Hap Taim God i Larim Ol Hevi i Stap i Laik Pinis
LONG olgeta hap i gat ol pen na hevi. Sampela hevi ol man yet i as bilong en. Ol i kisim sik long rot bilong pamuk, o ol i kisim sampela bagarap long wanem, ol i kisim drak, dring planti tumas, na smok. O ating ol i kisim sampela sik, long wanem, ol i kaikai ol samting i nogutim skin bilong ol. Tasol as bilong planti pen na hevi ol man i karim em ol samting ol yet i no inap bosim, olsem: pait, pasin birua namel long tupela lain, pasin raskol, stap rabis, hangre, na ol sik. Narapela samting tu ol manmeri i no inap bosim, em ol hevi bilong lapun na i dai.
Baibel i tokim yumi olsem ‘God em i as bilong pasin bilong laikim ol arapela.’ (1 Jon 4:8) Olsem na bilong wanem God bilong sori i bin larim ol pen na hevi i stap inap planti handet yia? Em bai i stretim ol dispela hevi long wanem taim? Bilong kisim bekim bilong ol dispela askim, yumi mas skelim gut ol samting God i laik ol manmeri i mekim taim em i putim ol long dispela graun. Dispela bai helpim yumi long save long as na God i bin larim ol pen na hevi i stap, na long ol samting em bai i mekim bilong stretim dispela samting.
Pasin Bilong Stap Fri i Olsem Presen
Namba wan man God i wokim, em i no wanpela bodi nating i gat kru. Na God i no bin wokim Adam na Iv bilong stap olsem masin i no inap mekim samting long laik bilong em yet. God i wokim ol bilong stap fri long skelim na makim ol samting ol i laik mekim. Na yumi save em i wanpela gutpela presen, long wanem, “God i lukim olgeta dispela samting [em i wokim] i gutpela, na em i amamas tru.” (Stat 1:31) Tru tumas, “pasin bilong [God] i gutpela na stretpela tasol.” (Lo 32:4) Yumi olgeta i amamas long dispela presen bilong stap fri, long wanem, yumi no laik bai narapela i bosim olgeta tingting na wokabaut bilong yumi na pasim yumi long bihainim laik bilong yumi yet.
Tasol, yu ting i stret long yumi mekim nabaut long dispela gutpela presen? Tok Bilong God bilong stiaim ol Kristen bilong pastaim i bekim dispela askim olsem: “Yupela i mas wokabaut olsem ol man i stap fri. Tasol yupela i no ken ting, ‘Nau mipela i stap fri,’ na yupela i go mekim ol kain kain pasin nogut. Nogat. Yupela i mas wokabaut olsem ol wokboi bilong God.” (1 Pita 2:16) Bilong olgeta manmeri i ken stap gut, i mas i gat sampela lo. Olsem na ol lo bai stiaim pasin bilong stap fri long mekim ol samting. Sapos i no gat lo, ol man bai bikhet olgeta.
Lo Bilong Husat?
Lo bilong husat bai stiaim dispela pasin bilong stap fri? Nambawan bikpela as na God i bin larim ol pen na hevi i stap i bekim dispela askim. God i wokim ol man, olsem na em i save gut moa long ol lo ol i mas bihainim bilong helpim ol yet na ol narapela. Baibel i tok olsem: “Mi God, Bikpela bilong yupela. Oltaim mi save skulim yupela na soim yupela long ol stretpela pasin yupela i mas bihainim na bai yupela i stap gut.”—Aisaia 48:17.
Tru tumas, wanpela bikpela samting i olsem: God i no bin wokim ol man bilong bosim wokabaut bilong ol yet na maski long God. Bilong ol manmeri i ken stap gut na stap amamas God i wokim ol bilong bihainim ol stretpela lo bilong em. Profet bilong God, em Jeremaia, em i tok: “Bikpela, mi save, mipela man i no inap bosim wokabaut bilong mipela yet na bihainim ol rot mipela i laikim.”—Jeremaia 10:23.
