6
Bilong Wanem i Gat Planti Hevi na Pasin i No Stret?
1, 2. Yumi tingim ol samting i bin painim ol man, olsem na yumi gat wanem ol askim?
1 Tasol sapos God i gat laik long ol man i gutpela olgeta ol i ken i stap oltaim long paradais long graun, na sapos dispela laik bilong em i stap yet, bilong wanem nau i no gat paradais i stap? Bilong wanem ol man i bin karim bikpela pen na hevi inap planti tausen yia pinis?
2 Tru tumas, long ol dispela taim i gat ol bikpela pait, na ol strongpela kantri i go na daunim ol narapela lain na kisim ol samting bilong ol, na planti man i stap rabis, na i gat ol bikpela bagarap na sik na dai tu. Bilong wanem ol dispela samting nogut i save painim ol man i no gat asua? Sapos tru God i gat olgeta strong, bilong wanem em i bin larim ol bikpela hevi i stap inap planti tausen yia? God i bin wokim dispela graun na olgeta samting i gutpela olgeta, olsem na bilong wanem em i larim ol samting i stap nogut olsem, na em i larim ol man i bagarapim graun?
Wanpela Tok Piksa
3-5 (a) Wanem tok piksa inap helpim yumi long save, bilong wanem God bilong laikim ol samting i stret em i larim ol samting i go nogut long graun? (b) Long 3-pela samting bilong dispela tok piksa, yumi ken tingim wanem samting i makim stret ol samting i bin painim dispela graun?
3 Yumi ken mekim tok piksa na bai yumi save, bilong wanem God bilong laikim ol samting i stret em i larim pasin bilong paulim nabaut ol samting i stap long graun. Em olsem: Yumi wokabaut long bus na yumi kamap long wanpela haus. Dispela haus i stap nogut—ol windo i bruk, kapa i bagarap, dua i lus long hinsis, na ol paip na tap bilong wara i no wok, na ol plang bilong veranda i bagarap.
4 Orait, taim yu lukim dispela haus i bagarap olsem, bai yu ting i no gat wanpela saveman i bin wokim dispela haus? Yu ting dispela haus i bin kamap nating tasol? Sapos yu tok, i gat wanpela man i bin wokim, yu ting dispela man i no gat save long wokim haus?
5 Taim yu lukim gut dispela haus, bai yu lukim olsem man i bin tingting gut na wokim gut dispela haus. Tasol i olsem ol man i no bin lukautim, na nau em i laik bagarap. Orait, dispela i givim wanem tingting long yu? Yu ken ting olsem (1) papa bilong haus i dai pinis; (2) em i gat save long wokim haus, tasol em i no tingim moa dispela haus; (3) sampela man i baim haus bilong em olsem rentim, na ol i no bin lukautim gut. Dispela namba 3 samting i wankain olsem samting i bin painim dispela graun.
As Bilong Ol Hevi
6, 7. Taim Adam na Iv i brukim lo bilong God, wanem samting i painim tupela?
6 Sapos yumi skelim ol tok long namba wan hap bilong Baibel, bai yumi save, i no laik bilong God long ol man i mas kisim pen na hevi o i dai. Tupela tumbuna bilong yumi bilong pastaim, em Adam na Iv, ol i bin i dai, long wanem, ol i bikhet long God. (Stat sapta 2 na 3) Taim ol i bikhet long God, ol i no bihainim moa laik bilong em. Ol i lusim em na em i no lukautim ol moa. Ol i no pas moa long God, em “as tru bilong laip.”—Song 36:9.
7 Taim wanpela masin i wok, sapos yumi kamautim rop bilong paua, masin bai wok isi isi na bihain em i dai. Na i olsem tu long Adam na Iv—taim tupela i no pas moa long as bilong laip, skin na tingting bilong tupela i wok long bagarap, na ol i go lapun na bihain ol i dai. Orait, nau wanem samting i painim tupela? Ol i go bek long ples God i bin kisim ol long en: “Mi bin wokim yu long graun, na bai yu go bek gen long graun.” God i bin toksave long tupela olsem: Sapos ol i brukim lo bilong em, bai ol i dai.—Stat 2:17; 3:19.
8. Sin bilong tupela tumbuna bilong pastaim i mekim wanem long yumi ol man?
8 Na i no tupela tasol i dai—olgeta manmeri bilong graun, em ol tumbuna pikinini bilong tupela, ol tu i save dai. Bilong wanem? Long wanem, lo i stap long skin bilong yumi olsem: pikinini i save kisim wankain skin na pasin bilong papamama. Orait, olgeta pikinini bilong tupela i kisim sin na dai long tupela. Rom 5:12 i tok: “Wanpela man [Adam, namba wan tumbuna bilong yumi] i bin mekim sin, na long dispela pasin sin i kamap long graun. Na sin i bringim dai i kam. Na dai i kisim olgeta man, long wanem, olgeta man i bin mekim sin [olsem ol i kisim sin long papamama].” Dispela i mekim na ol man i save long sin na dai tasol, olsem na ol i ting dispela em i samting bilong yumi ol man na em i no inap lusim yumi. Tasol God i bin wokim namba wan man na meri bilong i stap oltaim na em i putim dispela laik long bel bilong tupela. Olsem na klostu olgeta man, taim ol i tingting long ol i mas i dai bihain, ol i bel hevi long dispela.
