Sapta 10
Wanpela Kingdom “i No Ken Bagarap”
YUMI lukim ol samting i kamap long olgeta de na yumi save, ol man i bin sakim Jehova na bosim ol yet, tasol dispela samting ol i mekim i no bin helpim ol long i stap amamas. Ol i no bin kamapim wanpela gavman i helpim olgeta lain wantaim. Ol man i kisim bikpela save, tasol ol dispela saveman i no inap rausim sin bilong wanpela man o pinisim sik na i dai. Ol i wokim kain kain nupela samting bilong pait i nogut moa yet. Pasin stil na bagarapim man i go bikpela. Ol i bin wokim kain kain masin, na ol i laik kisim planti samting, tasol save bilong ol i sot na ol dispela samting ol i wokim i bagarapim graun na win na wara. Pe bilong ol samting i go antap tru na planti man i no gat wok. Ol i hatwok long kisim ol samting ol i mas kisim bambai ol inap i stap laip. Ol i hatwok long painim rot bilong stretim ol dispela hevi.—Ekl. 8:9.
2 I gat wanem rot bilong stretim? Kingdom bilong God tasol. Em dispela Kingdom Jisas i lainim ol disaipel long beten askim God long en. (Mt. 6:9, 10) Yumi ken amamas, long wanem klostu nau bai dispela Kingdom i stretim ol dispela hevi!
3 Kingdom bilong God long han bilong Krais i kirap mekim wok long heven long 1914 C.E. Long dispela yia ol samting i kamap long heven olsem Danyel i bin lukim long driman. Dispela “Man i bin stap oltaim,” em God Jehova, em i givim “wok king na biknem na kingdom” long Pikinini Bilong Man, em Krais Jisas. Na “olgeta lain manmeri na ol kain kain tok ples bai olgeta ol i mekim wok bilong em.” Danyel i stori moa long ol samting em i lukim olsem driman na em i tok: “Em bai i stap king inap long taim bihain bihain; wok king bilong em i no ken pinis. Na kingdom bilong em i no ken bagarap.” (Dan. 7:13, 14, NW) Long rot bilong dispela Kingdom bai God i helpim ol man i laikim tumas stretpela pasin na bai ol inap kisim ol gutpela gutpela samting bipo God i laik bai ol man i kisim taim em i putim namba wan man na meri long Paradais.
4 Ol manmeri i givim bel long dispela Kingdom, ol i laik tru long save long en na save long wok bilong en. Ol i laik save, dispela Kingdom o gavman i mekim wanem wok long nau, na em bai mekim wanem long bihain, na ol yet i mas mekim wanem. Ol i skelim gut ol dispela samting na nau ol i laikim tru dispela Kingdom na ol i laik tokim ol narapela man long en.—Sam 48:12, 13.
Ol i Skelim na Bel Bilong Ol i Kirap
5 Ol i kisim save olsem: Dispela Kingdom i stap long han bilong Krais em i kingdom bilong God. Long wanem God i bin “givim wok king na biknem na kingdom” long dispela Pikinini bilong em. Olsem na taim dispela Kingdom i kirap mekim wok bilong en, sampela maus long heven ol i tok: “Bikpela bilong yumi [God Jehova] wantaim Krais tupela i kamap king bilong olgeta graun! Na em [Jehova] bai i stap king oltaim oltaim!” (Re. 11:15) Ol gutpela samting dispela Kingdom i mekim i pulim yumi i go long God Jehova na yumi givim bel moa yet long em. Yumi laik bai em i stap king bilong yumi oltaim oltaim.
6 Gutpela tru Jehova i bin putim Krais Jisas i stap king, olsem nambatu bilong Em! God i givim wok long dispela Saveman na em i wokim graun na ol man. Olsem na Jisas i save tru long ol samting bilong helpim yumi ol man. Na em i laikim tumas yumi. (Pro. 8:30, 31; Kl. 1:15-17) Dispela laik o sori bilong em i bikpela tru, olsem na bihain em i kam daun long graun na givim laip bilong em bilong helpim yumi, na bai sin na i dai i ken pinis na yumi ken i stap oltaim.—Mt. 20:28.
7 Dispela kingdom o gavman i stap strong na em bai stap oltaim. Long wanem Jehova yet i stap oltaim; em i no ken i dai. (Hab. 1:12; Sam 146:3-5, 10) Na Krais Jisas tu, em God i putim em i stap king, em i no ken i dai; em i no olsem ol king bilong dispela graun. (Rom 6:9; 1 Ti. 6:15, 16) I gat 144,000 gutpela wokboi bilong God ol bai mekim wok king wantaim Krais long heven. God i kisim ol long “olgeta lain man, na bilong olgeta tok ples.” Ol tu i kisim laip i stap oltaim na i no ken i dai. (Re. 5:9, 10; 1 Ko. 15:42-44, 53) Planti ol i go pinis long heven. Liklik hap lain tasol, olsem lain remnan, ol i stap yet long graun. Ol i olsem ‘gutpela wokboi’ na ol i lukautim gut wok bilong Kingdom hia long graun.—Mt. 24:45-47.
