap long nau ol man i bin karim pen na hevi, long wanem, i gat ol bikpela pait, na hatpela pasin, na pasin raskol, na pasin i no stret, o ol i stap rabis, o i gat sik, o wanpela man o meri ol i laikim tumas, em i dai. Long taim bilong yumi ol bikpela pait i bin kilim i dai 100 milion samting manmeri, na planti handet milion moa i bin kisim bagarap o haus samting bilong ol i bagarap. Planti samting nogut tru i bin kamap na i bagarapim tru bel bilong planti man na aiwara i kam daun na ol i pilim olsem i no gat gutpela samting inap kamap.
3, 4. Planti ol i ting olsem wanem long God i larim pen na hevi i stap?
3 Sampela i bel nogut na ting olsem, sapos God i stap em i no save tingim yumi. O ol i ting i no gat God. Olsem: Wanpela man i bin karim bikpela hevi long Namba Wan Pait—ol man i birua long lain bilong em na kilim i dai planti famili na pren bilong em—na dispela man i tok: “God i stap we taim dispela hevi i painim mipela?” Na wanpela man i bin abrusim bagarap taim ol Natsi i bagarapim planti milion man long Namba 2 Pait, em i bel hevi tru long bikpela pen na hevi em i bin lukim ol man i karim na em i tok, dispela i olsem marasin nogut i pulap long bel bilong em.
4 Olsem na planti man i no inap save olsem wanem wanpela gutpela God inap larim ol samting nogut i kamap. Na dispela i kirapim ol long ting olsem, God i no save tingim yumi, o i no gat God. Na planti ol i ting, ol hevi i no inap pinis.
Ol tok bilong Baibel long dispela liklik buk, ol i bin kisim long Baibel Pisin.
[Piksa long pes 2, 3]
Nupela taim i no gat hevi, i klostu o nogat?