Longpela Taim Bilong Wanem?
9. Bilong wanem God i bin larim pen na hevi i stap longpela taim tru?
9 Bilong wanem God i larim ol man i bosim wokabaut bilong ol yet inap longtaim tru? Bilong wanem em i larim pen na hevi i painim ol man insait long dispela taim? Wanpela bikpela as bilong en em wanpela bikpela tok i bin kamap, olsem: Husat tru i mas bosim ol man? God yet i mas bosim ol? O ol inap bosim sindaun bilong ol yet na maski long God?
10. Taim God i wokim ol man, em inapim ol long mekim wanem? Tasol ol i gat wanem wok long dispela?
10 God i bin wokim ol man na bai ol yet i ken tingim wanem rot ol i laik bihainim. Em i no wokim ol olsem ol animal samting, em ol i mas bihainim tasol ol lo God i bin putim long skin bilong ol. Ol man inap makim husat ol i laik i stap aninit long em. (Lo 30:19; 2 Korin 3:17) Olsem na Baibel i tok: “Yupela i no ken ting, ‘Nau mipela i stap fri,’ na yupela i go mekim ol kain kain pasin nogut. Nogat. Yupela i mas wokabaut olsem ol wokboi bilong God.” (1 Pita 2:16) Tru, ol man inap bihainim laik bilong ol, tasol ol i mas karim hevi bilong ol samting ol i mekim.
11. Wanem wanpela rot tasol na bai yumi ken save, sapos ol man i bosim wokabaut bilong ol yet, ol bai stap gutpela o nogat?
11 Adam tupela Iv i no bin makim gutpela rot bilong bihainim. Ol i laik bosim wokabaut bilong ol yet. Tru, taim ol i bikhet long God, wantu em inap kilim i dai tupela. Tasol dispela i no inap stretim dispela bikpela tok i bin kamap, olsem: I stret God yet i mas bosim ol man o nogat. Tupela i laik bosim ol yet, olsem na wanpela askim i kamap, olsem: Tupela bai i stap amamas na i stap gutpela long dispela rot ol i bihainim? Bilong save long bekim bilong dispela askim, God i mas larim tupela wantaim ol pikinini bilong ol i bihainim dispela rot ol yet i laikim. Ol samting bai painim ol man long bihain, dispela bai kamapim klia olsem God i bin wokim ol man long bosim ol yet o nogat.
12. Jeremaia i tok wanem long ol man yet i bosim graun? Bilong wanem i olsem?
12 Wanpela man bilong raitim Baibel, em Jeremaia, em i save long samting bai painim ol. Spirit holi bilong God i stiaim em na em i tok tru olsem: “Bikpela, mi save, mipela man i no inap bosim wokabaut bilong mipela yet na bihainim ol rot mipela i laikim.” (Jeremaia 10:23, 24) Em i save, God yet i mas soim rot long ol, long wanem, God i no wokim ol man na bai ol yet inap bosim gut wokabaut bilong ol—em yet i mas bosim ol.
13. Ol man i bin bosim graun inap planti tausen yia, na wanem samting i kamap ples klia pinis?
13 Ol man i bin bosim graun inap planti tausen yia, na ol samting i kamap i makim stret olsem ol man i no inap bosim gut wokabaut bilong ol yet. Ol i traim pinis, na em i asua bilong ol yet na ol bikpela hevi i painim ol na ol i stap nogut. Baibel i tokaut klia: “God bilong yumi . . . pasin bilong en i gutpela na stretpela tasol. Tasol yupela i no olsem. . . . Yupela i manmeri bilong mekim sin tasol. Olsem na yupela i no inap i stap lain pikinini bilong God.”—Lo 32:4, 5.
Liklik Taim God Bai Pasim Ol
14. Bilong wanem God i no ken wet moa long pasim wok bilong ol man long bosim graun?
14 God i bin givim bikpela hap taim tru long ol man i ken traim save bilong ol long bosim graun, tasol ol i pundaun tru long dispela wok. Olsem na nau God inap kirap na pasim ol na pinisim ol pen na hevi na sik na dai. Em i bin larim ol man i stap na kisim bikpela save tru long ol samting bilong saiens na long wokim ol kain kain masin samting, na wokim ol nupela kain marasin na ol narapela samting, na nau God i no gat wok long larim ol i stap inap sampela handet yia moa bilong kamapim klia olsem ol yet inap kamapim gutpela taim long graun na ol man i stap wanbel. Ol i no bin mekim dispela wok, na ol i no inap mekim tu. Ol i bin lusim God na ol i bosim wokabaut bilong ol yet, na dispela i bin kamapim planti hevi nogut tru na birua na bagarap long graun.
15. Yumi mas tingim gut wanem tok bilong Baibel?
15 Tru, sampela bikman bilong graun ol i laik tru long helpim ol man, tasol dispela wok bilong ol i no bin kamap gutpela. Nau long olgeta hap yumi lukim wok bilong ol man long bosim graun i go nogut olgeta. Olsem na i stret Baibel i tok: “Ol king na ol man bilong graun i no inap kisim bek yu. Olsem na nogut yu bilip long ol.”—Song 146:3.
[Piksa long pes 24, 25]
Sampela bikman bilong graun ol i gat gutpela bel, tasol ol i no bin kamapim gutpela taim long graun na ol man i stap wanbel