Wastaua INTENET LAIBRERI
Wastaua
INTENET LAIBRERI
Tok Pisin
  • BAIBEL
  • Ol PABLIKESEN
  • Ol MITING
  • g91 4/8 p. 3-5
  • Ol Askim i Mas i Gat Bekim

No gat vidio bilong dispela seksen.

Sori, popaia kamap long lodim vidio.

  • Ol Askim i Mas i Gat Bekim
  • Kirap!—1991
  • Ol Liklik Het Tok
  • Wankain Infomesen
  • Ol Samting Ol Man i Bin Mekim
  • Tingim Skin Bilong Yumi
  • Bekim Bilong Sampela Man
  • Painim Ol Stretpela Bekim
  • Tru God i Save Tingim Yumi?
    Tru God i Save Tingim Yumi?
  • Olgeta Pen na Hevi Klostu Bai Pinis!
    Olgeta Pen na Hevi Klostu Bai Pinis!
  • Askim 3: Bilong Wanem God i Larim Mi Karim Pen na Hevi?
    Wastaua i Tokaut Long Kingdom Bilong Jehova—2012
  • Pasin Bilong Karim Pen na Hevi Inap Helpim Yumi
    Wastaua i Tokaut Long Kingdom Bilong Jehova—2007
Lukim Moa
Kirap!—1991
g91 4/8 p. 3-5

Ol Askim i Mas i Gat Bekim

ATING long wanpela taim yu yet i gat dispela askim: ‘Sapos God i stap, bilong wanem em i larim ol man i karim pen na hevi? Na bilong wanem em i larim dispela pasin i stap longtaim tru? Olsem wanem? Bai hevi na pen i pinis?’

Planti i no save long bekim bilong ol dispela askim na ol i bel hevi tru. Planti ol i no bilip moa long God, o ol i tok God i as bilong olgeta hevi i painim ol.

Wanpela man ol lain Natsi long Jemani i mekim nogut tru long em long Namba 2 Bikpela Pait em i tok: “Bel bilong mi i nogut tru long dispela lain.” Na narapela man i lukim ol pren na famili bilong em i dai long Namba Wan Bikpela Pait, long wanem ol i bilong narapela skin na ol i kisim birua long dispela; em i tok: “God i stap we taim hevi i painim mipela?”

Olsem na planti man i tingting planti. Long tingting bilong ol i no stret wanpela God bilong sori na stretpela pasin inap larim ol pasin nogut i stap longpela taim tru i kam inap long nau.

Ol Samting Ol Man i Bin Mekim

Ol man i bin mekim ol kain kain pasin nogut tru long ol narapela man long bipo na i kam inap nau​—olsem planti tausen yia pinis. Bai yumi kirap nogut tru sapos yumi skelim olgeta dispela pasin nogut ol i bin mekim long ol man.

Taim ol lain bilong graun i wok long kamap bikpela na save bilong ol tu i kamap bikpela, ol man i kirap wokim ol kain kain samting bilong bagarapim ol man: ol i wokim ol traipela traipela gan, na ol masin-gan, na ol balus bilong pait, na ol ka bilong pait i gat ol masin-gan long en, na ol bom nuklia, na ol i wokim ol kain kain narapela samting bilong mekim pait. Olsem na long taim bilong yumi long nau, inap olsem 100 milion manmeri i dai long ol narapela narapela pait bilong graun. Planti milion i kisim bikpela bagarap long skin, o ol i kisim bikpela pen na hevi long dispela rot. Na ol haus na ol narapela samting bilong ol man i bagarap tu, em yumi no inap kaunim.

Tingim ol manmeri i kisim bikpela pen na hevi long rot bilong ol dispela pait. Planti taim ol man nating i kisim ol dispela hevi, olsem ol lapun man, na lapun meri, na ol pikinini. Na planti taim ol man i kamapim ol dispela hevi ol i no kisim strafe.

Long olgeta hap bilong graun long nau ol man i wok long kisim pen na hevi. Long olgeta de, ol man i kilim narapela i dai, o ol i painim birua long rot bilong ol raskol samting. Na ol man i kisim bagarap long kain kain rot olsem long strongpela win, o tait wara, o guria samting. Na ol man i kisim hevi long rong narapela i mekim, o ol i kisim hevi long wanem sampela lain i daunim ol, o ol i no gat kaikai, o ol i gat sik samting. Na i gat planti narapela rot tu em ol man i kisim pen na hevi long en.

Olsem wanem wanpela God bilong gutpela pasin inap wokim wanpela samting​—olsem ol lain manmeri​—na ol i kisim bikpela pen na hevi inap longpela taim nau?

Tingim Skin Bilong Yumi

Yumi ken tingim skin bilong man. Ol saveman na ol narapela i tok skin bilong yumi i narapela kain tru na i gutpela tumas.

