Kingdom Bilong God—Nupela Gavman Bilong Bosim Graun
“Kingdom bilong God . . . bai i daunim . . . na bagarapim ol arapela king na kingdom bilong en bai i stap oltaim.”—DANIEL 2:44.
1. Yumi inap bilip olsem wanem long Baibel?
BAIBEL em buk bilong kamapim long ples klia ol tok God i givim long ol man. Aposel Pol i tok: “Taim yupela i kisim tok bilong God long maus bilong mipela, yupela i no kisim olsem tok bilong man. Nogat. Yupela i kisim olsem tok tru bilong God.” (1 Tesalonaika 2:13) Baibel i kamapim tok bilong olgeta samting bilong God yumi mas save long en, olsem: Em i tokim yumi long ol pasin bilong God, ol laik bilong em, na ol samting em i laik bai yumi mas mekim. Baibel i kamapim ol gutpela tok stret bilong helpim ol famili, na ol tok bilong helpim yumi long wokabaut stret oltaim. Em i save stori gut long ol tok profet i bin kamap tru long bipo na ol tok profet i wok long kamap tru long nau na ol tok profet bai kamap tru long bihain. Tru tumas, “spirit bilong God yet i bin kamapim olgeta tok i stap long buk bilong God. Na dispela tok em i gutpela samting tru bilong skulim yumi long tok tru na bilong stretim ol manmeri tingting bilong ol i no stret na bilong stretim wokabaut bilong yumi na bilong skulim yumi long ol pasin i stret . . . Olsem na dispela tok i mekim yumi ol manmeri bilong God i kisim tru olgeta gutpela pasin, na em i mekim yumi i redi long mekim olgeta kain gutpela wok.”—2 Timoti 3:16, 17.
2. Olsem wanem Jisas i kamapim strong bikpela as tok bilong Baibel?
2 Nambawan bikpela samting long Baibel em as tok bilong en, olsem: Long rot bilong Kingdom long heven, God bai kamapim long ples klia olsem i stret em i stap Nambawan Bos. Oltaim Jisas i kamapim dispela samting taim em i autim tok. “Jisas i stat long autim tok long ol manmeri. Em i tok olsem, ‘Yupela i mas tanim bel, long wanem, kingdom bilong heven em i kam klostu pinis.’ ” (Matyu 4:17) Em i soim yumi olsem yumi mas ting olsem wanem long Kingdom, em i tok: “Yupela i mas wok pastaim long painim kingdom bilong God wantaim stretpela pasin bilong em. Na bihain bai em i givim dispela olgeta arapela samting tu long yupela.” (Matyu 6:33, Nupela Testamen na Ol Sam) Na em i mekim narapela samting tu bilong soim yumi olsem Kingdom i bikpela samting tru—em i skulim ol disaipel long beten long God olsem: “Kingdom bilong yu i mas i kam. Mipela i mas bihainim laik bilong yu long graun olsem ol i save bihainim long heven.”—Matyu 6:10.
Nupela Gavman Bilong Bosim Graun
3. Bilong wanem Kingdom bilong God i bikpela samting tru long yumi nau long dispela taim?
3 Bilong wanem Kingdom bilong God i bikpela samting tru long ol man? Long wanem, liklik taim nau na em bai kirap mekim wanpela samting em bai senisim pasin bilong bosim dispela graun inap long olgeta taim bihain. Tok profet long Daniel 2:44 i tok: “Taim ol dispela king i stap yet [em ol i bosim graun long nau] God bai i kirapim wanpela kingdom [em wanpela gavman long heven] na dispela kingdom bai i stap oltaim oltaim. Ol arapela king i no inap daunim kingdom bilong God, tasol em bai i daunim ol na bagarapim ol arapela king [em ol gavman bilong graun] na kingdom bilong en bai i stap oltaim.” Taim Kingdom bilong God long heven i kirap na bosim graun olgeta, ol man bilong graun i no ken bosim graun moa. Ol wok gavman bilong ol man i save brukim ol lain na i no kamapim gutpela sindaun, ol bai pinis olgeta na i no ken kamap moa.
