Namba 8 Hap
Laik Bilong God i Wok Long Kamap
1, 2. God i bin mekim wanem bilong wokim rot bilong pinisim pen na hevi?
OL MAN na ensel i bikhet ol i bosim graun inap planti handet handet yia pinis na dispela i bin putim bikpela hevi long ol manmeri. Tasol God i tingim yumi na insait long dispela bikpela hap taim em i bin wokim rot bilong pinisim pen na hevi na pasin nogut.
2 Taim pasin bikhet i kamap long Iden, God i tokaut long laik bilong em long kamapim wanpela gavman bilong givim gutpela sindaun long ol manmeri long paradais long graun. (Stat 3:15) Bihain nambawan mausman bilong God, em Jisas, em i autim tok long dispela gavman bilong God, na dispela i olsem nambawan bikpela tok em i autim. Em i tok, dispela gavman tasol inap helpim ol man.—Daniel 2:44; Matyu 6:9, 10; 12:21.
3. Dispela gavman i laik kam na bosim graun, Jisas i kolim olsem wanem? Bilong wanem em i kolim olsem?
3 Jisas i kolim dispela gavman olsem “kingdom bilong heven,” long wanem, em bai kamap long heven. (Matyu 4:17) Na em i kolim tu olsem “kingdom bilong God,” long wanem, God yet bai kamapim. (Luk 17:20) Insait long planti handet yia God i givim spirit holi long sampela man na ol i bin raitim ol tok profet long lain na wok bilong dispela gavman.
Nupela King Bilong Bosim Graun
4, 5. Olsem wanem God i kamapim klia olsem em i bin makim Jisas bilong i stap King?
4 Inap 2,000 yia bipo Jisas i bin truim planti tok profet i makim olsem em yet i dispela man em i bilong kamap King bilong Kingdom. God yet i makim Jisas bilong i stap King long dispela gavman bilong heven em bai bosim ol manmeri. Jisas i dai na bihain God i kirapim bek em na em i kamap wanpela strongpela spirit long heven i no inap i dai. I gat planti man i bin lukim em taim em i kirap bek.—Aposel 4:10; 9:1-9; Rom 1:1-4; 1 Korin 15:3-8.
5 Bihain em i go “sindaun long han sut bilong God.” (Hibru 10:12) Em i wetim taim bilong God long givim strong long em bilong kirap mekim wok King long Kingdom. Dispela i truim tok profet bilong Buk Song 110:1, em God i tokim Jisas: “Sindaun long han sut bilong mi inap mi putim ol birua bilong yu i stap aninit long yu.”
6. Jisas i bin mekim wanem na dispela i kamapim klia olsem em inap tru long kamap King bilong Kingdom bilong God?
6 Taim Jisas i stap long graun, em i bin kamapim klia olsem em inap tru long kamap King bilong Kingdom. Maski ol man i mekim nogut long em, em i stap gut long God. Long dispela rot em i kamapim klia olsem Satan i giaman taim em i tok ol man i no inap sanap strong long traim na stap gut long God. Jisas em i gutpela man olgeta, olsem ‘namba 2 Adam,’ na em i kamapim klia olsem God i no popaia taim em i wokim man i gutpela olgeta.—1 Korin 15:22, 45; Matyu 4:1-11.
7, 8. Jisas i bin mekim wanem ol gutpela wok long graun? Na dispela i makim wanem samting?
7 No gat wanpela king bilong graun i bin mekim planti gutpela wok olsem Jisas i bin mekim insait long liklik hap taim em i bin stap long graun. Long strong bilong spirit bilong God, Jisas i oraitim ol man i gat sik, na ol lek nogut, na aipas, na yaupas, na mauspas. Na em i bin kirapim bek man i dai pinis! Ol dispela wok em i mekim i olsem piksa bilong bikpela wok em bai mekim bilong helpim ol man taim Kingdom i bosim graun.—Matyu 15:30, 31; Luk 7:11-16.
