Pasin Bilong Karim Pen na Hevi Inap Helpim Yumi
“Ol man i bin strongim bel na karim hevi, ol i save stap gut na amamas.”—JEMS 5:11.
1, 2. Wanem samting i kamapim klia olsem Jehova i no laik bai ol man i karim pen na hevi?
MAN i gat stretpela tingting i no laik karim pen na hevi, na Man Bilong Wokim yumi, em God Jehova, em tu i no laik bai ol man i karim pen na hevi. Dispela samting i kamap ples klia taim yumi skelim Tok bilong em na tingim ol samting i bin kamap bihain long taim em i wokim namba wan man na meri. Pastaim God i wokim man. “Bikpela i kisim graun na em i wokim man long en. Na em i winim win bilong laip i go insait long nus bilong man, na man i kisim laip.” (Stat 2:7) Tingting na skin bilong Adam i gutpela olgeta, na sik na indai i no ken painim em.
2 Adam i gat wanem kain sindaun? “Bikpela i wokim wanpela gaden i stap long Iden, long hap bilong sankamap. Na long dispela gaden God i putim dispela man em i bin wokim. Na God i mekim graun i kamapim ol kain kain diwai, pikinini bilong ol i gutpela long kaikai. Olgeta dispela diwai i naispela tru.” (Stat 2:8, 9) Yes, Adam i gat gutpela ples tru bilong i stap long en. I no gat pen na hevi long Iden.
3. Namba wan man na meri inap kisim wanem kain laip?
3 Stat 2:18 i tok: “God, Bikpela i tok olsem, ‘Em i no gutpela long dispela man i stap wanpis. Mi mas mekim kamap wanpela poroman bilong helpim em.’ ” Jehova i wokim nambawan gutpela meri bilong Adam, na dispela i opim rot long ol i ken stap amamas olsem wanpela famili. (Stat 2:21-23) Na Baibel i tok moa: “Yupela i mas kamap planti na i go sindaun long olgeta hap bilong graun na bosim olgeta samting i stap long en.” (Stat 1:28) Tupela tumbuna bilong yumi i gat gutpela wok tru bilong skruim Paradais bilong Iden i go long olgeta hap bilong graun, na bihain graun olgeta bai kamap wanpela paradais. Na ol bai kamapim ol pikinini i stap amamas, em ol i no ken kisim pen na hevi. Em i gutpela kirap tru bilong laip, a?—Stat 1:31.
Pen na Hevi i Kirap
4. Ol samting i bin kamap long bipo yet na i kam inap long nau, em i kamapim klia wanem samting?
4 Tasol taim yumi skelim i stap bilong ol lain manmeri long bipo yet na i kam inap long nau, em i klia tru olsem samting nogut i bin kamap na i bagarapim sindaun bilong ol man. Ol pasin nogut i bin kamap, na ol lain manmeri i bin karim bikpela pen na hevi. Insait long planti handet yia, olgeta pikinini bilong Adam tupela Iv i bin kisim sik, go lapun, na i dai. Dispela graun i no wanpela paradais i gat ol manmeri i stap amamas long en. Nogat tru. Rom 8:22 i kamapim stret dispela samting, olsem: “Olgeta samting God i bin wokim, olgeta i pilim pen olsem meri i laik karim pikinini. Na olgeta i krai nogut i stap, i kam inap long nau.”
5. Olsem wanem tupela tumbuna bilong yumi i bin kamapim pen na hevi long ol man?
5 Em i no asua bilong Jehova na ol bikpela pen na hevi i bin stap longpela taim tru. (2 Samuel 22:31) Hap asua i stap long ol manmeri. Baibel i tok: “Ol dispela man ol i man nogut tasol. Ol i save mekim pasin i nogut tru.” (Song 14:1) Long kirap bilong i stap bilong tupela tumbuna bilong yumi, olgeta samting ol i kisim i gutpela tasol. Na bilong ol samting i ken i stap olsem, ol i mas bihainim tok bilong God, tasol Adam tupela Iv i no laik stap aninit long Jehova. Tupela tumbuna bilong yumi i sakim Jehova, olsem na ol i no inap i stap gutpela olgeta moa. Skin bilong ol i wok long lusim strong i go inap long ol i dai. Yumi olgeta i bin kisim sin long rot bilong tupela.—Stat 3:17-19; Rom 5:12.
6. Satan i bin mekim wanem bilong kamapim pen na hevi?
6 Wanpela ensel husat i kamap Satan, em tu i insait long ol samting i kirapim pen na hevi. Em i stap fri long makim rot em i laik bihainim. Tasol em i mekim wok nogut long dispela samting bilong pulim ol man long lotuim em. Tasol ol man i mas lotuim Jehova wanpela tasol, na i no ol samting em i bin wokim. Satan i pulim Adam tupela Iv long ol i no ken i stap aninit long Jehova, em i tok ol bai ‘kamap wankain olsem God, na save long wanem samting i gutpela, na wanem samting i nogut.’—Stat 3:5.