4, 5. (a) Bilong wanem Jisas em inap tru long i stap King bilong Kingdom? (b) Liklik taim nau na Jisas bai kisim wanem wok?
4 Nambawan King long Kingdom bilong heven, i stap aninit long Jehova, em wanpela man em inap tru long holim dispela wok—em Krais Jisas. Taim em i no kam daun yet long graun, em i bin i stap long heven na God i makim em olsem “saveman i bosim wok,” long wanem, God i bin wokim em paslain long olgeta narapela samting. (Sindaun 8:22-31) “Em i piksa tru bilong dispela God yumi no inap lukim, na God i bin wokim em paslain long olgeta narapela samting; long wanem, long rot bilong em olgeta narapela samting i bin kamap long heven na long graun.” (Kolosi 1:15, 16, NW ) Na taim God i salim Jisas i kam daun long graun, em i mekim laik bilong God long olgeta taim. Planti bikpela traim na hevi i bin painim em, tasol em i sanap strong na i stap gut long Papa bilong em i go inap long taim em i dai.—Jon 4:34; 15:10.
5 Jisas i stap gut long God i go inap long taim em i dai, olsem na em i kisim gutpela pe. God i kirapim em bek na em i go antap long heven, na God i makim em long kamap King long Kingdom bilong heven. (Aposel 2:32-36) Krais Jisas i stap King bilong Kingdom, olsem na God bai givim wanpela bikpela wok tru long em, olsem em i mas go pas long ol planti milion milion strongpela ensel na rausim olgeta wok gavman bilong ol man na pinisim olgeta pasin nogut i stap long graun. (Sindaun 2:21, 22; 2 Tesalonaika 1:6-9; KTH 19:11-21; 20:1-3) Orait bihain long dispela, Kingdom bilong God em Krais i bosim, em bai stap olsem nupela gavman, na dispela gavman tasol bai bosim olgeta hap bilong graun.—KTH 11:15.
6. Yumi ken ting King bilong Kingdom bai mekim wanem kain wok long bosim ol man?
6 Baibel i tok long dispela nupela King bilong bosim graun: “Dispela Man bilong bipo bipo yet i mekim em i kamap king na i givim em strong na biknem. Na em bai i stap king i gat strong oltaim oltaim, na wok king bilong en bai i no inap pinis. Na olgeta manmeri bilong olgeta kantri na olgeta lain na olgeta tok ples bai i stap aninit long en.” (Daniel 7:14) Jisas bai bihainim pasin sori bilong God, olsem na bai i gat bel isi na amamas moa yet aninit long wok gavman bilong em. (Matyu 5:5; Jon 3:16; 1 Jon 4:7-10) “Strong bilong gavman bilong en bai i wok long kamap bikpela oltaim, na bai i no gat pait na ol manmeri bai i sindaun gut oltaim. . . . Bikpela I Gat Olgeta Strong i gat strongpela laik tru long mekim gut long ol manmeri bilong en, olsem na em bai i mekim ol dispela samting i kamap.” (Aisaia 9:7) Em nau, bai yumi gat wanpela King i bosim ol man long pasin sori na stretpela pasin! Em gutpela samting tru, a? Olsem na 2 Pita 3:13 i tok profet olsem: “God i promis pinis long em bai i wokim nupela skai [em Kingdom bilong God long heven] na nupela graun [em nupela lain bilong graun], na stretpela pasin tasol bai i stap long en. Yumi wet long dispela samting tasol i mas kamap.”
7. Olsem wanem truim bilong Matyu 24:14 i wok long kamap long nau?
7 Tru tumas, tok bilong Kingdom bilong God em i nambawan gutpela tok long ol man i save laikim tumas ol pasin i stret. Olsem na taim Jisas i kolim mak bai kamap bilong makim olsem yumi stap nau long “taim bilong las de” bilong dispela pasin nogut bilong graun, em i tok profet olsem: “Bai ol i autim dispela gutnius bilong kingdom bilong God long olgeta hap bilong graun, bai olgeta lain manmeri i ken harim, na bihain tasol bai las de i kamap.” (2 Timoti 3:1-5; Matyu 24:14) Dispela tok profet i wok long kamap tru long nau—inap olsem 6 milion Witnes Bilong Jehova i stap long 234 kantri, ol i lusim wan bilion aua samting long olgeta yia long tokim ol man long Kingdom bilong God. Olsem na olgeta haus em 90,000 kongrigesen bilong ol i save bung long en bilong lotuim God, ol i save kolim olsem Haus Kingdom. Ol manmeri i save kam long ol dispela haus bambai ol i ken lain na kisim save long dispela nupela gavman em bai kamap.