God i wokim ol man bilong stap aninit long ol lo i bosim ol samting bilong graun, olsem lo bilong wanpela strong ol i kolim graviti. Na olsem tasol God i wokim ol man bilong stap aninit long ol lo bilong bosim wokabaut bilong ol, em ol lo God i kamapim bilong helpim ol manmeri long sindaun gut wantaim. Olsem na i gat gutpela as na Baibel i kirapim yumi olsem: “Yu mas bilip strong long Bikpela. Yu no ken ting save bilong yu yet inap helpim yu.”—Sindaun 3:5.
Olsem na sapos ol manmeri i no stap aninit long wok bos bilong God ol bai no inap stap gut. Sapos ol i traim bosim wokabaut bilong ol yet, ol bai kamapim ol samting bilong helpim sindaun bilong ol man, wok mani, wok politik, na lotu, na ol dispela samting bai i no wok gut wantaim. Na ol ‘bikman bai daunim ol arapela na mekim nogut long ol.’—Saveman 8:9.
Wanem Samting i Paul?
God i bin wokim tupela tumbuna bilong yumi, em Adam na Iv, i gutpela olgeta. Skin na tingting bilong ol i gutpela olgeta, na ol i stap long ples paradais. Sapos ol i bin daun long wok king bilong God, ol bai i stap gutpela olgeta na amamas inap oltaim oltaim. Bihain, ol bai kamap papamama bilong wanpela famili i amamas na i gutpela olgeta na i stap long ples paradais. God i wokim ol manmeri bilong stap olsem.—Stat 1:27-29; 2:15.
Tasol tupela tumbuna bilong yumi i bin mekim wok nogut long pasin bilong stap fri long mekim ol samting. Ol i kranki na ting olsem maski ol i sakim wok bos bilong God, ol inap stap gut. Ol i bihainim laik bilong ol yet na lusim ol lo bilong God. (Stat, sapta 3) Ol i givim baksait long wok king bilong em, olsem na i no olsem God i mas helpim ol long i stap gutpela olgeta moa. “Yupela i manmeri bilong mekim sin tasol. Olsem na yupela i no inap i stap lain pikinini bilong God.”—Lo 32:5.
Kirap long taim Adam na Iv i sakim tok bilong God, skin na tingting bilong tupela i wok long go nogut. Jehova em i as bilong laip. (Song 36:9) Namba wan man na meri i givim baksait long Jehova, olsem na ol i no gutpela olgeta moa na isi isi ol i go lapun na i dai. (Stat 3:19) Ol pikinini i save kisim wankain samting i stap long skin bilong papamama, olsem na ol pikinini bilong Adam na Iv bai kisim samting i stap long skin bilong tupela. Em i wanem samting? Em sin na indai. Olsem na Pol i tok: “Wanpela man i bin mekim sin, na long dispela pasin sin i kamap long graun. Na sin i bringim dai i kam. Na dai i kisim olgeta man, long wanem, olgeta man i bin mekim sin.”—Rom 5:12.
Husat i Mas Mekim Wok Bos?
Taim Adam na Iv i bikhet long God, i olsem tupela i gat tok long wok bos bilong em. Jehova inap bagarapim tupela na wokim narapela man na meri, tasol dispela bai i no inap stretim bikpela tok long wok bos bilong husat i gutpela moa. Hap taim God i larim ol manmeri long kamapim ol gavman samting long laik bilong ol yet bai kamapim klia wok bilong ol long bosim ol samting bai i gutpela o nogat.
Ol samting ol man i bin mekim insait long planti tausen yia i givim wanem save long yumi? Insait long ol dispela planti tausen yia, ol manmeri i bin kamapim kain kain lotu, na kain kain gavman i bihainim narapela narapela pasin bilong helpim sindaun bilong ol man. Tasol pasin nogut na ol pen na hevi i stap yet. Tru tumas, ‘ol man nogut i kamap nogut moa,’ na dispela tok i stret tru long taim bilong yumi.—2 Timoti 3:13.
Insait long wan handet yia i go pinis, wok bilong saiens na wok bilong ol man long kamapim ol kain kain masin na haus faktori samting i go bikpela tru. Tasol ol bikpela pen na hevi insait long dispela hap taim i bikpela tru, winim olgeta taim bipo. Na maski ol dokta i kisim ol nupela save long stretim ol sik, lo bilong God i stret long nau tu: Ol sinman i stap longwe long God, em as bilong laip, ol i save kisim sik, go lapun, na dai. Em nau ol samting i kamapim klia pinis olsem ol manmeri i no inap ‘bosim wokabaut bilong ol yet’!
