Wok Bilong Painim Rot Bilong Stretim Ol Hevi
KIRAP long taim Yunaitet Nesen i kamap nupela, em i tingim ol pikinini na ol hevi bilong ol. Long pinis bilong 1946, Yunaitet Nesen i stretim rot na bai i gat sampela mani i stap, em ol i kolim UNICEF (United Nations International Children’s Emergency Fund), na em bilong stap sotpela taim bilong helpim ol pikinini i stap long ol hap em pait i bagarapim.
Long 1953 dispela wok bilong bungim mani bilong taim bilong ol bikpela hevi, em i kamap wanpela oganaisesen bilong stap olgeta taim. Nau ol i kolim olsem United Nations Children’s Fund, tasol ol leta olsem UNICEF i makim yet dispela lain. Olsem na inap 50 yia samting UNICEF i wok long lukautim ol pikinini long olgeta hap long kaikai, klos, na marasin, na taim rot i op ol i lukautim ol pikinini long ol narapela samting ol i mas kisim.
Long 1959 Yunaitet Nesen i orait long wanpela tokaut i makim lo bilong ol samting i stret ol pikinini i ken kisim, na long dispela rot planti man moa i kisim save long ol samting ol pikinini i mas i gat. (Lukim blok, pes 5.) Ol i laik bai dispela tokaut i kirapim ol man long tingting long ol hevi bilong ol pikinini na wok long stretim long rot bilong mani, na pasin bilong wok bung wantaim, na ol narapela samting.
Tasol olsem wanpela buk (1980 Year Book bilong Collier) i tok, “twenti yia bihain, planti bilong ol 1.5 bilion pikinini i stap long olgeta hap, ol i no kisim yet ol samting dispela ‘lo’ i makim bilong ol, olsem gutpela kaikai, strongpela skin, na ol narapela samting bilong helpim ol long i stap gut.” Yunaitet Nesen i luksave olsem i gat wok yet long stretim hevi bilong ol pikinini, na tingim ol mak ol i putim pinis, olsem na ol i makim 1979 olsem Intenesenel Yia Bilong Pikinini. Long olgeta hap ol gavman, na sampela lain i wok bung wantaim bilong helpim ol narapela, na sampela lain bilong lotu, ol i kirap wantu long painim rot bilong stretim dispela hevi.
Em Ol “Tok Nating,” A?
Tasol sori tru, bihain ripot bilong UNICEF i tok olsem, insait long dispela Intenesenel Yia Bilong Pikinini, ol pikinini bilong ol kantri i stap rabis liklik, ol i no gat gutpela sindaun. Taim dispela yia i laik pinis, 200 milion bilong ol dispela pikinini i sot yet long kaikai. I gat 15 milion pikinini i no winim yet 5-pela krismas na ol i dai, na planti bilong ol em ol i dai, long wanem, ol i no gat gutpela kaikai. Long dispela Yia Bilong Pikinini, ol mama bilong ol kantri i stap rabis i karim 100 pikinini long olgeta wan wan minit, na 15 bilong ol i bin dai taim ol i no winim yet wanpela krismas. Na namba bilong ol dispela pikinini em ol i bin skul inap long gret 6 i no winim 40 pesen. Stori bilong wanpela nius (Indian Express) long dispela ripot bilong UNICEF i tok olsem dispela Yia Bilong Pikinini i olsem wanpela “tok nating” tasol.
Sampela i bin luksave olsem dispela Yia Bilong Pikinini bai i no kamapim gutpela samting. Long kirap bilong dispela yia, Fabrizio Dentice i raitim wanpela stori long nius L’Espresso olsem: “I mas i gat samting i winim dispela Yia Bilong Pikinini bilong stretim hevi bilong ol.” Nius i tok: “Ol samting yumi mekim long i stap bilong yumi dispela i save bosim pasin bilong yumi, na yumi gat wok long senisim.”
Bilong wok yet long painim rot bilong stretim hevi bilong ol pikinini, ol hetman bilong olgeta hap i wokim wanpela bung long hetkota bilong Yunaitet Nesen long Septemba 1990. I no gat wanpela taim bipo em bikpela lain hetman i bung olsem. Namba bilong ol hetman long dispela bung i winim 70. Dispela bung i bilong mekim sampela wok moa antap long dispela Kontrak Bilong Ol Lo Bilong Pikinini, em planti kantri i orait long en long Novemba 20, 1989, na ol i kirap long bihainim long Septemba 2, 1990. Taim mun Septemba i laik pinis, 39 kantri i wanbel long bihainim ol dispela lo.
