Sapta 10
Wanpela Kingdom “i No Ken Bagarap”
1. Ol samting i kamap long graun long bipo yet i kam inap nau i bin kamapim klia wanem samting?
OL SAMTING i kamap long olgeta de i kamapim klia olsem ol man i no stap amamas taim ol i sakim wok bos bilong Jehova na bosim wokabaut bilong ol yet. I no gat wanpela gavman i bin mekim wankain gutpela pasin long olgeta lain man bilong helpim ol. Ol man i kisim bikpela save tru long saiens, tasol ol i no bin pinisim ol sik o helpim wanpela man long abrusim i dai, nogat. Ol gavman bilong man i no bin pinisim woa, pasin bilong pait na bagarapim man, pasin raskol, pasin giaman, o pasin bilong i stap rabis. Ol gavman nogut i bosim yet ol manmeri long planti kantri. (Saveman 8:9) Ol i kamapim kain kain masin, ol i mangal long kisim planti samting, na save bilong ol i sot, na ol dispela samting i mekim na ol i bagarapim graun, win, na wara. Ol bikman i no lukautim gut ol samting bilong mani, olsem na planti man i sot long ol samting ol i mas kisim. Ol man i bin bosim graun inap planti tausen yia, na wok bilong ol i kamapim klia olsem tok bilong Jeremaia i tru: “Mipela man i no inap bosim wokabaut bilong mipela yet na bihainim ol rot mipela i laikim.”—Jeremaia 10:23.
2. Wanem samting tasol inap stretim hevi bilong ol man?
2 I gat wanem rot bilong stretim? Kingdom bilong God tasol, em dispela Kingdom Jisas i lainim ol disaipel long beten askim God long en: “Kingdom bilong yu i mas i kam. Mipela i mas bihainim laik bilong yu long graun olsem ol i save bihainim long heven.” (Matyu 6:9, 10) Long 2 Pita 3:13, Baibel i tok Kingdom bilong God i olsem “nupela skai” i bosim “nupela graun,” olsem ol manmeri i bihainim stretpela pasin. Kingdom bilong God long heven i bikpela samting, olsem na em i nambawan bikpela tok Jisas i autim tok long en. (Matyu 4:17) Em i kamapim klia yumi mas ting olsem wanem long Kingdom, na em i tok: “Yupela i mas painim kingdom pastaim wantaim stretpela pasin bilong en.”—Matyu 6:33, Nupela Testamen na Ol Sam.
3. Bilong wanem em i bikpela samting long kisim save nau long Kingdom bilong God?
3 Em i bikpela samting long kisim save long Kingdom bilong God long nau, long wanem, klostu nau dispela Kingdom bai kirap na senisim tru wok gavman hia long graun. Daniel 2:44 i tok: “Taim ol dispela king i stap yet [ol gavman i bosim ol man long nau] God bai i kirapim wanpela kingdom [long heven] na dispela kingdom bai i stap oltaim oltaim. Ol arapela king i no inap daunim kingdom bilong God, tasol em bai i daunim ol [ol man bai no ken bosim graun moa] na bagarapim ol arapela king [bilong nau] na kingdom bilong en bai i stap oltaim.” Olsem na Kingdom bai pinisim pasin nogut bilong dispela graun, na long dispela rot em bai pinisim dispela taim bilong las de. Long dispela taim bai i no gat wanpela man i sakim wok bilong Kingdom bilong heven long bosim graun. Yumi mas amamas tru olsem klostu nau dispela Kingdom bai pinisim ol hevi!
4. Long ol samting bilong Kingdom, wanem samting i kamap long heven long 1914? Bilong wanem dispela em i bikpela samting long yumi?
