Mekim Gut Bel Bilong Ol Man i Karim Pen na Hevi

INAP planti yia pinis, ol saveman na ol tisa bilong lotu i hatwok long save long as na God i larim pen na hevi i stap. Sampela i tok olsem God i gat olgeta strong, olsem na em i as bilong olgeta pen na hevi. Man bilong raitim buk The Clementine Homilies (100 yia samting bihain long Krais) em i tok God i save mekim wok long tupela han wantaim bilong bosim graun. Long “han kais” bilong em, Satan, em i save kamapim pen na hevi, na long “han sut” bilong em, Jisas, em i save kisim bek na mekim gut long ol man.

Sampela man ol i no laik ting olsem God i larim pen na hevi i stap maski sapos em i no kamapim, na ol i tok pen na hevi i no stap. Mary Baker Eddy i tok: “Pasin nogut i no stap tru, na i no gat as tru bilong en. Sapos ol man i ting sin, na sik, na indai i no stap tru, orait ol dispela samting bai pinis.”​—Buk Science and Health With Key to the Scriptures.

Ol bikpela hevi i kamap, kirap long namba wan pait i kam inap long taim bilong yumi i mekim na planti man i tingting olsem God i no inap long pasim ol pen na hevi long kamap. Wanpela saveman bilong Juda, em David Wolf Silverman, i tok: “Long tingting bilong mi, taim lain Natsi i kilim i dai planti milion Juda na ol narapela lain tu, dispela i kamapim klia olsem God i no gat olgeta strong. Bilong yumi ken save liklik long God, yumi mas tingim gutpela pasin bilong em na tingim tu olsem pasin nogut i stap, na tupela samting i wok wantaim, na dispela bai i tru sapos Em i no gat olgeta strong.”

Tasol ol dispela tok olsem God i kamapim pen na hevi, o em i no inap long pasim, o pen na hevi em ol samting i no stap tru tru, ol kain tok olsem i no mekim gut bel bilong ol man i karim pen na hevi. Na bikpela samting moa yet, ol kain tingting olsem i no stret wantaim ol tok Baibel i mekim bilong stori long God, olsem em i save mekim stretpela pasin, na em i gat bikpela strong, na em i save tingim gut ol man. (Jop 34:​10, 12; Jeremaia 32:17; 1 Jon 4:⁠8) Orait Baibel i tok wanem bilong kamapim as bilong pen na hevi?

Pen na Hevi i Bin Kamap Olsem Wanem?

God i no bin wokim ol man na bai ol i karim pen na hevi, nogat. Em i givim long Adam na Iv, tingting na bodi i gutpela olgeta, na em i redim wanpela gutpela ples gaden bilong ol i ken i stap long en, na em i givim ol gutpela wok tru bilong mekim. (Stat 1:​27, 28, 31; 2:⁠8) Tasol bilong ol i ken i stap amamas oltaim, ol i mas daun long wok bos bilong God na larim em i makim wanem samting i gutpela na wanem samting i nogut. Dispela diwai ol i kolim “diwai bilong givim gutpela save long wanem samting i gutpela na wanem samting i nogut,” em i olsem piksa i makim dispela lo God i bin putim long tupela. (Stat 2:17) Adam na Iv bai kamapim pasin bilong ol long daun long God sapos ol i bihainim tok bilong God na ol i no kaikai pikinini bilong dispela diwai.a

Sori tru, Adam na Iv i no bihainim tok bilong God. Wanpela ensel i bikhet, bihain Baibel i kolim em Satan, em i kirapim Iv long sakim tok bilong God. Iv i kisim tingting olsem God i pasim em long kisim wanpela gutpela samting tru: em inap bosim em yet, na em yet inap makim wanem samting i gutpela na wanem samting i nogut. Satan i tok sapos Iv i kaikai pikinini bilong diwai, ‘bai ai bilong em i op na em i kisim save long wanem samting i gutpela, na wanem samting i nogut, na bai em i kamap wankain olsem God.’ (Stat 3:​1-6; KTH 12:⁠9) Iv i larim tok bilong Satan long em inap bosim em yet i pulim em, na em i kaikai pikinini bilong diwai tambu na Adam tu i bihainim em.