Jehova Tasol i Gat Rait Long Bosim Ol Man
7. Ol samting nogut pasin bilong bikhet long Jehova i bin kamapim i soim wanem samting?
7 Ol samting nogut dispela pasin bikhet i bin kamapim i soim olsem Jehova, em King Bilong Heven na Graun, em wanpela tasol i gat rait long bosim ol man na wok bos bilong em tasol i stret. Ol samting i bin kamap insait long planti tausen yia i soim olsem Satan, husat i kamap ‘hetman bilong dispela graun,’ em i bin kamapim wok bos i gat pasin bilong pait na bagarapim man, pasin i no stret, na i nogut olgeta. (Jon 12:31) Wok bos nogut bilong ol man em Satan i bosim i bin kamapim klia tu olsem ol man i no inap mekim wok bos long stretpela pasin. (Jeremaia 10:23) Olsem na wok bilong olgeta kain gavman i no inap karim gutpela kaikai, gavman bilong Jehova tasol inap mekim olsem. Ol samting i bin kamap i kamapim klia tru dispela samting.
8. Jehova i tingting pinis long mekim wanem long olgeta kain gavman bilong ol man? Olsem wanem em bai mekim dispela samting?
8 Inap planti tausen yia, Jehova i bin larim ol man long bosim wokabaut bilong ol yet, olsem na i stret em i ken rausim olgeta dispela gavman long graun na kamapim gavman bilong em yet. Wanpela tok profet i tok long dispela olsem: “Taim ol dispela king [ol gavman bilong ol man] i stap yet God bai i kirapim wanpela kingdom [gavman bilong em long heven long han bilong Krais] na dispela kingdom bai i stap oltaim oltaim. . . . Em bai i daunim ol na bagarapim ol arapela king na kingdom bilong en bai i stap oltaim.” (Daniel 2:44) Wok bos bilong ol spirit nogut na bilong ol man bai pinis, na Kingdom Bilong God long heven bai i stap na bosim graun. Krais em i King, na 144,000 gutpela manmeri em God i kisim long graun ol bai mekim wok king wantaim em.—KTH 14:1.
Pasin Bilong Karim Pen na Hevi Inap Helpim Yumi
9, 10. Olsem wanem pen na hevi Jisas i bin karim i helpim em?
9 I gutpela long skelim ol mak ol man i mekim wok king long Kingdom bilong heven ol i mas winim. Namba wan, Krais Jisas i kamapim klia olsem em inap tru long mekim wok King. Em i bin stap planti bilion yia klostu long Jehova na mekim laik bilong Papa bilong em, em i “saveman i bosim wok” bilong Jehova. (Sindaun 8:22-31) Taim Jehova i stretim rot bilong Jisas long kam long graun, Jisas i redi long mekim olsem. Long graun em i wok strong long tokim ol man long wok bos bilong Jehova na Kingdom bilong em. Jisas i stap daun olgeta long wok bos bilong Jehova na em i stap gutpela piksa tru long yumi olgeta i ken bihainim.—Matyu 4:17; 6:9.
10 Ol man i birua long Jisas, na bihain ol i kilim em i dai. Taim em i mekim wok autim tok, em i lukim olsem long olgeta hap i stap bilong ol man i nogut tru. Taim em i lukim dispela samting na em yet i karim pen na hevi, yu ting dispela i helpim em? Yes, dispela i helpim em. Hibru 5:8 i tok: “Jisas em i Pikinini Bilong God, tasol em i karim pen, na dispela i skulim em tru long pasin bilong bihainim tok bilong God.” Ol samting i bin painim Jisas taim em i stap long graun i mekim na em i pilim moa yet hevi bilong ol man na em i sori long ol. Em yet i bin pilim i stap bilong ol lain manmeri i wanem kain. Em inap pilim hevi bilong ol man i karim pen na em inap kliagut moa long wok bilong em bilong helpim ol man. Lukim tok aposel Pol i mekim bilong kamapim klia dispela samting long Buk Hibru. Em i tok: “Long olgeta samting em i mas kamap wankain tru olsem ol brata bilong en, na em bai inap i stap hetpris bilong ol na mekim wok bilong God. Em i kamap hetpris bilong sori long ol manmeri, na em i save bihainim olgeta tok bilong God na mekim wok bilong em, em wok bilong lusim sin bilong ol manmeri. Ol traim i bin kamap long em na em yet i bin karim pen. Olsem na em inap long helpim ol manmeri long taim ol traim i kamap long ol.” “Yumi no ken ting, dispela hetpris bilong yumi em i no inap sori long yumi. Nogat. Olgeta traim i save kamap long yumi, dispela olgeta i bin kamap pinis long em bilong traim em tu. Tasol em i no mekim sin. Olsem na yumi ken i go klostu long God, na yumi no ken pret. Em i man bilong marimari. Yumi go long em, na bai yumi lukim em i sori long yumi. Na sapos yumi gat hevi, orait marimari bilong em bai i helpim yumi.”—Hibru 2:17, 18; 4:14-16; Matyu 9:36; 11:28-30.