4 Long 1914, Krais Jisas i kamap king na em i kisim namba long “bosim ol birua bilong [em].” (Song 110:1, 2) Na tu, long dispela yia “taim bilong las de” bilong pasin nogut bilong dispela graun i kirap. (2 Timoti 3:1-5, 13) Long dispela wankain taim, ol samting Daniel i bin lukim long driman na i makim samting bai kamap bihain, ol i kamap tru long heven. Dispela “Man bilong bipo bipo yet,” em God Jehova, em i givim ‘wok king na strong na biknem’ long Jisas Krais, na bai “olgeta manmeri bilong olgeta kantri na olgeta lain na olgeta tok ples bai i stap aninit long en.” Daniel i stori moa long ol samting em i lukim olsem driman: “Em bai i stap king i gat strong oltaim oltaim, na wok king bilong en bai i no inap pinis.” (Daniel 7:13, 14) Long rot bilong dispela Kingdom long han bilong Krais Jisas, God bai helpim ol man i laikim tumas stretpela pasin long kisim ol gutpela gutpela samting God i laik bai ol man i mas kisim taim em i putim namba wan man na meri long Paradais.
5. Yumi laik save long wanem ol samting bilong Kingdom? Bilong wanem yumi laik save?
5 Olsem wanem? Yu laik i stap gut aninit long dispela Kingdom? Sapos olsem, ating yu gat laik long save gut long dispela gavman bilong heven na wok bilong en. Yu laik save dispela Kingdom i mekim wanem wok long nau, na em bai mekim wanem samting long bihain, na yu yet i mas mekim wanem. Taim yu skelim gut ol samting bilong dispela Kingdom, bai yu amamas moa long en. Sapos yu daun long wok bos bilong en, bai yu inap tru long tokim ol narapela manmeri long ol gutpela samting Kingdom bilong God bai kamapim bilong helpim ol manmeri i save harim tok.—Song 48:12, 13.
Lain i Bosim Kingdom Bilong God
6. (a) Baibel i mekim wanem tok bilong soim olsem Kingdom i kamapim wok king bilong husat? (b) Save yumi kisim long Kingdom i mas mekim wanem long yumi?
6 Taim yu skelim dispela Kingdom, wanpela samting yu bai kisim save long en i olsem: Dispela Kingdom long han bilong Krais i kamapim wok king bilong Jehova yet. Jehova yet i givim ‘wok king na strong na biknem’ long dispela Pikinini bilong em. Taim Pikinini bilong God i kisim pinis strong bilong mekim wok King, sampela maus long heven i tok: “Bikpela bilong yumi [God Jehova] wantaim dispela man em i makim bilong kisim bek ol manmeri bilong en, tupela i kamap king bilong olgeta hap bilong graun. Na em [Jehova] bai i stap king oltaim oltaim!” (KTH 11:15) Olsem na olgeta save yumi kisim long dispela Kingdom na ol gutpela samting em i kamapim i pulim yumi i go klostu moa long Jehova yet. Ol samting yumi kisim save long en i mas kirapim laik bilong yumi long daun long wok king bilong em inap oltaim oltaim.
7. Bilong wanem yumi tingim tru wok bilong Jisas Krais long i stap Nambatu King bilong Jehova?
7 Tingim tu olsem Jehova i bin putim Jisas Krais i stap Nambatu King. God i givim wok long dispela Saveman long wokim graun na ol man, olsem na Jisas i save tru long wanem ol samting yumi mas kisim bilong helpim yumi long i stap gut, winim yumi yet. Na kirap long taim ol manmeri i kamap, Jisas i kamapim klia olsem em i ‘amamas long lukim ol manmeri.’ (Sindaun 8:30, 31; Kolosi 1:15-17) Em i laikim tru ol manmeri, olsem na em i kam daun long graun na givim laip bilong em olsem ofa bilong helpim yumi. ( Jon 3:16) Long dispela rot yumi inap lusim kalabus bilong sin na i dai na yumi ken i stap oltaim oltaim.—Matyu 20:28.
8. (a) Ol gavman bilong graun i no save stap oltaim, orait olsem wanem na Kingdom bilong God bai i stap oltaim? (b) Lain “wokboi i gat gutpela tingting” i gat wanem wok long Kingdom?