Long dispela de yet, Adam na Iv i luksave long ol samting em pasin bikhet bilong ol i kamapim. Ol i sakim wok bos bilong God, olsem na ol i lusim ol gutpela samting em pasin bilong i stap daun long wok bos bilong God i kamapim, olsem em i lukautim ol na mekim gut long ol. God i rausim ol long ples Paradais na em i tokim Adam: “Nau bai mi bagarapim graun, na ol kaikai bai i no inap kamap gut long en. Oltaim bai yu wok hat tru bilong mekim kaikai i kamap long graun. . . . Na bai yu wok hat tru long kisim kaikai bilong yu na tuhat bai i kamap long pes bilong yu. Na bai yu hatwok oltaim inap yu dai na yu go bek long graun.” (Stat 3:​17-19) Adam na Iv i kisim hevi bilong sik, pen, lapun, na indai. Pen na hevi i painim olgeta man long i stap bilong ol.​—⁠Stat 5:⁠29.

Stretim Tok

Ating sampela i laik save, ‘Olsem wanem na God i no laik lusim tingting long sin bilong Adam na Iv?’ Em i no mekim olsem, long wanem, dispela bai daunim wok bos bilong God, na ating dispela inap kirapim sampela man moa long bikhet long God long bihain na kamapim pen na hevi i bikpela moa. (Saveman 8:11) Na tu, sapos God i no mekim wanpela samting long pasin bikhet bilong tupela, dispela bai mekim na i olsem em tu i insait long dispela rong. Man bilong raitim Baibel, em Moses, em i tok: “Oltaim [God] i save bihainim tok bilong en na em i no save giaman. Na pasin bilong en i gutpela na stretpela tasol.” (Lo 32:⁠4) Bilong bihainim stret lo bilong em, God i mas larim Adam na Iv i karim ol hevi i kamap long pasin bilong ol long sakim tok.

Bilong wanem God i no kirap wantu tasol na bagarapim namba wan man na meri, na Satan, em man i bin kirapim ol long mekim pasin bikhet? Em i gat strong bilong mekim olsem. Adam na Iv i no inap kamapim ol pikinini na bai ol i karim pen na hevi na indai i painim ol. Tasol sapos em i yusim strong bilong em long kain rot olsem, dispela bai i no kamapim klia olsem i stret God i bosim ol man. Na tu, sapos Adam na Iv i no kamapim pikinini yet na ol i dai, dispela bai makim olsem God i no inap long kamapim laik bilong em long ol man i gutpela olgeta bai stap long graun. (Stat 1:28) Na “God i no save giaman olsem yumi man . . . Sapos em i promis long mekim wanpela samting, orait em i save mekim. Em i save tok tasol na dispela samting i kamap.”​—⁠Namba 23:⁠19.

God Jehova i bihainim tingting na save bilong em i gutpela olgeta, na em i larim dispela pasin bikhet long i stap inap sotpela taim. Ol dispela bikhetman bai gat taim long pilim ol hevi i kamap long pasin bilong bosim wokabaut bilong ol yet na ol i no larim God i bosim ol. Ol samting i kamap long graun bai kamapim klia tru olsem God i mas bosim ol man, na wok bos bilong em i winim tru wok bos bilong ol man na bilong Satan. Na tu, God i stretim rot bambai ol samting em i tingting pinis long kamapim long graun bai i kamap tru. Em i tok promis olsem wanpela “lain [“pikinini,” NW ]” bai kamap na em bai “krungutim het bilong [Satan],” na pinisim tru pasin bikhet bilong em na ol hevi i bin kamap long dispela pasin bikhet.​—⁠Stat 3:⁠15.

Jisas Krais em i dispela Pikinini bilong promis. Long 1 Jon 3:​8, Baibel i tok: “Pikinini Bilong God i bin kamap ples klia bilong bagarapim na rausim wok bilong Satan.” Em i bin mekim olsem taim em i givim laip bilong em i gutpela olgeta olsem ofa, na em i baim bek ol pikinini bilong Adam long sin na indai ol i bin kisim long papa bilong ol. (Jon 1:29; 1 Timoti 2:​5, 6) Ol man i bilip tru long ofa bilong Jisas, God i tok promis long ol bai kamap fri olgeta long pen na hevi. (Jon 3:16; KTH 7:17) Dispela samting bai kamap long wanem taim?

