Namba 6 Hap
Bilong Wanem God i Larim Hevi i Stap?
1, 2. Namba wan tumbuna papamama bilong yumi i mekim wanem na ol i bagarapim gutpela sindaun God i bin givim long ol long pastaim?
WANEM samting i bin kamap na i bagarapim gutpela sindaun God i bin givim long namba wan tumbuna papamama bilong yumi long Paradais long Iden? Olsem wanem na pasin nogut na hevi i bin pulap long graun inap planti tausen yia pinis?
2 As bilong dispela i olsem: Adam tupela Iv inap bihainim laik bilong tupela, tasol ol i mekim wok nogut long dispela. Tupela i no tingim gut olsem God i bin wokim ol bilong bihainim ol lo bilong Em bambai ol i ken i stap gutpela. Tupela i ting, sapos ol i sakim God na i no stap aninit moa long em, dispela inap helpim ol long i stap gutpela moa. Ol i kalapim mak God i putim long ol.—Stat, sapta 3.
Bikpela Tok Long Wok Bilong Bosim Heven na Graun
3-5. Bilong wanem God i no bin pinisim Adam na Iv na wokim narapela man na meri?
3 Bilong wanem God i no bin pinisim Adam tupela Iv na wokim narapela man na meri? Long wanem, i stret God i stap bos bilong heven na graun, tasol bikpela tok i bin kamap long dispela.
4 Dispela bikpela tok o askim i olsem: I stret husat i ken i stap bos? Na wok bos bilong husat i stret? God i gat olgeta strong na em i bin wokim ol ensel na ol man, olsem na i stret em i stap bos bilong ol. Na em i gat olgeta save, olsem na wok bos bilong em i stret bilong helpim olgeta. Tasol bikpela tok i bin kamap long wok bos bilong God, na long wok bilong God long wokim ol man—ol inap i stap gut long em o nogat. Bihain bai yumi stori long dispela.
5 Taim ol man i no i stap aninit moa long God, i olsem narapela askim tu i kamap: Sapos God i no bosim ol, dispela inap helpim ol o nogat? God i save long bekim bilong dispela askim, tasol gutpela rot bilong helpim ol man long save long dispela, em olsem: Em i larim ol i bosim ol yet. Ol yet i laik mekim olsem, olsem na God i larim ol i bihainim dispela laik bilong ol.
6, 7. Bilong wanem God i no bin pasim ol man liklik inap longtaim pinis?
6 God i givim hap taim long ol man bilong traim save bilong ol long i stap fri olsem, na long dispela rot bai em i kamapim klia olsem wok bos bilong husat inap helpim gut ol—wok bos bilong em o bilong ol yet. Em i mas givim bikpela hap taim long ol inap long ol i ken traim save bilong ol long mekim wok gavman, na wokim kain kain samting, na mekim wok saiens, na wok dokta, na ol i ken pilim olsem ol i mekim gut ol dispela wok na i kamap gutpela.
7 Olsem na inap long nau God i no bin pasim rot bilong ol man liklik bambai ol inap save tru, sapos ol i sakim em na bosim ol yet, dispela inap helpim ol o nogat. Em i larim ol man yet i tingim wanem pasin ol i laik bihainim, olsem gutpela pasin o hatpela pasin, pasin sori o pasin birua, stretpela pasin o pasin i no stret. Tasol ol bai kisim kaikai i stret long pasin ol i mekim: gutpela pasin na bel isi, o pasin nogut wantaim pen na hevi.
Sampela Ensel i Bikhet
8, 9. (a) Olsem wanem pasin bikhet i bin kirap long heven? (b) Satan i pulim Adam tupela Iv na husat moa na ol i bikhet long God?
8 I gat narapela samting yumi mas tingim: Sampela moa i bin bikhet long wok bos bilong God, i no Adam na Iv tasol. Tasol husat moa ol i stap long dispela taim bipo? Ol ensel. Taim God i no wokim yet ol man long graun, em i wokim bikpela lain ensel long heven. Ol tu inap bihainim laik bilong ol, tasol ol i mas daun long wok bos bilong God.—Jop 38:7; Buk Song 104:4; Kamapim Tok Hait 5:11.
9 Baibel i makim olsem pasin bikhet i kirap pastaim long heven. Wanpela ensel i laik i stap fri olgeta, na em i laik bai ol man i lotu long em. (Matyu 4:8, 9) Dispela ensel i bikhet long God na em i pulim Adam tupela Iv na tupela tu i bikhet. Em i giaman na i tok, God i pasim tupela long kisim gutpela samting em inap helpim ol. (Stat 3:1-5) Olsem na dispela ensel i kamap Satan (Birua). Bihain em i pulim sampela ensel moa na ol tu i bikhet long God. Ol i kamap ol spirit nogut.—Lo 32:17; Kamapim Tok Hait 12:9; 16:14.
10. Ol man na ol ensel i bikhet na wanem samting i bin kamap?
10 Taim ol man i bikhet long God, nau Satan na ol spirit nogut inap bosim ol. Olsem na Baibel i kolim Satan olsem “giaman god bilong dispela graun,” na Baibel i tok, Satan “i bin pasim tingting bilong ol dispela man i no bilip.” Long dispela as na Baibel i tok: “Dispela graun olgeta em i stap aninit long strong bilong Satan.” Jisas yet i tok, Satan em i “hetman i save bosim dispela graun.”—2 Korin 4:4; 1 Jon 5:19; Jon 12:31.
Tupela Bikpela Tok
11. Satan i gat wanem narapela tok long God?
11 Satan i gat tok tu long God i no wokim stret ol man. Em i tok, sapos hevi i painim ol, bai ol i no laik mekim pasin i stret, na bai ol i tok nogut long God. (Jop 2:1-5) I olsem em i tok, ol i no inap i stap gut long God.
12-14. Olsem wanem dispela bikpela hap taim bai kamapim klia olsem tupela bikpela tok Satan i bin kamapim i giaman tasol?
12 Olsem na God i makim bikpela hap taim inap tru long olgeta man na olgeta ensel i ken save, dispela tupela bikpela tok Satan i bin kamapim i stret o nogat. (Lukim Kisim Bek 9:16.) Ol samting i painim ol man bai kamapim klia dispela samting.
13 Orait, insait long dispela bikpela hap taim wanem samting bai kamap klia? Tru ol man inap bosim gut ol yet o God i mas bosim ol bambai ol i ken i stap gutpela? Olsem wanem? Ol man inap sakim God na kamapim wanpela gavman em inap kamapim gutaim long graun, no gat pait moa o pasin raskol o pasin i no stret? Yu ting ol inap kamapim wanpela gavman em bai givim gutpela sindaun long olgeta man na pinisim pasin bilong i stap rabis, o pinisim sik, na lapun, na i dai? Wok bos bilong God i bilong mekim olgeta dispela samting.—Stat 1:26-31.
14 Na olsem wanem long dispela narapela tok? Insait long dispela bikpela hap taim bai ol man i stap gut long God o nogat? Ating God i popaia na em i wokim ol man ol inap bihainim laik bilong ol yet? Sampela bai mekim pasin i stret taim hevi i painim ol o nogat? Sampela bai kamapim klia olsem ol i laik bai God i bosim ol, na ol i no laikim wok bos bilong ol man i bikhet long God?
[Piksa long pes 13]
God i givim hap taim long ol man inap tru long ol i ken traim save bilong ol long mekim ol wok
[Kredit Lain]
Shuttle: Based on NASA photo