8 Kingdom bilong God em i wanpela gavman i no inap senis na em bai i stap inap oltaim. Jehova yet i no inap i dai, olsem na dispela gavman tu i no inap pinis. (1 Timoti 1:17) Na Jisas Krais tu, em God i putim em i stap king, em i no inap i dai; em i no olsem ol king bilong dispela graun. (Rom 6:9; 1 Timoti 6:15, 16) I gat 144,000 gutpela wokboi bilong God em ol bai mekim wok king wantaim Krais long heven. Ol i bilong “olgeta lain man, na bilong olgeta tok ples, na bilong olgeta kain skin, na bilong olgeta kantri.” Ol tu i kisim laip i stap oltaim oltaim na ol i no inap i dai. (KTH 5:9, 10; 14:1-4; 1 Korin 15:42-44, 53) Planti bilong ol i go pinis long heven, na liklik hap lain tasol, olsem lain remnan, ol i stap yet long graun. Dispela lain em “wokboi i gat gutpela tingting” na ol i lukautim gut wok bilong dispela Kingdom hia long graun.—Matyu 24:45-47.
9, 10. (a) Kingdom bai pinisim wanem ol samting nogut? (b) Sapos yumi no laik kamap birua bilong Kingdom bilong God, yumi no ken insait long wanem ol lain?
9 Klostu nau, long taim Jehova i makim, em bai salim ami bilong em bilong pinisim ol samting nogut long graun. Ol bai pinisim tru ol man i sakim wok king bilong God, em ol man i no save tingim ol gutpela samting em i bin mekim long rot bilong Jisas Krais. (2 Tesalonaika 1:6-9) Dispela em i de bilong Jehova long kamapim long ples klia olsem em i King bilong heven na graun, em dispela de yumi bin wetim inap longtaim pinis. “Tru tumas, dispela taim nogut tru i kam nau, em i taim Bikpela i bin makim bilong kam wantaim bikpela belhat bilong en . . . na pinisim tru olgeta man na meri i save mekim sin.” (Aisaia 13:9) “Long dispela De, belhat bilong God bai i kamap ples klia, na bai ol manmeri i gat bikpela hevi na bel nogut, na bai ol samting i bagarap nabaut. Na ol klaut bai i karamapim san na bikpela tudak bai i kamap.”—Sefanaia 1:15.
10 Olgeta lotu giaman na olgeta gavman bilong graun wantaim ol ami bilong ol em Satan i bosim, ol bai pinis olgeta. Olgeta manmeri i bihainim pasin bilong dispela graun na i tingim ol yet tasol, na mekim pasin giaman, na pasin pamuk, ol bai bagarap na pinis olgeta. Satan na ol spirit nogut bilong em bai i no inap bosim moa ol man—ol bai kalabus inap wan tausen yia. Em nau, Kingdom bilong God bai bosim olgeta samting long graun. Olgeta manmeri i laikim tru stretpela pasin bai i amamas tru long dispela samting!—KTH 18:21, 24; 19:11-16, 19-21; 20:1, 2.
Ol Samting Kingdom i Laik Kamapim—Rot Bilong Mekim
11. (a) Olsem wanem Kingdom i stap long han bilong Mesaia bai kamapim ol samting God i tingting pinis long mekim long graun? (b) Taim Kingdom i bosim graun, olsem wanem long ol manmeri i stap long graun long dispela taim?
11 Kingdom i stap long han bilong Mesaia bai kamapim tru ol samting God i tingting pinis long mekim long graun. (Stat 1:28; 2:8, 9, 15) I kam inap long nau, ol man i no bin mekim ol samting God i laik bai ol i mas mekim. Tasol God i putim Pikinini bilong em, Jisas Krais, i stap bos bilong “nupela Graun God bai i mekim kamap bihain.” Olgeta manmeri i abrusim bagarap taim Jehova i mekim kot long pasin nogut bilong dispela graun, ol bai wok gut wantaim aninit long Krais, em i King. Bai ol i amamas long mekim olgeta samting em i tokim ol long mekim, na bai olgeta hap bilong graun i kamap gutpela ples Paradais. (Hibru 2:5-9) Olgeta manmeri bai amamas long wok ol i mekim long han bilong ol, na graun bai kamapim planti kaikai inap tru long ol.—Song 72:1, 7, 8, 16-19; Aisaia 65:21, 22.