8 Jisas i mekim planti gutpela wok long graun, olsem na disaipel bilong em Jon i tok: “I gat planti arapela samting tu Jisas i bin mekim. Tasol sapos ol i laik raitim ol buk i gat tok long olgeta dispela samting wan wan, ating graun bilong yumi bai i no gat ples inap long yumi ken putim ol dispela buk.”—Jon 21:25.a
9. Ol man i gat gutpela bel, bilong wanem planti tru ol i bin kam long Jisas?
9 Jisas i save mekim gut long ol man na mekim pasin sori. Em i mekim gut long ol rabisman na ol man ol narapela i daunim ol, tasol em i mekim wankain pasin long ol maniman tu na ol man i gat namba. Olsem na ol man i gat gutpela bel ol i kam long em, olsem em i tokim ol long mekim: “Yupela ol man i save hatwok tru na i karim ol bikpela hevi, yupela olgeta kam long mi na bai mi givim malolo long yupela. . . . Long wanem, mi save mekim pasin isi long ol man na mi save daunim mi yet.” (Matyu 11:28-30) Ol man i aninit long God, planti tru ol i kam long em, na ol i amamas long wetim taim bilong em i kamap King.—Jon 12:19.
Sampela Bai Wok King Wantaim Em
10, 11. Husat bai wok wantaim Jisas long bosim graun?
10 Long ol gavman bilong graun i gat sampela man i wok wantaim gavman long bosim ol man, na i wankain tu long Kingdom bilong God long heven. I gat sampela ol bai wok king wantaim Krais na bosim ol manmeri long graun, olsem Jisas i tok promis long ol disaipel i poroman tru bilong em.—Jon 14:2, 3; Kamapim Tok Hait 20:6.
11 Liklik lain bai ol i kirap bek na kisim laip long heven olsem Jisas. Ol i lain bilong Kingdom bilong God, em dispela Kingdom bai bringim ol blesing bilong oltaim long ol man. (2 Korin 4:14; Kamapim Tok Hait 14:1-3) Olsem na insait long ol planti handet handet yia i go pinis Jehova i bin wokim rot bilong kamapim dispela gavman em bai bringim ol blesing bilong oltaim long ol man.
Ol Gavman Bilong Ol Man Bai Pinis
12, 13. Nau Kingdom bilong God i redi long mekim wanem?
12 Long taim bilong yumi, God i bin mekim sampela samting long graun. Olsem Namba 9 hap bilong dispela liklik buk i stori, ol tok profet bilong Baibel i makim olsem Kingdom bilong God long han bilong Krais i kamap pinis long heven long yia 1914, na i redi nau long pinisim olgeta lain bilong Satan. Kingdom em i redi bilong i go “bosim ol birua bilong [Krais].”—Buk Song 110:2.
13 Daniel 2:44 i tok profet long dispela samting olsem: “Taim ol dispela king i stap yet God bai i kirapim wanpela kingdom [long heven] na dispela kingdom bai i stap oltaim oltaim. Ol arapela king i no inap daunim kingdom bilong God [God i no ken larim ol man i kamapim gen sampela gavman], tasol em bai i daunim ol na bagarapim ol arapela king na kingdom bilong en bai i stap oltaim.”
14. Taim ol gavman bilong graun i pinis, wanem ol gutpela samting bai kamap?
14 Ol man i bin sakim wok bos bilong God na kamapim kain kain gavman, tasol taim God i rausim pinis ol dispela gavman, bai Kingdom bilong em i kirap bosim tru olgeta hap bilong graun. Kingdom i stap long heven, olsem na ol man i no inap bagarapim. Wok gavman bai stap gen long heven, long han bilong God, olsem long pastaim. Ol lotu giaman na ol kain tingting bilong ol saveman na bilong politik i no bin helpim liklik ol man. Olsem na taim gavman bilong God i bosim graun, olgeta dispela samting bai pinis na i no ken giamanim moa ol man.—Matyu 7:15-23; Kamapim Tok Hait sapta 17 inap 19.
[Ol Futnot]
a Bilong save gut long olgeta wok Jisas i bin mekim long graun, lukim buk Nambawan Man Tru i Winim Olgeta Narapela Man, em Sosaiti Wastaua i wokim long 1991.
[Piksa long pes 18]
Taim Jisas i stap long graun em i bin oraitim ol sikman na kirapim bek man i dai pinis na dispela i makim gutpela wok em bai mekim long nupela taim bihain
[Piksa long pes 19]
Kingdom bilong God long heven bai pinisim olgeta gavman ol man i bikhet long em i bin kamapim