Tingim ol dispela samting i mekim na skin bilong yumi i narapela kain tru: Ai bilong yumi em i winim moa yet wok bilong wanpela kamera; na kru bilong yumi, em i winim tru ol nupela kompiuta; na pasin bilong skin long mekim wok long lek han samting em i stret wantaim tingting i kamap long kru​—narapela i wok gut wantaim narapela; na tingim mirakel bilong kamapim wanpela pikinini​—wankain olsem papamama bilong em​—insait long 9-pela mun tasol. Planti man i skelim ol dispela samting na ol i tok, wanpela Saveman tru i wokim skin bilong yumi​—em Man bilong wokim yumi, em dispela God I Gat Olgeta Strong.

Tasol sori tumas, dispela gutpela skin i save bagarap isi isi​—sik i kisim, wantaim lapun na indai. Bihain tru em i kamap graun gen. Sori tru! Taim man i kisim bikpela save na em inap mekim gutpela wok long en, em i dai. Dispela i narapela kain tru long taim skin i stap strong na i stap gutpela taim man i yangpela yet.

Bilong wanem God bilong sori inap wokim wanpela gutpela samting tru, olsem skin bilong man, na bihain em i kamap nogut tru na bagarap? Bilong wanem God i wokim wanpela samting inap mekim planti gutpela wok, tasol bihain em i bagarap?

Bekim Bilong Sampela Man

Sampela man i tok God i givim pen na hevi long yumi na long dispela rot yumi inap lain long kamap gutpela man o meri. Wanpela pasto bilong lotu Metodis i tok, ‘Sapos man i kisim pe [olsem hevi] long samting nogut narapela man i mekim, dispela i olsem laik bilong God long kisim bek ol manmeri.’ Em i laik tok olsem: sapos ol man i laik kamap gutpela manmeri na God i kisim bek ol, ol i mas karim pen na hevi long han bilong ol man nogut, em olsem laik bilong God.

Tasol yu ting inap wanpela papa i helpim ol pikinini long bihainim gutpela pasin sapos em i larim ol man nogut i givim pen na hevi long ol? Tingim tu planti yangpela em ol i bin i dai long bagarap i painim ol, o ol i dai long pait samting. Ol dispela yangpela i no inap kamap gutpela manmeri sapos ol i dai pinis, a? Olsem na dispela tingting, olsem God i givim pen na hevi long ol man bambai ol i ken kamap gutpela manmeri, dispela tingting i no stret.

Wanpela gutpela papa i no inap larim famili bilong em i karim ol pen na hevi. Sapos wanpela papa i givim pen na hevi long ol pikinini bilong helpim ol long kamap gutpela manmeri, ating em i no gutpela papa, o em i longlong liklik.

Olsem na yu ting yumi ken tok olsem dispela God bilong pasin sori em i laik givim pen na hevi long ol man na long dispela rot em inap kisim bek ol? Nogat, a? I olsem yumi tok God i gat pasin nogut tru. Tasol yumi save dispela tok i no stret.

Painim Ol Stretpela Bekim

Bilong wanem God i larim pen na hevi na pasin nogut i stap? Sapos yumi laik save long bekim bilong ol dispela askim, gutpela sapos yumi askim God, na em yet i ken bekim.

Olsem wanem yumi inap painim bekim bilong God yet long ol dispela askim? Yumi inap skelim ol tok bilong em i stap long buk em i raitim bilong stretim wokabaut bilong yumi​—em Buk Baibel. Maski man i ting olsem wanem long dispela buk, yumi mas skelim ol tok bilong en, long wanem, aposel Pol i tok: “Spirit bilong God yet i bin kamapim olgeta tok i stap long buk bilong God. Na dispela tok em i gutpela samting tru bilong skulim yumi . . . long ol pasin i stret long ai bilong God.” (2 Timoti 3:16) Pol i tok moa olsem: “Taim yupela i kisim tok bilong God long maus bilong mipela, yupela i no kisim olsem tok bilong man. Nogat. Yupela i kisim olsem tok tru bilong God.”​—1 Tesalonaika 2:13.

Taim yumi painim bekim tru bilong ol dispela askim, dispela i no bilong givim save tasol long yumi. Ol dispela bekim i bikpela samting tru, long wanem ol i helpim yumi long save bilong wanem pasin bilong graun i wok long senis long nau, na wanem samting bai kamap liklik taim, na wanem samting bai painim yumi wan wan.

Yumi mas larim Baibel i bekim ol dispela askim, long wanem, em rot bilong God i toktok wantaim yumi ol man. Orait, Baibel i tok wanem long namba wan taim pen na hevi i kirap na bilong wanem God i larim dispela pasin i stap?

Sapos yumi laik save gut long dispela bekim, yumi mas save long tingting na pasin bilong yumi yet. Baibel i tok Man i wokim yumi i givim yumi dispela laik bilong tingim wanem rot yumi laik bihainim. Nau bai yumi stori long dispela samting na olsem wanem dispela laik i mekim na God i larim pen na hevi i stap yet.

    Tok Pisin Pablikesen (1983-2025)
    Log Aut
    Log In
    • Tok Pisin
    • Serim
    • Preferens
    • Copyright © 2025 Watch Tower Bible and Tract Society of Pennsylvania
    • Ol Lo Bilong Yusim
    • Privacy Policy
    • Ol Praivesi Seting
    • JW.ORG
    • Log In
    Serim