12. Olsem wanem skin na tingting bilong ol manmeri i stap aninit long Kingdom bai kamap gutpela olgeta?
12 Taim God i wokim Adam na Iv, tupela i gutpela olgeta, na God i laik bai tupela i kamapim planti pikinini na i go sindaun long olgeta hap, na tingting na skin bilong olgeta man bai gutpela olgeta. Dispela gutpela samting bai kamap tru taim Kingdom i bosim graun. Olsem na ol samting nogut sin i kamapim i mas pinis, na bilong kamapim dispela samting Krais i mekim wok King, na tu, em i mekim wok olsem Hetpris. Long pasin isi em i helpim ol manmeri na bai ofa bilong em i ken tekewe sin bilong ol.
13. Wanem ol gutpela samting bai kamap long skin bilong ol man taim Kingdom i bosim graun?
13 Taim Kingdom i bosim graun, skin bilong ol manmeri bilong graun bai kamap gutpela tru. “Ol aipas bai ol i lukluk, na ol yaupas bai ol i harim toktok. Na ol lek nogut bai ol i kalap olsem ol dia, na ol mauspas bai ol i singaut na amamas.” (Aisaia 35:5, 6) Ol manmeri i lapun o i gat sik, skin bilong ol bai kamap gutpela olsem bilong pikinini, na ol man bai i no gat moa ol bikpela sik na ol bai kisim strongpela skin. “Bodi bilong dispela man bai i kamap gutpela na strongpela gen, wankain olsem em i bin i stap long taim em i yangpela man.” ( Jop 33:25) Taim bai kamap na i no gat wanpela man bai tok, “Mi gat sik.” Bilong wanem? Long wanem, sin na ol samting nogut sin i bin kamapim bai tekewe long ol manmeri i save pret long God na stap aninit long em. (Aisaia 33:24; Luk 13:11-13) Yes, God “bai i mekim drai wara i stap long ai bilong olgeta bilong ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta.”—KTH 21:4.
14. Wanem samting i mekim na man i kamap gutpela olgeta?
14 Tasol bilong kamap gutpela olgeta, i no olsem tingting na skin tasol i gutpela. Ol man i mas bihainim tu ol pasin bilong Jehova, long wanem, God i wokim man ‘i kamap olsem God.’ (Stat 1:26) Olsem na bai i gat bikpela wok long skulim ol man. Long nupela taim “stretpela pasin tasol bai i stap.” Olsem profet Aisaia i tok, ‘ol manmeri bilong graun bai lain long stretpela pasin.’ (2 Pita 3:13; Aisaia 26:9) Dispela pasin i save kamapim bel isi—namel long olgeta lain man, ol pren, na famili, na bikpela samting moa, ol man bai stap wanbel wantaim God. (Song 85:10-13; Aisaia 32:17) Ol manmeri i lain long bihainim stretpela pasin, na isi isi ol bai lain long ol samting God i laik bai ol i mas mekim. Pasin bilong laikim tru Jehova bai kamap strong long bel bilong ol, na ol bai bihainim ol lo bilong em long olgeta wokabaut bilong ol. Bai ol inap long mekim wankain tok olsem Jisas i bin mekim: ‘Oltaim mi save mekim ol samting Papa i laikim.’ ( Jon 8:29) Taim olgeta manmeri i mekim olsem, sindaun bilong yumi bai gutpela tru!
Ol Gutpela Wok Kingdom i Mekim Pinis
15. Mekim wok long ol askim i stap long dispela paragraf, na stori long ol gutpela samting Kingdom i bin mekim, na kamapim ol samting yumi mas mekim long nau.
15 Ol gutpela wok dispela Kingdom na ol man i aninit long en i mekim i stap ples klia. Ol askim na skripsa hia bai kirapim yu long tingim sampela gutpela wok Kingdom i mekim pinis, na ol samting olgeta man i stap aninit long Kingdom inap mekim na i mas mekim long nau.
Kingdom i rausim wanem birua pastaim? Wanem samting i kamap long dispela? (KTH 12:7-10, 12)
Taim Krais i kamap King pinis, em i kirap bungim ol laspela manmeri bilong wanem lain? (KTH 14:1-3)
Long Matyu 25:31-33, Jisas i tok profet long wanem narapela wok em i mas mekim bihain long taim bilong bikpela hevi tru i kirap?
