“Jehova i Bin Mekim Gut Tru Long Mi!”
LONG wanpela gutpela apinun long Mas 1985, ol man na meri long Dipatmen Bilong Raitim Tok long hetkota bilong ol Witnes Bilong Jehova long Nu Yok, Amerika, ol i tingim wanpela bikpela samting. I kam inap long dispela taim, Karl F. Klein i bin mekim wok bilong God long olgeta de inap 60 yia. Brata Klein i amamas tru na em i tok: “Jehova i bin mekim gut tru long mi!” Em i tokaut olsem em i save laikim tru tok bilong Song 37:4. Orait nau em i pilaim musik selo, na olgeta i amamas tru long harim.
Insait long 15 yia bihain, Brata Klein i mekim yet wok olsem wanpela bilong ol lain bilong raitim ol tok, na em i insait long Gavening Bodi bilong Ol Witnes Bilong Jehova. Long Janueri 3, 2001, taim em i gat 95 krismas, em i pinisim wok bilong em long graun.
Mama i bin karim Karl long Jemani. Famili bilong em i bin lusim Jemani na i go sindaun long Amerika, na Karl i go bikpela long wanpela hap bilong Sikago, Ilinoi. Taim ol i stap yangpela yet, Karl na liklik brata bilong em, Ted, ol i gat bikpela laik tru long kisim save long Baibel. Karl i bin kisim baptais long 1918, na ol gutpela tok em i harim long wanpela kibung bilong ol Sumatin Bilong Baibel long 1922 i bin kirapim em na long laip olgeta bilong em, em i bin laikim tru wok bilong autim tok. Em i no laik bai wanpela wik i lus na em i no insait long mekim wok autim tok. Long ol wik paslain liklik long taim em i dai, em i bin insait yet long mekim dispela wok.
Karl i bin kamap wanpela wokman bilong hetkota long 1925, na namba wan wok em i bin mekim em wok bilong prinim ol buk. Em i laikim tru musik. Inap sampela yia em i bin pilaim selo insait long wanpela ben bilong wokim musik long wanpela redio stesin i kamapim ol program bilong lotu Kristen. Bihain em i wok long Dipatmen Bilong Wok Autim Tok, na em i kisim bikpela amamas long wok wantaim wasman bilong dispela dipatmen, em T. J. Sullivan. Brata bilong em, Ted, em i marit, na em wantaim meri bilong em, Doris, ol i mekim wok misineri long Pueto Riko.
Inap 50 yia, Karl Klein i bin mekim wok long Dipatmen Bilong Raitim Tok, na em i bin mekim gutpela wok tru, long wanem, em i save amamas long skelim ol buk na nius bilong kisim sampela save moa, na em i gat bikpela save tru long Baibel. Long 1963, Karl i maritim Margareta, em wanpela misineri bilong Jemani i mekim wok long Bolivia. Em i bin helpim gut Karl, na em i bin mekim moa yet taim Karl i sik, olsem na Karl inap mekim yet ol gutpela wok, maski em i abrusim pinis krismas em planti man i save ritaia long en. Karl i gat pasin bilong tokaut stret long ol samting na em i save amamas tru long musik, na dispela tupela pasin i bin helpim em long mekim planti gutpela tok long ol kongrigesen na long ol kibung. Paslain liklik long taim em i dai, em i bin i go pas long bikpela famili Betel bilong Nu Yok long lukautim bung bilong skelim teks bilong de long moningtaim, na olgeta i bin amamas tru long dispela samting na i helpim ol gut tru.
Planti man i save kaunim nius Wastaua long olgeta taim, ol bai tingim gen stori bilong Brata Klein, em wanpela gutpela stori i kamapim ol ekspiriens bilong em, na dispela stori i bin kamap long Wastaua bilong Jun 1, 1985. Yu bai amamas tru long kaunim dispela stori, o sapos yu bin kaunim pinis bai yu amamas long kaunim gen. Na taim yu kaunim dispela stori planti taim, yu ken tingim olsem man bilong raitim dispela stori em i bin lusim 15 yia moa bilong stap olsem Kristen i givim bel tru long stap gut long Jehova.
Em i bilong lain God i bin makim long spirit holi, olsem na bikpela laik bilong Brata Klein em long mekim wok king wantaim Krais long heven. I gat as tru na yumi inap bilip olsem Jehova i bin inapim dispela laik bilong em.—Luk 22:28-30.
[Piksa long pes 31]
Karl long 1943 wantaim T. J. Sullivan na Ted na Doris
[Piksa long pes 31]
Karl na Margareta, Oktoba 2000