Ol Nambatu King
8, 9. (a) Dispela lain bai mekim wok king wantaim Krais ol i bilong we? (b) Yumi ken bilip olsem wanem long wok bilong dispela King na ol lain i wok king wantaim em long bosim graun?
8 Bai i gat ol nambatu king i wok wantaim Krais Jisas long Kingdom bilong God long heven. Kamapim Tok Hait 14:1-4 i tok profet olsem i gat 144,000 manmeri “God i bin baim bek ol namel long olgeta manmeri bilong graun,” na ol i bilong kirap bek na go antap long heven. Insait long dispela lain i gat ol man na meri i gat pasin daun na ol i mekim wok bilong God na wok bilong helpim ol man, na ol i no bin tingting long ol man i mas mekim wok bilong helpim ol. “Ol bai i stap pris bilong God na bilong Krais. Na ol bai i stap king wantaim Krais long dispela 1,000 yia.” (KTH 20:6) Ol i liklik lain tru, i no olsem dispela lain ‘planti manmeri tru i no inap man i kaunim namba bilong ol. Dispela ol manmeri ol i bilong olgeta lain man na bilong olgeta kantri na bilong olgeta kain skin na bilong olgeta tok ples,’ na ol bai abrusim bagarap long taim dispela pasin nogut bilong graun i pinis. Ol tu ‘i save stap long haus bilong God na mekim wok bilong en long san na long nait,’ tasol God i no bin singautim ol bilong i go long heven, nogat. (KTH 7:9, 15) Ol i stap olsem as lain bilong nupela graun, na ol bai stap aninit long Kingdom bilong God long heven.—Song 37:29; Jon 10:16.
9 Taim Jehova i laik makim lain bilong mekim wok king wantaim Krais long heven, em i makim ol man i stap gut long em na ol kain kain hevi bilong dispela graun i bin painim ol. Olgeta hevi samting i bin painim ol manmeri bilong graun, ol i bin painim dispela lain i bilong i stap king na pris. Olsem na i stap bilong ol long graun bai helpim ol long mekim gut wok bilong bosim ol man bilong graun. Jisas tu i bin “karim pen, na dispela i skulim em tru long pasin bilong bihainim tok bilong God.” (Hibru 5:8) Aposel Pol i tok long em olsem: “Yumi no ken ting, dispela hetpris bilong yumi em i no inap sori long yumi. Nogat. Olgeta traim i save kamap long yumi, dispela olgeta i bin kamap pinis long em bilong traim em tu. Tasol em i no mekim sin.” (Hibru 4:15) Em nau, long nupela taim God bai kamapim na i gat stretpela pasin tasol long en, ol king na pris bai bosim ol man long pasin sori. Dispela save i strongim tru bel bilong yumi, a?
Long Pastaim Tru God i Gat Laik Long Kamapim Kingdom?
10. Bilong wanem Kingdom bilong heven i no insait long laik bilong God long pastaim tru?
10 Taim God i wokim Adam na Iv, em i gat laik long kamapim Kingdom bilong heven o nogat? Long stori bilong Buk Stat long God i bin wokim olgeta samting, i no gat sampela tok long wanpela Kingdom bai bosim ol man. Jehova yet i stap King bilong ol, na sapos ol i bihainim tok bilong em, i no gat wok long narapela gavman i mas bosim ol. Stat sapta 1 i soim yumi olsem, long rot bilong namba wan Pikinini bilong em long heven, Jehova i bosim Adam na Iv. Long stori bilong Buk Stat yumi save lukim kain tok olsem “God i tokim ol olsem,” na “God i tok olsem” long ol.—Stat 1:28, 29; Jon 1:1.