Pen na Hevi i Pinis Olgeta

Pasin bilong sakim wok bos bilong God i bin kamapim bikpela pen na hevi. Olsem na i stret God i mas mekim narakain gutpela wok long wok bos bilong em bilong pinisim pen na hevi bilong ol man, na kamapim laik bilong em long graun. Jisas i tokaut long dispela samting taim em i skulim ol disaipel long beten: “Papa bilong mipela, yu stap long heven, . . . kingdom bilong yu i mas i kam. Mipela i mas bihainim laik bilong yu long graun olsem ol i save bihainim long heven.”​—⁠Matyu 6:​9, 10.

Hap taim God i larim bilong ol man i ken bosim wokabaut bilong ol yet, em klostu nau bai pinis. Kingdom bilong em i kirap pinis long heven long yia 1914, na Jisas Krais em i King bilong dispela kingdom, na dispela i truim ol tok profet bilong Baibel.b Klostu nau dispela Kingdom bai pinisim tru olgeta gavman bilong ol man.​—⁠Daniel 2:⁠44.

Long sotpela hap taim Jisas i bin mekim wok long graun, em i mekim ol samting i olsem piksa bilong ol gutpela blesing bai kamap taim God i bosim ol man. Ol stori bilong Gutnius i kamapim klia olsem Jisas i bin mekim pasin sori long ol man i sot long ol samting na ol narapela i daunim ol. Em i oraitim ol man i gat sik, givim kaikai long ol man i hangre, na kirapim bek ol man i dai pinis. Na tu, ol samting bilong graun olsem win ren samting, ol tu i bihainim tok bilong em. (Matyu 11:5; Mak 4:​37-39; Luk 9:​11-16) Tingim ol gutpela samting Jisas bai mekim taim em i mekim wok long ofa bilong em bilong helpim ol man i bihainim tok! Baibel i tok promis olsem long rot bilong wok king bilong Krais, God “bai i mekim drai wara i stap long ai bilong olgeta bilong ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen.”​—⁠KTH 21:⁠4.

Mekim Gut Bel Bilong Ol Man i Karim Pen na Hevi

Yumi amamas tru long save olsem God bilong yumi, Jehova, em i gat pasin sori na olgeta strong, em i tingim yumi na klostu nau bai em i pinisim tru olgeta hevi bilong ol man! Man i gat bikpela sik, em i save orait long kisim marasin bilong oraitim sik maski marasin i givim bikpela pen long em. Olsem tasol, sapos yumi save olsem pasin bilong God long stretim ol samting bai kamapim ol blesing bilong oltaim oltaim, dispela save inap strongim yumi maski wanem wanem hevi i painim yumi.

Ricardo, em yumi bin stori long em long kirap bilong dispela stori, em i bin lain long larim ol tok promis bilong Baibel i mekim gut bel bilong em. Em i tok: “Taim meri bilong mi i dai, mi tingting strong long i stap longwe long ol narapela, tasol mi luksave olsem dispela pasin i no inap bringim meri bilong mi i kam bek, na dispela bai mekim mi bel hevi moa yet.” Ricardo i wok strong long bihainim pasin bilong em long i go oltaim long ol miting Kristen na tokim ol narapela long ol tok bilong Baibel. Ricardo i tok: “Taim mi lukim pasin bilong Jehova long helpim mi na ol samting em i mekim bilong bekim beten bilong mi, maski ol i olsem liklik samting tasol, dispela i helpim mi long pas moa yet wantaim em. Mi save olsem God i laikim mi na dispela i bin helpim mi long karim dispela hevi​—⁠em i bikpela hevi tru winim olgeta narapela hevi i bin painim mi.” Em i tok: “Mi sori yet long meri bilong mi, tasol nau mi bilip strong olsem i no gat wanpela samting Jehova i larim i kamap inap bagarapim yumi inap oltaim.”

