Yu Save Stretim Ol Samting na Bai ‘Taim i No Lus Nating’?
APOSEL Pol i tokim ol Kristen long Efesus: “Yupela i mas lukaut gut long wokabaut bilong yupela. Yupela i no ken wokabaut olsem man i no gat save. Nogat. Yupela i mas wokabaut olsem man i gat save. Nau yupela i gat taim bilong mekim pasin bilong God. Tasol dispela taim nau yumi stap long en, em i taim nogut, olsem na yupela i mas lukaut, nogut dispela taim i lus nating.” (Efesus 5:15, 16) I gat wanem as na em i givim dispela tok long ol? Bilong bekim dispela askim, yumi mas save long sampela pasin na tingting i stap long dispela taun bilong bipo na i givim hatwok long ol Kristen.
Efesus i gat nem olsem taun bilong planti mani, na pasin pamuk nogut tru, na pasin raskol, na kain kain wok bilong ol spirit nogut. Ol tok bilong ol saveman long samting yumi kolim olsem taim, dispela tu i givim hatwok long ol Kristen. Ol haiden Grik long Efesus ol i no bilip olsem taim i wokabaut i go stret tasol. Ol i save skul long tok bilong ol saveman Grik olsem taim man i dai, em i save kamap nupela gen long narapela bodi, i go i go olsem inap long olgeta taim bihain. Olsem na sapos man i tromoi nating taim bilong em, orait taim em i kamap nupela gen, em inap kisim bek dispela taim. Dispela kain tingting inap mekim na ol Kristen long Efesus ol i no tingim tumas hap taim Jehova i bin makim bilong mekim ol samting, olsem taim bilong mekim kot long ol man. Olsem na i stret Pol i tokim ol, ol i no ken larim “taim i lus nating.”
Taim Pol i toktok long dispela tok taim, em i kolim wanpela tok Grik, insait bilong en i olsem wanpela taim stret em narapela i makim bilong mekim wanpela wok. Pol i tokim ol Kristen bilong pastaim long mekim gutpela wok long dispela taim nau ol i gat bilong mekim wok bilong God. Nogut ol i lusim nating taim na dispela hap taim i pinis na God i no marimari moa long ol na i no gat rot moa long kisim bek ol.—Rom 13:11-13; 1 Tesalonaika 5:6-11.
Na yumi tu i stap long wanpela hap taim olsem. Dispela hap taim i no ken kamap gen, olsem na nogut ol Kristen i wok long painim ol amamas bilong dispela graun na lusim nating taim. Ol i mas stap olsem man i gat save na mekim wok long dispela taim nau ol i gat bilong “bihainim olgeta pasin bilong God.” Long dispela rot bai ol inap strongim pasin bilong stap wanbel wantaim Man bilong wokim ol, em God Jehova.—2 Pita 3:11; Song 73:28; Filipai 1:10.