Bilong Wanem God i Bin Larim Pen na Hevi i Kamap?

“Mipela man i no inap bosim wokabaut bilong mipela yet . . . Bikpela, yu ken stretim mipela.”—Jeremaia 10:​23, 24.

JEREMAIA i raitim dispela tok planti tausen yia bihain long taim God i wokim man. Em i lukim sindaun bilong ol man i nogut tru; i no gutpela olsem God i bin givim long namba wan papa na mama bilong yumi.

Ol samting i bin kamap insait long 2,500 yia samting bihain long taim bilong Jeremaia i kamapim long ples klia olsem tok bilong Jeremaia i stret. Tasol long nau dispela hevi i go bikpela moa yet. Wanem samting i bin kamap na sindaun bilong ol man i go nogut?

Ol i Mekim Nabaut

God i wokim namba wan man na meri bambai ol i mas i stap aninit long em na bihainim ol lo bilong em na bai ol i ken i stap gutpela. Tasol tupela i ting sapos ol i lusim God na bosim ol yet, dispela bai helpim sindaun bilong ol. Tasol dispela samting i mekim nabaut long gutpela pasin bilong God long larim ol i tingim wanem rot ol i laik bihainim.​—Stat, sapta 3.

Bilong wanem God i no kilim i dai Adam tupela Iv na wokim narapela man na meri? Long wanem wanpela tok i bin kamap olsem: I no stret God i stap nambawan bos bilong heven na graun, na pasin bilong em long bosim ol samting i no stret. Tasol em i God I Gat Olgeta Strong na em i Man bilong wokim yumi, olsem na i stret em i stap bos. Na em i gat olgeta save na olgeta gutpela tingting, olsem na pasin bilong em long bosim ol samting i gutpela olgeta. Tasol bikpela tok i kamap long wok bos bilong God.

Olsem wanem? Ol man inap bosim gut wokabaut bilong ol o God i mas bosim ol? I gat wanpela rot bambai ol man i ken save ol inap bosim gut sindaun bilong ol yet o nogat. Orait, God i larim ol i bosim sindaun bilong ol yet. Olsem na em wanpela as na God i larim pasin nogut na pen na hevi i kamap. Em i laik kamapim long ples klia olsem, ol man i no inap bosim wokabaut bilong ol yet.a

Em asua bilong Adam na Iv na pen na hevi i kamap long tupela na ol pikinini bilong ol. “Ol yet i mekim pasin nogut; ol i no pikinini bilong [God]; em asua bilong ol yet.”​—Lo 32:​5, NW.

God i tokim namba wan papa na mama, sapos tupela i lusim em, tupela bai dai. (Stat 2:17) Dispela tok bilong God i kamap tru. Taim ol i lusim God i olsem ol i lusim as bilong strong na laip bilong ol. Isi isi skin bilong tupela i wok long bagarap inap long taim tupela i dai.​—Stat 3:19.

Orait, God i givim bikpela hap taim long ol man bambai ol i ken traim save bilong ol long kamapim kain kain gavman bilong bosim gut sindaun bilong ol. Tasol olsem wanem? Ol i bin kamapim wanpela gavman em inap kamapim gutpela taim long graun, na no gat pait na pasin nogut? I gat wanpela gavman inap givim gutpela sindaun long ol man na ol i no sot long wanpela samting bilong skin? I gat wanpela gavman inap pinisim sik, lapun, na indai? Tasol pasin bilong God long mekim wok bos em inap tru long kamapim ol dispela samting.​—Stat 1:​26-31.

Bikpela Hap Taim i Lus i Lainim Man long Wanem Samting?

Ol samting i bin kamap bihain long taim bilong Adam na Iv i kamapim tru tok bilong Rom 5:12: “Dai i kisim olgeta man.” Na “wanpela man i bin mekim sin, na long dispela pasin sin i kamap long graun. Na sin i bringim dai i kam.” Taim namba wan papa na mama i bikhet long wok bos bilong God, ol i kamap sinman na skin bilong ol i no gutpela moa. Tupela i givim dispela sin long olgeta pikinini bilong ol. Olsem na yumi olgeta i gat sin, na yumi save sik na i dai.