11. Long pastaim tru, olsem wanem i stap bilong ol man i nambawan olgeta?
11 Baibel i tok: “God i lukim olgeta dispela samting i gutpela, na em i amamas tru.” (Stat 1:31) Olgeta samting long gaden Iden i nambawan olgeta. Adam tupela Iv i sindaun long wanpela ples paradais. Tingting na skin bilong ol i gutpela olgeta. Ol inap toktok wantaim Man i bin wokim ol, na em inap toktok wantaim tupela. Na sapos tupela i stap gut long Em, ol bai kamapim ol pikinini i gutpela olgeta. Olsem bai i no gat wok long kamapim wanpela nupela gavman bilong heven.
12, 13. Taim ol man i gutpela olgeta i kamap planti long graun, olsem wanem God inap wok yet long givim tok long ol?
12 Orait taim ol man i wok long kamap planti long graun, olsem wanem God bai givim tok long dispela lain olgeta? Tingim ol sta i stap antap. Planti sta ol i save bung wantaim olsem wanpela lain sta. Sampela lain sta olsem ol i gat wan bilion sta long en. Sampela i gat olsem wan trilion sta. Na ol man bilong saiens i ting i gat olsem 100 bilion lain sta long hap bilong ples antap em ol i save long en! Tasol Man bilong wokim ol samting i tok: “Yupela lukluk i go antap long skai na lukim ol sta samting i stap antap. Husat tru i bin wokim ol? Em Bikpela tasol. Ol dispela samting i olsem lain ami bilong Bikpela. Em i save long namba bilong ol, na em i save long nem bilong wan wan bilong ol, na em i save kolim ol long nem bilong ol. Em i gat olgeta strong, olsem na i no gat wanpela bilong ol dispela samting inap lus.”—Aisaia 40:26.
13 God i save long olgeta wan wan sta i stap antap, olsem na i no hatwok long em long save long olgeta wan wan man bilong graun, em ol i no planti olsem ol sta. Long nau planti milion wokman bilong em ol i save beten long em long olgeta de. Ol dispela beten i save go kamap long God wantu tasol. Olsem na i no hatwok long em long toktok wantaim olgeta man bilong graun em ol i gutpela olgeta. Em bai i no gat wok long wanpela Kingdom bilong heven na bai em i ken save long olgeta wan wan bilong ol, nogat. Jehova bai stap King bilong ol, na ol inap toktok wantaim em, na ol i gat rot long i stap oltaim oltaim long Paradais long graun na i no ken i dai! Em i gutpela samting tru, a?
“Mipela Man i No Inap”
14. Bilong wanem ol man bilong graun i mas i gat ol lo bilong Jehova i bosim ol long olgeta taim?
14 Tasol ol man bilong graun—maski ol i gutpela olgeta—long olgeta taim ol i mas i gat ol lo bilong Jehova i bosim ol. Bilong wanem i olsem? Long wanem, taim Jehova i wokim ol, em i no bin inapim ol long bosim ol yet na mekim gut dispela wok, nogat. I gat wanpela lo i sutim stret ol man bilong graun, olsem profet Jeremaia i tokaut long en: “Bikpela, mi save, mipela man i no inap bosim wokabaut bilong mipela yet na bihainim ol rot mipela i laikim. Bikpela, yu ken stretim mipela.” (Jeremaia 10:23, 24) Ol man bai kranki stret sapos ol i ting ol yet inap bosim gut ol lain bilong graun na i no gat wok long Jehova i bosim ol. Dispela bai i narapela kain tru long pasin Jehova i bin putim long ol taim em i wokim ol. Sapos ol i laik bosim ol yet, dispela bai kamapim pasin bilong tingim ol yet tasol, pasin birua, mekim nogut long ol man, pait na bagarapim man, ol bikpela pait, na indai. ‘Ol bikman bai wok long daunim ol arapela manmeri na mekim nogut long ol.’—Saveman 8:9.
