Namba 7 Hap
Wanem Samting i Bin Kamap Long Pasin Bikhet?
1-3. Olsem wanem ol samting i kamap insait long bikpela hap taim i go pinis i kamapim klia olsem Jehova i tok stret?
INAP planti handet yia pinis ol man i bin bikhet long God na bosim ol yet na wanem samting i kamap ples klia? Yu ting ol man i bin bosim gut graun, winim God? Sapos yumi tingim ol pasin nogut ol i bin mekim long ol narapela man, yumi ken tok, Nogat tru.
2 Taim namba wan tumbuna papamama bilong yumi i sakim wok bos bilong God, bikpela hevi i kamap. Ol yet i kisim pen na hevi na ol i nogutim olgeta lain pikinini bilong ol. Na em asua bilong tupela tasol. Baibel i tok: “Yupela i manmeri bilong mekim sin tasol. Olsem na yupela i no inap i stap lain pikinini bilong God.”—Lo 32:5.
3 Ol samting i bin kamap i makim olsem God i tok stret taim em i tokim Adam tupela Iv, sapos ol i lusim em na ol lo bilong em, skin bilong ol bai wok long bagarap na bihain bai ol i dai. (Stat 2:17; 3:19) Tupela i bikhet na i no laik aninit moa long God, olsem na tru tumas, skin bilong ol i bin bagarap na ol i dai.
4. Olsem wanem na taim mama i karim yumi, yumi olgeta i gat sin, na yumi save sik na i dai?
4 Bihain ol samting i bin kamap olsem Rom 5:12 i tok: “Wanpela man [Adam] i bin mekim sin, na long dispela pasin sin i kamap long graun. Na sin i bringim dai i kam. Na dai i kisim olgeta man, long wanem, olgeta man i bin mekim sin.” Olsem na taim Adam tupela Iv i bikhet long bos bilong ol, em God, nau ol i gat rong na ol i kamap sinman. Na sin i kalap long olgeta man, long wanem, Adam tupela Iv i tumbuna bilong ol. Olsem na yumi olgeta manmeri yumi gat sin, na sik na i dai i save painim yumi.
5, 6. Ol samting i bin kamap i kamapim klia wanem samting long wok bilong ol man long kamapim gutaim tru na gutpela sindaun?
5 Nau planti handet yia na planti bikpela gavman i bin kamap i go pinis. Ol man i bin traim kain kain gavman, tasol ol samting nogut tru i bin kamap. Wok bilong ol i no kamap gutpela. Inap 6,000 yia pinis ol i bin wok long kamapim gutaim na stretpela pasin, na givim gutpela sindaun long ol man long olgeta hap, tasol nogat. Bikpela hap taim i lus pinis, tasol ol i no lain yet long mekim gutpela pasin, na pasin sori, na wok gut wantaim.
6 Pasin nogut tasol i bin kamap. No gat wanpela kain gavman bilong ol man i bin kamapim gutaim tru na helpim olgeta man long kisim gutpela sindaun. Long taim bilong yumi, gavman bilong Hitler i bin kilim i dai nating planti milion man, na ol bikpela pait i bin kamap na kilim i dai planti moa yet, winim 100 milion. Na ol man i bin mekim nogut tru long planti man i gat narapela kain tingting politik, na ol i bin kilim i dai planti.
Long Nau
7. Yumi ken stori olsem wanem long sindaun bilong ol manmeri long nau?
7 Tingim ol narapela hevi bilong nau. Pasin raskol na pasin pait i pulap long graun. Planti man moa yet i mekim nabaut long ol drak. Olkain sik bilong pamuk i kisim planti man long olgeta hap. Sik AIDS i kisim pinis planti milion man. Liklik lain i gat planti samting moa yet, na bikpela lain tru i sot long kaikai na i gat sik na planti milion bilong ol i dai long olgeta yia. Ol man i bagarapim na pinisim planti samting bilong graun. Planti famili i bruk, na ol man i no bihainim moa ol stretpela pasin. Tru tumas, ‘god bilong dispela graun,’ em Satan, em i bos nogut. Ol man Satan i bosim, ol i no gat pasin sori—ol i save mekim hatpela pasin na olgeta pasin i no stret.—2 Korin 4:4.