Insait long dispela hap taim yumi lukim ol samting nogut nogut ol sinman i bin mekim long ol narapela. Ol i bin kamapim planti pait nogut, na ol i bel nogut long sampela lain bilong narapela skin na ples na lotu, na ol i bin kamapim wanpela kain kot bilong skelim na givim strafe long ol man i no wanbel long ol tok bilong misin, na ol i mekim kain kain pasin nogut long bagarapim man, na ol man i tingim ol yet tasol na ol i laik kisim bikpela mani. Na tu, planti milion milion manmeri i sot long kaikai na ol samting bilong skin.

Inap planti tausen yia ol man i bin traim save bilong ol long kamapim kain kain gavman. Tasol i no gat wanpela gavman i bin helpim olgeta manmeri long kisim gutpela sindaun. Long dispela taim nau ol man i sakim gavman Komyunis long planti kantri. Na long ol kantri demokratik, pasin nogut i kamap bikpela moa, na planti man i hangre na sot long ol samting bilong skin, na mani i no gat strong, na pasin stil na giaman i go bikpela. Tru ol man i bin kamapim kain kain gavman, tasol i no gat wanpela gavman i bin kamapim gutaim hia long graun.

Na God i givim taim tu long ol bilong kisim bikpela save na wokim kain kain samting em inap helpim tru olgeta manmeri. Tasol yu ting wok bilong ol man i kamap gut taim ol man i lusim banara na ol i kisim save long wokim bom nuklia? Na nau ol man i wokim ol roket samting na ol inap lusim graun na wokabaut long ples antap; tasol maski ol i gat dispela bikpela save, ol i no inap sindaun gut wantaim long graun, a? Na planti manmeri i pret long raun long nait, long wanem ol man nogut i stap.

Dispela hap taim i kamapim long ples klia olsem ol man i no inap tru long ‘bosim wokabaut bilong ol.’ God i wokim yumi bambai em yet i mas soim rot long yumi na stiaim wokabaut bilong yumi​—olsem tasol God i wokim yumi bambai yumi mas kaikai, na dring wara, na pulim win.​—Matyu 4:4.

God i larim pasin nogut na pen na hevi i stap na bai ol man i ken save, sapos ol i mekim nabaut long pasin bilong tingim wanem rot ol i laik bihainim, pen na hevi bai kamap long ol. God i bin givim rot long ol man bambai ol i ken tingim wanem rot ol i laik bihainim, na em i wanpela gutpela samting. Olsem na God i no laik tekewe dispela long ol man​—em i larim ol bambai ol i ken save taim ol i sakim God na bosim wokabaut bilong ol yet, pen na hevi tasol i kamap, na gutaim, nogat.

Olsem na Jeremaia i tok stret olsem: “Mipela man i no inap bosim wokabaut bilong mipela yet.” Solomon tu i tok stret olsem: “[Ol] bikman i wok long daunim ol arapela manmeri na mekim nogut long ol.”​—Saveman 8:9.

Olsem na nau yumi save ol man i no inap pinisim pen na hevi. Maski Solomon i gat bikpela save na gutpela tingting, na em i gat bikpela mani na strong, em tu i no inap stretim ol hevi em ol man yet i bin kamapim.

Orait, olsem wanem God bai pinisim pen na hevi? Olsem wanem long ol man bipo ol i kisim bikpela pen na hevi? God bai stretim dispela tu na bai ol i ken kisim gutpela sindaun?

[Ol Futnot]

[Piksa long pes 9]

Taim God i wokim man na meri tupela i gat gutpela sindaun tru, tasol ol samting nogut i kamap bihain i makim olsem ol man i no inap ‘bosim wokabaut bilong ol yet’ na i stap gutpela