8 Liklik taim moa na long taim Jehova i makim pinis bai ol ami bilong Em i kirap na pinisim ol samting nogut long graun. Bai ol i pinisim tru ol man ol i no laik save long God, na ol i sakim wok king bilong em, na ol i no tingim ol gutpela samting Em i bin mekim long rot bilong Krais bilong helpim ol. (2 Te. 1:6-9) Taim dispela samting i kamap, dispela em i De bilong Jehova, na bai em i stretim bek nem bilong Em, em i King bilong heven na graun. Longtaim pinis yumi bin wetim dispela taim.
9 Olgeta lotu giaman, na olgeta gavman bilong graun wantaim ol ami bilong ol em Seten i bosim ol, bai ol i pinis olgeta. Olgeta manmeri i bihainim pasin bilong dispela graun, em ol i tingim ol yet tasol, na stil, na mekim pasin pamuk na ol narapela pasin i no stret, bai ol i bagarap na pinis olgeta long graun. Bai Seten na ol spirit nogut i kalabus inap 1,000 yia na bai ol i no inap bosim moa ol man. Olgeta manmeri i laikim tumas stretpela pasin bai ol i amamas tru!—Re. 18:21, 24; 19:11-16, 19-21; 20:1, 2.
Em Bai Inapim Wok Bilong En Olsem Wanem?
10 Dispela Kingdom bilong Krais bai kamapim tru laik bilong God long graun. (Jen. 2:8, 9, 15; 1:28) Inap long dispela taim nau ol man i no bin mekim ol samting God i laik bai ol i mekim. Tasol God i putim Krais i stap bos bilong “narapela graun i laik kamap bihain.” Liklik taim na bai God i givim strafe long ol man nogut bilong dispela graun. Olgeta manmeri i winim dispela taim bai ol i stap wanbel na wok gut wantaim aninit long King Krais Jisas. Bai ol i amamas long mekim olgeta samting em i tokim ol long mekim, na bai olgeta hap bilong graun i kamap gutpela ples Paradais. (Hi. 2:5-9) Olgeta manmeri bai amamas long wok ol i mekim long han bilong ol, na graun bai kamapim planti kaikai inap tru long ol.—Sam 72:1, 7, 8, 16-19; lukim tu Aisaia 65:21, 22.
11 Taim God i wokim Adam na Iv, tupela i gutpela olgeta. God i laik bai tupela i kamapim planti pikinini na ol i go sindaun long olgeta hap bilong graun, na tingting wantaim skin bilong olgeta bai gutpela tru. Orait, taim Kingdom i bosim graun, dispela gutpela laik bilong God bai kamap. Bilong kamapim dispela laik bilong God, ol samting nogut sin i bin kamapim long ol man, ol dispela samting i mas pinis. Olsem na Krais i no ken mekim wok King tasol; em i mas mekim wok olsem Hetpris tu bilong tekewe sin bilong ol man. Em i bin givim skin bilong em olsem ofa na long pasin isi bai em i helpim ol manmeri bambai dispela ofa i ken tekewe sin bilong ol. Bai ol aipas i lukluk na ol yaupas i harim. Ol manmeri i lapun o ol i gat sik, skin bilong ol bai kamap gutpela olsem bilong yangpela man. Bai i no gat sik moa. No gat wanpela man bai tok: “Mi gat sik.” Long wanem sin na ol samting nogut sin i bin kamapim bai tekewe long ol manmeri i stap aninit long God.—Lukim Aisaia 33:22, 24, NW; 35:5, 6; Jop 33:25; Luk 13:11-13.
12 Tingting na skin bilong ol manmeri bai kamap gutpela olgeta. Tasol pasin bilong ol tu i mas kamap gutpela. Ol i mas bihainim ol pasin bilong God, long wanem God i wokim man “i kamap olsem God.” (Jen. 1:26) Olsem na bai i gat bikpela wok long lainim ol. Long dispela Nupela Taim bihain bai “stretpela pasin tasol i stap.” Olsem profet Aisaia i tok: “Ol man bai lain long bihainim stretpela pasin.” (2 Pi. 3:13; Ais. 26:9, NW) Dispela kain pasin i save kamapim pasin sekan—olgeta lain na olgeta famili bai ol i stap wanbel na pas gut wantaim, na bai ol i wanbel wantaim God. (Ais. 32:17; Sam 85:10-13) Ol manmeri i lain long bihainim stretpela pasin, isi isi bai ol i lain long ol samting God i laik bai ol i mekim. Bel bilong ol bai laikim tru ol pasin bilong Jehova, na dispela bai kirapim ol long bihainim ol dispela pasin long olgeta taim. Jisas em i gutpela man olgeta na em i tok: ‘Oltaim mi save mekim ol samting Papa i laikim.’ (Jon 8:29) Taim olgeta manmeri i mekim olsem, bai ol i stap amamas tru!