11. Ol manmeri i kamap king na pris long bihain ol i bin stap long graun, olsem wanem dispela bai helpim ol long mekim wok bilong ol?
11 Yumi ken mekim wankain tok long lain 144,000, em God i bin “baim” ol long graun bilong mekim wok king wantaim Krais Jisas long Kingdom bilong heven. (KTH 14:4) Olgeta i bin kamap man na meri long graun, ol i kamap bikpela long graun i gat planti pen na hevi long en, na ol yet i bin karim pen na hevi. Ol man i bin birua long planti bilong ol, na sampela i bin dai, long wanem, ol i holimpas pasin bilong stap gut long Jehova na ol i laik bihainim Jisas. Tasol ol i ‘no sem long autim tok bilong Bikpela bilong ol, na ol i karim hevi long wok bilong autim gutnius.’ (2 Timoti 1:8) Ol samting i painim ol long graun i mekim na ol inap tru long skelim ol lain man taim ol i stap long heven. Ol i bin lain long pilim hevi bilong narapela, mekim gutpela pasin, na ol i amamas long helpim ol man.—KTH 5:10; 14:2-5; 20:6.
Amamas Bilong Lain i Wet Long Kisim Laip Long Graun
12, 13. Ol man i wet long kisim laip long graun, olsem wanem pasin bilong karim pen na hevi inap helpim ol?
12 Olsem wanem? Ol pen na hevi bilong nau inap helpim ol lain i wet long kisim laip oltaim long wanpela paradais long graun i no gat sik, bel hevi, na dai? Bikpela pen em ol hevi i save kamapim i no samting yumi laikim. Tasol taim yumi karim ol kain pen na hevi olsem, dispela inap kamapim ol gutpela pasin na pasin bilong stap amamas.
13 Tingim tok Baibel i mekim long dispela samting: “Sapos yupela i mekim stretpela pasin, na yupela i karim pen long dispela, orait yupela i ken amamas.” “Yupela i holim nem bilong Krais, na sapos long dispela ol i tok nogut long yupela, orait yupela i ken amamas.” (1 Pita 3:14; 4:14) “Sapos ol i lukim yupela i stap long lain bilong mi, na ol i tok nogut long yupela na ol i mekim nogut long yupela na sutim kain kain tok giaman long yupela, orait yupela i ken amamas. Yupela i ken belgut na amamas tru, long wanem, bikpela pe i wetim yupela long heven.” (Matyu 5:11, 12) “Man i save sanap strong na i karim hevi long olgeta traim, em i ken amamas. Sapos em i winim pinis olgeta traim, orait God bai i givim em laip bilong i stap gut oltaim, olsem prais bilong en.”—Jems 1:12.
14. Olsem wanem yumi ken tok pen na hevi i save mekim lain i lotuim Jehova i stap amamas?
14 Tru, pen na hevi yumi karim, dispela samting yet i no mekim yumi stap amamas, nogat. Yumi amamas na belgut taim yumi save olsem yumi karim pen na hevi, long wanem, yumi mekim laik bilong Jehova na bihainim pasin bilong Jisas. Olsem: Long taim bilong ol aposel, ol i kalabusim sampela aposel na kisim ol i go long nambawan kot bilong ol Juda na sutim tok long ol, long wanem, ol i autim tok bilong Jisas Krais. Ol i wipim ol na bihain larim ol i go. Ol aposel i gat wanem tingting? Baibel i tok ol i “lusim kaunsil na i go ausait. Na ol i amamas long God i ting ol inap long kisim sem long nem bilong Jisas.” (Aposel 5:17-41) Ol i amamas, tasol ol i no amamas long ol man i wipim ol na long bikpela pen ol i kisim long dispela. Nogat. Ol i amamas, long wanem, ol i save dispela samting i bin kamap long pasin bilong ol long stap gut long Jehova na bihainim lek bilong Jisas.—Aposel 16:25; 2 Korin 12:10; 1 Pita 4:13.