Ol i mekim wanem wok long nau? Husat ol i insait long en? (Song 110:3; Matyu 24:14; KTH 14:6, 7)
Bilong wanem ol birua insait long ol gavman na lotu ol i no inap pasim wok autim tok? (Sekaraia 4:6; Aposel 5:38, 39)
Wanem ol senis i kamap long i stap bilong ol man i daun long Kingdom? (Aisaia 2:4; 1 Korin 6:9-11)
Kingdom i Stap Inap Wan Tausen Yia
16. (a) Krais bai mekim wok king inap hamas yia? (b) Wanem ol gutpela samting bai kamap insait long dispela hap taim na bihain long en?
16 Taim Satan na ol spirit nogut i kalabus pinis, Jisas Krais na ol 144,000 wanwok bilong em bai mekim wok king na wok pris inap wan tausen yia. (KTH 20:6) Insait long dispela hap taim, skin na tingting bilong ol manmeri bai i kamap gutpela olgeta, na sin na i dai Adam i bin kamapim bai pinis olgeta. Long pinis bilong Wan Tausen Yia, taim Jisas i bin inapim wok bilong em olsem King na Pris, em bai “putim kingdom long han” bilong Papa bilong em, na “God bai i stap het tru bilong olgeta samting.” (1 Korin 15:24-28) Long dispela taim, Satan bai lusim kalabus inap liklik taim bilong traim ol manmeri, olsem ol bai i stap gut long wok king bilong Jehova o nogat. Taim laspela traim i pinis, Jehova bai bagarapim Satan na ol man i bikhet na i bihainim em. (KTH 20:7-10) Ol manmeri i bin daun long wok bos bilong Jehova—olsem em i gat rait long bosim ol samting—ol i kamapim klia olsem ol i stap gut long Jehova. Ol bai pas gut wantaim Jehova, na em bai kisim ol olsem ol pikinini bilong em, na em i orait long ol i ken kisim laip oltaim.—Rom 8:21.
17. (a) Wanem samting bai kamap long Kingdom long pinis bilong wan tausen yia? (b) Olsem wanem dispela Kingdom “i no inap pinis”?
17 Olsem na senis bai kamap long wok bilong Jisas na bilong lain 144,000 long bosim graun. Ol bai mekim wanem long bihain? Baibel i no tokaut long dispela. Tasol sapos yumi stap gut long wok bos bilong Jehova, bai yumi stap laip long pinis bilong Taim Bilong Wan Tausen Yia, na bai yumi kisim save long ol samting Jehova i tingting pinis long mekim long dispela lain na long heven na graun. Tasol wok king bilong Krais bai i stap inap “oltaim oltaim” na Kingdom bilong em “i no inap pinis.” (Daniel 7:14) Olsem wanem Kingdom bilong em “i no inap pinis”? Wanpela samting i olsem: Ol narapela man i gat narapela kain tingting long wok bilong bosim ol samting ol i no inap bosim dispela Kingdom, long wanem, Jehova em i King. Na tu, dispela Kingdom “bai i stap oltaim oltaim,” long wanem, ol gutpela samting em i kamapim i no inap pinis. (Daniel 2:44) Na dispela man i mekim wok King na Pris na ol wanwok bilong em ol bai kisim biknem inap oltaim oltaim, long wanem, ol i bin stap gut long wok bilong Jehova.
Stori Gen Long Ol Dispela Tok
• Bilong wanem Kingdom bilong God tasol inap stretim hevi bilong ol man? Wanem taim dispela King bilong Kingdom bilong God i kirap mekim wok?
• Yu laikim tru wanem samting bilong Kingdom bilong God na ol samting em bai kamapim?
• Yumi inap lukim wanem ol gutpela wok Kingdom i kamapim pinis? Olsem wanem yumi insait long dispela wok?
[Piksa long pes 92, 93]
Aninit long Kingdom bilong God, olgeta manmeri bai lain long bihainim stretpela pasin