Wok Bos Bilong God i Win
Olsem na inap oltaim, dispela pasin bilong ol man long traim bosim wokabaut bilong ol yet na sakim wok bos bilong God i kamapim klia olsem wok bos bilong ol man i no inap win. Wok bos bilong God tasol inap kamapim amamas, pasin wanbel, gutpela skin, na laip oltaim. Na tu, Tok Bilong God Jehova, em Baibel, i no inap popaia, na dispela tok i soim olsem yumi stap long “las de” bilong wok bos bilong ol man i sakim wok bos bilong God. (2 Timoti 3:1-5) Pasin bilong Jehova long larim ol man i bosim ol samting na larim pasin nogut na pen na hevi i stap, klostu nau dispela bai pinis.
I no longtaim na God bai kamapim bikpela senis long i stap bilong ol man. Baibel i tok: “Taim ol dispela king i stap yet [ol gavman bilong ol man long nau] God bai i kirapim wanpela kingdom [long heven] na dispela kingdom bai i stap oltaim oltaim [no gat wanpela taim bihain ol man bai bosim graun gen]. Ol arapela king i no inap daunim kingdom bilong God, tasol em bai i daunim ol na bagarapim ol arapela king [ol gavman bilong nau] na kingdom bilong en bai i stap oltaim.”—Daniel 2:44.
As tok bilong Baibel i olsem: Long rot bilong Kingdom bilong heven God Jehova bai kamapim klia olsem i stret em i stap Nambawan Bos. Na em i nambawan bikpela samting Jisas i skulim ol man long en. Em i tok: “Bai ol i autim dispela gutnius bilong kingdom bilong God long olgeta hap bilong graun, bai olgeta lain manmeri i ken harim, na bihain tasol bai las de i kamap.”—Matyu 24:14.
Taim Kingdom bilong God i pinisim wok bos bilong man, husat bai stap yet, na husat bai bagarap? Sindaun 2:21, 22, i tok: “Ol gutpela stretpela man [em ol man i daun long wok king bilong God] bai i stap gut oltaim long graun bilong yumi. Tasol God bai i rausim ol man i save mekim pasin nogut na i no save bihainim em [em ol man i sakim wok king bilong God]. Em bai i kamautim ol, olsem man i kamautim kaikai long gaden bilong en.” God i kirapim man bilong raitim Song long tok olsem: “I no longtaim na bai ol man nogut i lus olgeta. . . . Tasol ol manmeri i daunim nem bilong ol yet, bai God i givim olgeta graun long ol. Bai ol i sindaun gutpela tumas na amamas i stap. Ol stretpela man bai i kisim graun God i givim ol, na bai ol i stap oltaim long en.”—Song 37:10, 11, 29.
Nupela Taim i Gutpela Tru
Long rot bilong Kingdom bilong God, ol man i abrusim bagarap long dispela taim nogut, ol bai stap long graun em God bai rausim ol pasin nogut na pen na hevi long en. God bai givim skul long ol manmeri, na bihain liklik “olgeta samting long graun bai i save tru long Bikpela. Dispela save bai inapim olgeta hap graun olsem solwara i inapim mak bilong en olgeta.” (Aisaia 11:9) Dispela gutpela skul bai mekim na ol man bai stap bel isi na wanbel wantaim. Olsem na bai i no gat moa pasin pait, kilim man, bagarapim man, reip, stil, o sampela narapela pasin nogut.
Bai i gat planti gutpela samting bilong helpim skin bilong ol dispela man bilong bihainim tok em ol bai stap long nupela taim God bai kamapim. Ol samting nogut pasin bilong sakim wok bos bilong God i bin kamapim bai pinis. Sin, ol sik, lapun, na indai bai i no stap moa. Baibel i tok bai i no gat wanpela man i tok, “mi gat sik.” Na tu, Baibel i tok promis olsem: “Ol aipas bai ol i lukluk, na ol yaupas bai ol i harim toktok. Na ol lek nogut bai ol i kalap olsem ol dia, na ol mauspas bai ol i singaut na amamas.” (Aisaia 33:24; 35:5, 6) Bai yumi amamas tru long stap strong long olgeta de—inap oltaim oltaim!