15. Olsem wanem pasin bilong karim pen na hevi long nau inap helpim yumi long bihain?
15 Sapos yumi gat stretpela tingting taim yumi karim hevi long ol man i birua long yumi, dispela inap helpim yumi long kisim pasin bilong sanap strong na winim ol hevi bai kamap bihain. Baibel i tok: “Ol brata bilong mi, sapos ol kain kain traim i kamap long yupela, orait yupela i ken ting olsem, em i samting bilong amamas tasol. Yupela i save, samting i kamap na i traim bilip bilong yupela, em i save kamapim pasin bilong sanap strong na karim hevi.” (Jems 1:2, 3) Rom 5:3-5 tu i tok: “Yumi ken amamas long ol hevi i kamap long yumi tu, long wanem, yumi save, ol dispela hevi i save strongim bel bilong yumi. Na sapos bel bilong yumi i stap strong, orait yumi inap sakim ol traim i kamap long yumi. Na sapos yumi sakim ol traim, orait yumi save bilip long God na wetim em i helpim yumi na kisim bek yumi. Na sapos yumi wetim God i helpim yumi, orait yumi no save wet nating.” Olsem na sapos nau yumi karim ol hevi, long wanem, yumi bihainim rot Kristen, bai yumi inap sanap strong moa na karim ol hevi bai kamap long dispela taim nogut.
Jehova Bai Mekim Gut Long Ol Man
16. Jehova bai mekim wanem long lain husat bai mekim wok king na pris bilong praisim ol long ol pen na hevi ol i bin karim?
16 Maski pasin birua bilong ol man i mekim na ol samting bilong yumi i lus, o yumi kisim pen na hevi, long wanem, yumi bihainim rot Kristen, yumi ken amamas tru long save olsem Jehova bai praisim yumi. Aposel Pol i tokim sampela husat i wet long kisim laip long heven, olsem: “Taim ol man i bin pulim ol samting bilong yupela, yupela i amamas i stap na larim ol, long wanem, yupela i save olsem, samting tru bilong yupela i stap yet, na dispela bai i stap oltaim.” (Hibru 10:34) Na tingim bikpela amamas ol bai kisim taim ol i wok aninit long Jehova na Krais na kamapim ol gutpela gutpela blesing long ol manmeri i stap long nupela taim. Tok aposel Pol i mekim long ol gutpela Kristen i tru olgeta, em i tok: “Dispela gutpela sindaun na biknem bai i kamap ples klia long yumi bihain, mi ting em bai i winim tru dispela pen yumi save karim nau long dispela taim.”—Rom 8:18.
17. Jehova bai mekim wanem long ol man i wet long kisim laip long graun em ol i stap gut long wok bilong em long nau?
17 Na olsem tasol, ol man i wet long kisim laip long graun, maski wanem ol samting bilong ol i lus o ol yet i redi long lusim ol samting, long wanem, ol i mekim wok bilong Jehova, em bai givim ol planti gutpela samting long bihain. Em bai givim ol laip i stap gut oltaim oltaim long wanpela paradais long graun. Long nupela taim, Jehova “bai i mekim drai wara i stap long ai bilong olgeta bilong ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen.” (KTH 21:4) Em i gutpela tok promis tru, a? I no gat wanpela samting bilong dispela graun em yumi lusim bilong stap gut long Jehova na dispela i gutpela olsem laip yumi bai kisim long bihain, em laip Jehova bai givim long ol wokboi bilong em i karim pen na hevi.
18. Jehova i mekim wanem gutpela tok promis long Baibel?
18 Ol pen na hevi em yumi mas karim yet bai i no bagarapim laip yumi bai kisim long nupela taim God bai kamapim. Nambawan gutpela sindaun bilong dispela nupela taim bai stretim tru olgeta pen na hevi. Aisaia 65:17, 18 i tok: “Ol man bai i no inap tingim moa ol samting i bin kamap bipo. Yupela i ken bel gut na amamas oltaim long nupela samting nau mi wokim.” Olsem na i stret brata bilong Jisas, em Jems, i tok: “Ol man i bin strongim bel na karim hevi, ol i save stap gut na amamas i stap.” (Jems 5:11) Tru tumas, sapos yumi stap gut na karim ol pen na hevi bilong nau, dispela bai helpim yumi long nau na long bihain.
Bai Yu Bekim Olsem Wanem?
• Olsem wanem pen na hevi i bin kamap long ol man?
• Olsem wanem pasin bilong karim pen na hevi inap helpim lain husat bai bosim nupela graun na ol man i stap long en?
• Bilong wanem yumi ken stap amamas long nau maski yumi karim pen na hevi?
[Piksa long pes 27]
Tupela tumbuna bilong yumi ol inap kisim gutpela laip tru
[Piksa long pes 29]
Jisas i bin lukim ol man i karim pen na hevi na dispela i helpim em long kamap gutpela King na Hetpris
[Piksa long pes 31]
Ol aposel ‘i amamas long God i ting ol inap long kisim sem’ long bilip bilong ol