I no longtaim i go pinis na UNICEF i bin tok: “Dispela Kontrak i wok hariap long kamap olsem nambawan lo bilong bosim i stap bilong man em planti kantri i wanbel long en, na dispela i bikpela samting bilong kirapim pasin bilong tingim ol pikinini long olgeta hap.” Tru tumas, i kam inap long Novemba 1999, i gat 191 kantri i orait long dispela Kontrak. UNICEF i tok: “Winim olgeta taim bipo wok bilong tingim na lukautim ol pikinini long ol samting ol i mas i gat i kamap gutpela moa insait long dispela 10-pela yia bihain long dispela Kontrak Bilong Ol Lo Bilong Pikinini.”
Maski samting i kamap gutpela moa, presiden bilong Jemani, Johannes Rau, i tok: “Sori tru, long taim bilong yumi i gat wok yet long kirapim ol man long tingim wanem pasin i stret long mekim long ol pikinini.” O long taim bilong yumi ol pikinini i gat ol bikpela hevi i stap yet! Long Novemba 1999, UNICEF i tok olsem “i gat planti wok i stap yet,” na ol i stori moa olsem: “Long olgeta hap i gat samting olsem 12 milion pikinini i no winim yet 5-pela krismas na ol i dai long olgeta yia, na planti ol i dai long ol sik i no hatwok long stretim. Long ol kantri i stap rabis, i gat samting olsem 130 milion pikinini i no save skul. . . . Samting olsem 160 milion pikinini i bagarap, long wanem, ol i no gat gutpela kaikai. . . . Planti pikinini ol man i no gat laik long lukautim, ol i stap nating long ol haus bilong ol pikinini i no gat papamama, o long kain haus olsem em sampela oganaisesen i lukautim; ol i no gat rot long kisim skul, o kisim ol gutpela marasin samting bilong helpim ol taim ol i gat sik. Planti taim ol man i mekim pasin nogut long ol kain pikinini olsem. Samting olsem 250 milion pikinini i mekim sampela kain wok leba.” Na tu, UNICEF i bin tok olsem i gat 600 milion pikinini i stap rabis olgeta, na i gat 13 milion pikinini em AIDS bai kilim i dai papa o mama bilong ol paslain long 2001.
I luk olsem ol lain i wok politik i hatwok long painim gutpela rot bilong stretim hevi bilong ol pikinini. Tasol i no olsem ol pikinini bilong ol kantri i stap rabis ol tasol i karim hevi, nogat, ol pikinini bilong ol kantri i gat planti samting, ol i save lus long ol narapela kain samting.
[Rait long pes 4]
“Sori tru, long taim bilong yumi i gat wok yet long kirapim ol man long tingim wanem pasin i stret long mekim long ol pikinini”
[Blok/Piksa long pes 5]
Tokaut Bilong Yunaitet Nesen Long Ol Lo Bilong Pikinini:
● Pikinini i mas i gat nem na ples.
● Papamama i mas mekim gut long em na sori long em na lukautim em long ol samting bilong skin.
● Pikinini i mas i gat gutpela kaikai, na haus, na marasin samting sapos em i gat sik.
● Sapos skin bilong em i nogut o em i gat sik longlong, i mas i gat man bilong lukautim em.
● Long taim bilong hevi, mas helpim em pastaim.
● Yumi mas helpim pikinini sapos ol i no lukautim em, o ol i mekim nogut long em.
● Pikinini i mas pilai, na amamas, na go long skul, na em i mas i gat rot bilong kisim save, na bihain em inap mekim gutpela wok na em i no stap nating tasol.
● Em i mas i gat rot bilong mekim wok long save em i kisim, na no ken pasim o daunim em.
● Em i mas i go bikpela namel long ol lain i save tingim em, na isi long em, na prenim em, na i stap isi wantaim, olsem brata brata.
● Pikinini i mas i gat rot bilong kisim ol dispela samting, maski em i bilong wanem lain o skin, o em i man o meri, o em i bilong wanem lotu o lain politik, o em i gat narapela tingting, o ol tumbuna i bilong wanem hap, o em i gat wanem kain sindaun, o mama i karim em we, o kain samting olsem.
[Kredit Lain]
Ol i kisim dispela tok long wanpela buk, em Everyman’s United Nations
[Ol Piksa Kredit Lain long pes 3]
UN PHOTO 148038/Jean Pierre Laffont
UN photo
[Piksa Kredit Lain long pes 4]
Photos on pages 4 and 5 Giacomo Pirozzi/Panos Pictures