15. Tupela tumbuna bilong pastaim i bin makim rot nogut long bihainim, olsem na wanem samting i kamap?
15 Tasol sori tru, tupela tumbuna bilong pastaim ol i ting ol i no gat wok long God i stap King bilong ol, na ol yet i laik bosim sindaun bilong ol. Olsem na God i no givim strong moa long ol bilong i stap gutpela olgeta. Nau tupela i olsem wanpela masin i wok long paua na ol i katim rop em paua i save kam long en. Olsem na isi isi strong bai lusim skin bilong ol, na bihain em bai pinis olgeta long skin na ol bai i dai. Tupela i olsem wanpela sospen samting i gat mak bilong sampela bagarap i stap long en, olsem na taim ol i kamapim ol pikinini, ol mak bilong dispela bagarap bai i stap long skin bilong ol. (Rom 5:12) “[God] em i olsem wanpela bikpela strongpela ston i no save senis. . . . Pasin bilong en i gutpela na stretpela tasol. Tasol . . . yupela i manmeri bilong mekim sin tasol. Olsem na yupela i no inap i stap lain pikinini bilong God.” (Lo 32:4, 5) Tru, dispela ensel bilong bikhet bihain em i kamap Satan, em i bin pulim Adam na Iv, tasol tingting bilong tupela i gutpela olgeta, olsem na ol inap tru long sakim ol tok giaman em i bin givim long ol.—Stat 3:1-19; Jems 4:7.
16. Ol samting i bin kamap long graun i kamapim klia olsem taim ol man i bosim i stap bilong ol yet, wanem samting i save kamap?
16 Ol samting i bin kamap long graun i kamapim klia tru ol samting nogut i save kamap taim ol man i bosim i stap bilong ol yet. Inap planti tausen yia pinis, ol man i bin traim ol kain kain gavman na kain kain pasin bilong bosim ol samting bilong mani na sindaun bilong ol man. Tasol pasin nogut i wok long “kamap nogut tru.” (2 Timoti 3:13) Ol samting i bin kamap namel long yia 1900 na yia 2000 i kamapim klia dispela samting. Insait long ol dispela yia, pasin birua nogut tru i kamap, na tu, pasin bilong bagarapim man, ol bikpela pait, hangre, planti man i stap rabis, bikpela pen na hevi, ol dispela pasin i bin kamap bikpela moa yet, winim olgeta taim bipo. Na maski ol dokta i kisim bikpela save long stretim ol sik samting, olgeta man i save dai. (Saveman 9:5, 10) Ol man i laik bosim wokabaut bilong ol yet, olsem na ol i larim ol yet i kamap olsem abus bilong Satan wantaim ol spirit nogut bilong em. Long dispela as Baibel i kolim Satan olsem “giaman god bilong dispela graun.”—2 Korin 4:4.
Ol i Ken Tingim Ol Samting Ol i Laik Mekim
17. God i larim ol man i stap fri long tingim ol samting ol i laik mekim, tasol ol i mas mekim wanem kain wok long dispela gutpela presen?
17 Bilong wanem Jehova bai larim ol man i bihainim rot ol yet i laikim? Long wanem, taim em i wokim ol, em i givim wanpela gutpela presen tru long ol, olsem em inapim ol long i stap fri long tingim wanem samting ol i laik mekim. Aposel Pol i tok: “Sapos Spirit bilong Bikpela i stap long wanpela man, orait i no gat wanpela samting i pasim dispela man. Nogat. Em i stap fri.” (2 Korin 3:17) Ol man i no laik i stap olsem wanpela masin robot na wanpela man bai makim olgeta samting na olgeta tok em bai mekim long olgeta wan wan de. Tasol Jehova i laik bai ol man i mekim gutpela wok long dispela presen na ol i ken pilim tru olsem em i pasin bilong gutpela tingting long ol i mas mekim laik bilong em na stap aninit long em. (Galesia 5:13) Olsem na ol i no stap fri olgeta, long wanem, sapos ol i stap olsem, bai i no gat lo na ol bai mekim nabaut long laik bilong ol yet. Em nau, God i putim ol lo bilong helpim ol man na ol i ken i stap fri inap long dispela mak.