Long pasin sori God bai stiaim ol man i stap long nupela taim bilong ol i ken yusim strong na save bilong ol long mekim graun olgeta i kamap paradais. Bai i no gat moa ol man i no gat haus, pasin bilong stap rabis, na hangre. Aisaia i tok profet olsem: “Ol manmeri bilong mi bai i wokim ol haus na stap long ol. Na bai ol i planim ol gaden wain na wokim wain na dring. Ol birua bai i no inap kam moa na rausim ol manmeri bilong mi na sindaun long ol haus bilong ol na kisim ol gaden wain bilong ol na wokim wain na dring.” (Aisaia 65:21, 22) Tru tumas, “olgeta man wan wan bai i sindaun gut klostu long gaden wain na diwai fik bilong ol, na i no gat wanpela man bai i mekim ol i pret.”—Maika 4:4.
Pasin bilong ol manmeri long bihainim tok, na pasin sori bilong God bai mekim graun i kamap gutpela. Baibel i tok promis olsem: “Ples wesan nating wantaim ples drai bai ol i amamas tru, long wanem, ol naispela plaua bai i kamap na karamapim ol dispela hap. . . . Na ol wara bai i kamap long ples wesan nating na ran i go long olgeta hap.” (Aisaia 35:1, 6) “Planti rais na wit samting i ken kamap long ol gaden.”—Song 72:16.
Olsem wanem long planti bilion man i dai pinis? God bai givim laip gen long ol daiman i stap long tingting bilong em, long wanem, “God bai i kirapim bek ol man i dai pinis, em ol stretpela man na ol man nogut wantaim.” (Aposel 24:15) Tru tumas, ol daiman bai kisim laip gen. Ol bai lainim ol trupela tok bilong wok king bilong God na rot i op long ol i ken stap oltaim oltaim long Paradais.—Jon 5:28, 29.
Long dispela rot, God Jehova bai rausim olgeta pen na hevi, na ol sik, na i dai i bin kalabusim ol man inap long planti tausen yia. Sik na bagarap bilong skin bai i no stap moa! No gat dai moa! God bai “mekim drai wara i stap long ai bilong olgeta bilong ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta.”—KTH 21:3, 4.
Long dispela rot God bai pinisim ol pen na hevi. Em bai bagarapim ol samting nogut bilong dispela graun na kamapim nupela taim em “stretpela pasin tasol bai i stap long en.” (2 Pita 3:13) Tru tumas, dispela em i gutpela nius long harim! Dispela nupela taim i mas kamap hariap. Na bai yumi no wet longpela taim bilong lukim dispela samting. Long rot bilong ol truim bilong ol tok profet bilong Baibel, yumi save olsem nupela taim i stap klostu tru, na pasin bilong God long larim ol pen na hevi i stap i laik pinis.—Matyu 24:3-14.
[Blok long pes 8]
Ol Man i Pundaun Long Wok Bilong Bosim Ol Yet
Wanpela bikman bilong Jemani long bipo, em Helmut Schmidt, i stori long wok bilong ol man long bosim graun na i tok: “Mipela ol manmeri . . . i mekim hap wok tasol bilong bosim graun, na planti taim mipela i no mekim gut dispela wok. . . . No gat wanpela taim bel isi i bin stap long olgeta hap.” Wanpela ripot (Human Development Report 1999) i tok: “Olgeta kantri i tok olsem i stap bilong ol man i wok long bagarap, ol manmeri i no sindaun gut wantaim, pasin raskol i go bikpela moa, pasin pait i strong moa insait long ol famili. . . . Ol hevi bilong nogutim graun i go bikpela, em ol hevi ol gavman i no inap stretim, na ol i hatwok long kisim helpim long sampela narapela gavman.”
[Ol Piksa long pes 8]
“Bai ol i sindaun gutpela tumas na amamas i stap.”—Song 37:11.
[Ol Piksa Kredit Lain long pes 5]
Third from top, mother and child: FAO photo/B. Imevbore; bottom, explosion: U.S. National Archives photo