8. Olsem wanem yumi no ken tok ol wok ol man i bin mekim i kamap gutpela?
8 God i givim bikpela hap taim tru long ol man inap long ol i ken kisim bikpela save na mekim gut ol wok. Tasol sapos ol i lusim ol banara na ol i mekim pait long masin-gan na roketbom nuklia samting, yu ting yumi ken tok, wok bilong ol i kamap gutpela? Sapos ol inap salim man i go long mun samting, tasol long graun ol i no inap sindaun gut wantaim, na long sampela hap long nait na long san tu ol i pret long wokabaut long rot, yu ting wok bilong ol long bosim sindaun bilong ol yet i kamap gutpela?
Samting i Bin Kamap Ples Klia
9, 10. (a) Ol handet handet yia i go pinis i bin kamapim klia wanem samting? (b) Bilong wanem God i no ken tekewe strong em i givim long ol man long bihainim laik bilong ol?
9 Inap planti handet handet yia pinis ol man i bin bikhet long God na traim save bilong ol yet long bosim wokabaut bilong ol, na samting i kamap ples klia em olsem: Ol i no inap bosim gut wokabaut bilong ol. God i wokim yumi bambai yumi mas kisim kaikai na dring wara na pulim win na bai yumi ken i stap laip, na olsem tasol yumi mas aninit long God na larim em i soim rot long yumi bambai yumi inap i stap gutpela.
10 God i bin larim pasin nogut i stap na long dispela rot em i bin kamapim klia olsem taim ol man i mekim nabaut long laik bilong ol yet, samting nogut tasol i kamap. God i bin wokim ol bambai ol inap bihainim laik bilong ol—dispela i olsem gutpela presen na em i no laik tekewe long ol. Olsem na em i givim hap taim long ol bambai ol i ken save long ol samting nogut pasin bikhet i kamapim. Tru tumas, “mipela man i no inap bosim wokabaut bilong mipela yet.” Na Baibel i tok stret olsem: “Sampela bikman i wok long daunim ol arapela manmeri na mekim nogut long ol.”—Jeremaia 10:23; Saveman 8:9.
11. I gat wanpela gavman ol man i bin kamapim em i bin pinisim pen na hevi?
11 God i larim ol man yet i bosim graun inap 6,000 yia pinis na long dispela rot em i bin kamapim klia olsem ol man i no inap pinisim pen na hevi. No gat wanpela taim ol i bin mekim. Solomon i gat bikpela save, na planti mani kago, na bikpela namba, tasol taim em i stap king em i no inap stretim ol hevi em wok bos bilong ol man i bin kamapim. (Saveman 4:1-3) Na long taim bilong yumi tu, ol man i kisim pinis bikpela save long wokim ol samting, tasol ol bos bilong graun i no inap pinisim pen na hevi. Ol samting i bin kamap i makim olsem taim ol man i bikhet long God na bosim ol yet, dispela i no pinisim ol hevi—bikpela hevi moa i kamap.
God i Tingting Long Bihain Tru
12-14. God i larim pen na hevi i stap na dispela bai helpim ol man olsem wanem long bihain bihain?
12 God i larim pasin nogut i stap na yumi bin karim hevi long dispela. Tasol God i tingting long bihain tru na em i mekim olsem. Em i save bihain bai gutpela samting i kamap long dispela rot. Dispela tingting bilong God i no bilong helpim ol man inap sampela yia tasol. Nogat. Em bilong helpim ol oltaim oltaim.
13 Sapos long wanpela taim bihain wanpela man i bikhet na em i gat tok long wok bos bilong God, God i no ken givim hap taim long em bilong stretim dispela tok. God i givim bikpela hap taim pinis long ol bikhetman, inap planti tausen yia. Olsem na sapos bihain wanpela man o wanpela ensel i kamapim gen dispela tok, orait God i no gat wok long stretim—longtaim em i stretim pinis.
14 God Jehova i bin larim pasin nogut na hevi i stap long dispela taim, na dispela i bin kamapim klia olsem ol man o ol ensel i bikhet long God ol i no inap i stap gutpela, na i no gat wanpela samting ol i tingting long mekim em inap helpim ol oltaim oltaim. Olsem na sapos bihain wanpela man o wanpela ensel i bikhet, i stret God i ken pinisim em wantu tasol. Baibel i tok: “Em bai i bagarapim ol manmeri i save mekim pasin nogut.”—Buk Song 145:20; Rom 3:4.
[Piksa long pes 15]
Namba wan tumbuna papamama bilong yumi i bikhet long God, olsem na tupela i go lapun na i dai
[Ol Piksa long pes 16]
Ol man i sakim God na bosim ol yet na dispela i bin bagarapim ol tru
[Kredit Lain]
U.S. Coast Guard photo