18. God i larim ol man bilong graun i bihainim rot ol yet i laikim, na long dispela pasin God i kamapim long ples klia wanem samting?
18 God i larim ol man i bihainim rot ol yet i laikim, na long dispela pasin God i kamapim long ples klia olsem em i mas bosim yumi. Pasin bilong em long bosim ol man, olsem wok king bilong em, dispela tasol i stret. Dispela pasin i save kamapim bikpela amamas, na belgut, na gutpela sindaun, long wanem, Jehova i bin wokim tingting na skin bilong yumi bambai ol i ken wok gut taim ol i mekim ol samting i stret wantaim ol lo bilong em. “Mi God, Bikpela bilong yupela. Oltaim mi save skulim yupela na soim yupela long ol stretpela pasin yupela i mas bihainim na bai yupela i stap gut.” (Aisaia 48:17) Taim God i larim ol man i makim ol samting ol i laik mekim inap long mak bilong ol lo bilong God, dispela i no inap putim hevi long ol, nogat. Dispela bai mekim na ol bai wokim ol kain kain gutpela kaikai, na haus, na piksa, na musik. Taim ol i mekim stretpela wok long pasin bilong i stap fri, sindaun bilong ol long Paradais long graun bai i gutpela tru.
19. God i mekim wok long wanem rot bambai em i ken helpim ol man long kamap wanbel gen wantaim em?
19 Tasol ol man i makim rot nogut bilong bihainim, olsem na ol i mekim ol yet i kamap birua bilong God, na nau ol i no gutpela olgeta, na skin bilong ol i wok long bagarap, na ol i dai. Dispela i mekim na i mas i gat man bilong kisim bek ol long bikpela hevi na helpim ol long pas gut gen wantaim God olsem ol pikinini man na pikinini meri bilong em. Rot God i makim bilong mekim olsem, em Kingdom, na Man bilong kisim bek ol, em Jisas Krais. (Jon 3:16) Long dispela rot, ol man i tanim bel tru—olsem dispela yangpela man long tok piksa bilong Jisas em i bin lusim papa—ol bai kamap wanbel gen wantaim God na em bai kisim bek ol olsem ol pikinini bilong em.—Luk 15:11-24; Rom 8:21; 2 Korin 6:18.
20. Olsem wanem God bai kamapim tru laik bilong em long rot bilong Kingdom?
20 Jehova bai kamapim tru laik bilong em long graun. (Aisaia 14:24, 27; 55:11) Long rot bilong Kingdom bilong em i stap long han bilong Krais, God bai kamapim long ples klia olsem i stret em i stap King bilong yumi. Kingdom bai pinisim wok bilong ol man na ol spirit nogut long bosim dispela graun, na Kingdom wanpela tasol bai bosim graun inap long wan tausen yia. (Rom 16:20; KTH 20:1-6) Tasol insait long dispela wan tausen yia, olsem wanem Jehova bai kamapim klia olsem pasin bilong em long bosim graun i win tru? Na taim dispela wan tausen yia i pinis, Kingdom bai mekim wanem wok? Stori i kamap bihain long dispela bai skelim ol dispela askim.
Sampela Tok Bilong Kamapim Gen
• Wanem bikpela as tok bilong Baibel?
• Husat ol i insait long nupela gavman bilong bosim graun?
• Taim ol man yet i bosim graun, bilong wanem wok bilong ol i no inap kamap gutpela?
• Yumi stap fri long tingim ol samting yumi laik mekim, tasol yumi mas mekim wanem kain wok long en?
[Piksa long pes 10]
Taim Jisas i skulim ol man, em i kamapim strong olsem God bai bosim graun long rot bilong Kingdom
[Ol Piksa long pes 12]
Long olgeta kantri, Kingdom em i nambawan samting ol Witnes Bilong Jehova i save skulim ol man long en
[Ol Piksa long pes 14]
Ol samting i bin kamap long graun i kamapim klia tru ol samting nogut i save kamap taim ol man i bosim i stap bilong ol yet
[Ol Kredit Lain]
WWI soldiers: U.S. National Archives photo; concentration camp: Oświęcim Museum; child: UN PHOTO 186156/J. Isaac