Olsem wanem? Olsem Ricardo na planti milion man moa, yu wetim dispela taim bai kamap “na ol man bai i no inap tingim moa ol samting i bin kamap bipo”? (Aisaia 65:17) Yu mas bilip olsem yu tu inap kisim ol gutpela blesing Kingdom bilong God bai kamapim sapos yu bihainim tok bilong Baibel: “Nau Bikpela i stap klostu . . . olsem na nau em i taim bilong . . . beten long em na i go klostu long em.”​—⁠Aisaia 55:⁠6.

Bilong helpim yu long mekim olsem, yu mas mekim pasin bilong ritim Baibel na stadi gut long en i kamap nambawan samting long i stap bilong yu. Kisim save long God na dispela man em i bin salim i kam, em Jisas Krais. Wok strong long bihainim ol lo bilong God long i stap bilong yu, na long dispela rot yu kamapim olsem yu laik daun long wok bos bilong em. Dispela pasin bai helpim yu long kisim bikpela amamas moa long nau maski ol traim i painim yu. Na bihain, bai yu inap amamas tru long stap long wanpela taim i no gat pen na hevi long en.​—⁠Jon 17:⁠3.

[Ol Futnot]

[Blok long pes 6, 7]

Long Wanem Rot YUMI INAP KARIM PEN NA HEVI?

“Olgeta hevi yupela i karim, yupela i mas putim long han bilong [God].” (1 Pita 5:⁠7) Taim yumi karim pen na hevi o yumi lukim wanpela yumi laikim tumas em i karim pen na hevi, ating yumi pilim olsem yumi stap wanpis, o yumi kros, o yumi no klia tumas long samting yumi mas mekim. Tasol maski i olsem, yu mas bilip olsem Jehova i save pilim ol hevi bilong yumi. (Kisim Bek 3:⁠7; Aisaia 63:⁠9) Olsem ol gutpela bilipman bilong bipo, yumi inap kamapim bel bilong yumi na tokim God long ol samting yumi tingting planti long en. (Kisim Bek 5:22; Jop 10:​1-3; Jeremaia 14:19; Habakuk 1:13) Ating bai em i no wokim mirakel na pinisim ol hevi bilong yumi, tasol em bai harim beten bilong yumi na givim yumi gutpela tingting na strong bambai yumi inap karim ol hevi.​—⁠Jems 1:​5, 6.

“Wanpela traim olsem paia i wok long kamap long yupela. Tasol yupela i no ken kirap nogut na ting em i narakain samting tru i kamap long yupela. Nogat.” (1 Pita 4:12) Long dispela ves, Pita i toktok long pasin nogut ol man i mekim long ol bilipman, tasol dispela tok i stret tu long ol narapela kain hevi. Ol man i save karim hevi bilong sik, na sot long kaikai samting, na wanpela ol i laikim tumas em i dai. Baibel i tok “taim nogut i save painim yumi olgeta.” (Saveman 9:11) Ol kain hevi olsem i save painim olgeta manmeri long nau. Taim yumi save long dispela, dispela bai helpim yumi long karim pen na hevi. (1 Pita 5:⁠9) Na taim yumi tingim dispela tok promis, “Bikpela i save lukautim ol stretpela manmeri, na em i save harim beten bilong ol,” dispela bai mekim gut tru bel bilong yumi.​—⁠Song 34:15; Sindaun 15:3; 1 Pita 3:⁠12.

“Yupela i save bilip na wetim Bikpela i mekim gut long yupela, olsem na yupela i mas amamas.” (Rom 12:12) Yumi no ken tingting oltaim long amamas yumi bin kisim bipo, nogat; yumi mas tingim tingim long bel tok promis bilong God long pinisim olgeta pen na hevi. (Saveman 7:10) Dispela samting yumi wetim bai lukautim yumi olsem hat kapa i banisim het. Em bai helpim yumi long karim ol hevi na bai ol i no ken bagarapim yumi olgeta long tingting na bel o long ol samting bilong spirit.​—⁠1 Tesalonaika 5:⁠8.

[Piksa long pes 5]

Adam na Iv i sakim wok bos bilong God

[Piksa long pes 7]

God i tok promis long kamapim wanpela taim bai i no gat pen na hevi moa long en