Gutpela Wok Em i Mekim Pinis
13 Ol bilipman i lukim gutpela wok dispela Kingdom i mekim pinis. Ol askim na skripsa hia bai kirapim tingting bilong yu na bai yu tingim sampela gutpela wok Kingdom i mekim pinis, na ol wok yumi inap mekim long nau na yumi mas mekim:
King bilong Kingdom i rausim wanem birua pastaim? Na wanem samting i kamap? (Re. 12:7-10, 12)
Taim Krais i kamap king pinis, kwiktaim em i kirap bungim ol laspela manmeri bilong wanem lain? (Mt. 24:31; Re. 7:1-4)
Long Matyu 25:31-33 Jisas i tokaut long wanem narapela wok em i mas mekim taim em i kamap king pinis na em i no bagarapim yet ol man nogut?
Em i mekim dispela wok olsem wanem? Husat ol i insait long en? (Mt. 24:14; Sam 110:3; Re. 14:6, 7)
Olsem wanem na ol birua insait long ol gavman na lotu ol i no inap pasim dispela wok? (Ap. 5:38, 39; Sek. 4:6)
Wok i kirap pinis long lainim ol man na wanem senis i kamap long pasin na wokabaut bilong ol dispela man i bihainim lo bilong Kingdom? (Ais. 2:4; 1 Ko. 6:9-11)
Kingdom i Stap Oltaim
14 Taim Seten na ol spirit nogut i kalabus pinis, orait bihain Jisas wantaim ol 144,000 wanwok bilong em, ol bai mekim wok king inap 1,000 yia. (Re. 20:6) Long dispela 1,000 yia bai skin na tingting bilong ol manmeri i kamap gutpela olgeta. Olgeta gavman na man i gat namba na strong na ol i birua long Jehova, olgeta bai pinis. Bihain bai Jisas i givim Kingdom i go bek long han bilong Papa bilong em bambai “God i ken i stap het tru bilong olgeta samting.”—1 Ko. 15:24, 28.
15 Olsem na senis bai kamap long wok bilong Jisas long bosim graun. Tasol wok king bilong em i bilong i stap oltaim na Kingdom bilong em “i no ken bagarap.” (Dan. 7:14, NW) Olsem wanem kingdom bilong em “i no ken bagarap”? Em olsem: Ol man i gat narapela kain tingting ol i no ken kamap king bilong dispela Kingdom. Na ol gutpela wok dispela Kingdom i bin kamapim “i no ken bagarap.” Ol samting Kingdom i mekim bilong stretim bek nem bilong Jehova na bilong kamapim laik bilong Em long graun, dispela i mas i stap oltaim.
Stori Gen Long Ol Dispela Tok
● Olsem wanem na Kingdom bilong God tasol inap stretim hevi bilong ol man? Wanem taim dispela Kingdom i kirap mekim wok?
● Wanem sampela wok bilong Kingdom yu laikim tru? Bilong wanem yu laikim tru dispela samting?
● Yumi inap lukim wanem ol gutpela wok Kingdom i kamapim pinis? Yumi insait olsem wanem long dispela wok?
[Askim Bilong Stadi]
1, 2. (a) Yumi lukim ol samting i kamap long graun long olgeta de na yumi save long wanem samting? (b) I gat wanem rot tasol bilong stretim ol dispela hevi?
3. (a) Wanem samting bilong Kingdom i kamap long heven long 1914? (b) Bilong wanem dispela samting i bikpela samting long yumi?
4. Yumi tingim tru wanem ol samting bilong Kingdom? Bilong wanem yumi tingim?
5. (a) Olsem wanem Baibel i makim Kingdom i stap long han bilong Krais em i Kingdom bilong Jehova? (b) Taim yumi kisim save long Kingdom, ol dispela save i mekim wanem long yumi?
6. Krais Jisas i nambatu bilong King Jehova na bilong wanem yumi mas tingim tru dispela samting?
7. (a) Ol gavman bilong graun i no save stap oltaim, orait olsem wanem na dispela Kingdom bai stap oltaim? (b) Dispela lain olsem ‘gutpela wokboi’ ol i gat wanem wok long Kingdom?
8, 9. (a) Kingdom bai pinisim wanem ol samting nogut i save brukim ol man? (b) Sapos yumi no laik kamap birua bilong kingdom bilong God, yumi no ken insait long wanem ol oganaisesen na wok?
10. (a) Olsem wanem Kingdom bilong Krais bai kamapim ol samting God i laik mekim long dispela graun? (b) Olsem wanem long ol manmeri i stap long graun long dispela taim?
11. (a) Ol manmeri i stap aninit long Kingdom, olsem wanem bai skin na tingting bilong ol i kamap gutpela olgeta? (b) Wanem samting moa i mas kamap?
12. (a) Wanem samting moa bilong ol man i mas kamap gutpela? (b) Dispela samting bai kamap olsem wanem? Olsem na wanem samting bai kamap?
13. Skelim ol askim long dispela paragraf na stori long sampela wok Kingdom i bin mekim na ol samting yumi mas mekim.
14. (a) Krais bai wok king inap hamas yia? (b) Insait long dispela hap taim, wanem wanem ol gutpela samting bai kamap?
15. Olsem wanem dispela Kingdom “i no ken bagarap”?
[Ol Piksa long pes 84, 85]
Ol manmeri bai lain long bihainim stretpela pasin