Sampela Tok i Kam Long Olgeta Hap
Hamas Ol i Rausim Bel?
Nius bilong moningtaim long Buenos Aires (Clarín) i tok: “Inap 33 milion meri i rausim bel na ol i mekim long pasin em gavman i orait long en, na planti meri i hait na mekim long pasin em gavman i no orait long en. Sapos yumi bungim dispela tupela lain wantaim, i olsem long olgeta hap bilong graun 40 milion inap 60 milion meri i rausim bel long olgeta yia.” Nius i tok, “bikpela hap lain (inap 76 pesen) bilong olgeta manmeri long graun ol i stap long ol kantri i tambuim pasin bilong rausim bel.” Pasin bilong rausim bel i kilim i dai planti pikinini tru inap olsem olgeta manmeri bilong kantri Ajentina, na i olsem long olgeta yia ol i kilim i dai olgeta manmeri bilong wanpela kantri olsem Briten, o Isip, o Frans, o Itali, o Saut Afrika, o Turki. Em bikpela lain tru inap olsem olgeta manmeri i dai insait long ol 6-pela yia bilong Namba 2 Pait, olsem 50 milion samting.
Nambawan Ples Bilong i Stap?
Yunaitet Nesen i skelim na tokaut olsem Kanada em i nambawan ples bilong sindaun long en, winim ol narapela kantri. Wanpela nius (The Toronto Star) i tok, “i gat 173 kantri long lista na insait long 5-pela yia ol i bin wokim lista, inap tupela taim Kanada i stap namba wan long lista.” Na nius i tok, “tasol i no olsem ol Kanada i gat gutpela sindaun tru, winim olgeta narapela manmeri.” Bilong wanem ol i tok Kanada em i nambawan ples? Wanpela lain bilong Yunaitet Nesen (UN Development Program) i wokim ripot long ol kantri na ol i save skelim 3-pela samting: ol manmeri bilong kantri i kisim hamas pe (averes); ol i skul hamas yia (averes); ol i stap hamas krismas (averes). Planti Kanada i winim planti yia long i stap laip, inap olsem 77.2 (averes), na long dispela samting Kanada em i namba 6 long lista. Na ol Kanada i paslain long planti kantri long putim bikpela mani bilong helpim ol skul na haus sik samting, na planti Kanada i gat televisen na ka, winim ol narapela kantri.
Ol Lain Retskin Bilong Brasil
Wanpela nius (O Estado de S. Paulo) i tok: “Long Brasil i gat 59 lain retskin i stap longwe long ol narapela manmeri, o wan wan taim tasol ol i bungim ol waitskin tasol ol i birua long ol.” Na nius i tok: “Lain Bilong Lukautim Ol Retskin i bin kisim save long 9-pela lain tasol bihain long yia 1980.” Long olgeta taim ol i lukim sampela lain moa long bikbus bilong Amason em ol i no save long ol bipo. Planti lain retskin i stap longwe long ol narapela manmeri na lain bilong ol em inap olsem 150 manmeri tasol o liklik long dispela. Long Brasil i gat 532 hap bilong ol retskin, na i gat 180 narapela narapela lain retskin, na 260 tausen retskin olgeta. Ol i stap long bikpela hap graun em inap 909,000 skwea kilomita—em 11 pesen bilong graun bilong kantri Brasil. Tasol ol i no makim ol arere bilong 50 pesen bilong graun bilong ol. Ol saveman bilong skelim pasin na sindaun bilong ol man, ol i laik helpim ol narapela narapela lain retskin bilong Brasil long bung wantaim na lukautim pasin tumbuna bilong ol, nogut pasin bilong nau i pinisim. Olsem na ol i lainim ol retskin long kisim piksa bilong ol pasin bilong ples long video na soim video long ol lain i stap klostu. Lain Waiapi i lukim video bilong lain Soe, na ol Soe i lukim bilong ol Waiapi, na bihain tupela lain hia i bung; em namba wan taim ol i bung wantaim. Tok ples bilong ol i wankain liklik, olsem na ol inap toktok wantaim long ol stori na pasin bilong ol tumbuna, na long pasin bilong ol long painim abus, na oraitim sik, na kukim kaikai, na lumim laplap.”
Ol Dokta i Katim Em Gut
Ol dokta i bin katim Pop John Paul Namba 2 long Epril, 1994, na stretim skru antap long lek. Wanpela nius bilong Itali (La Stampa) i tok, ‘i stret ol dokta i ken amamas na tok ol i mekim gut wok.’ Tasol taim ol dokta i katim em bipo, wok bilong ol i no bin kamap gutpela. Long yia 1981, wanpela man i traim long kilim em i dai na ol dokta i mas katim em. Taim ol i mekim olsem, ol i givim blut long em na long rot bilong dispela blut, sik nogut (cytomegalovirus) i kisim em. Inap tupela mun ol dokta i wok long stretim dispela sik. Olsem na nius i tok, taim ol dokta i katim em long 1994, ol i no givim blut long em, maski “bikpela blut i lus.” Ol i kisim sampela blut bilong em yet na klinim na bekim bek long skin bilong em.
No Gat Rot Yet Bilong Stretim Sik AIDS
Long Japan, long Ogas 1994, ol i wokim Namba 10 Kibung Intenesenel Bilong Sik AIDS. Ol lain i kibung ol i tok, ol wok bilong painim marasin bilong pasim na stretim sik AIDS, ol dispela wok i no kamap gutpela na ol i ting ol i no inap painim paslain long yia 2000. Dokta James Curran em i bilong wanpela lain bilong pasim sik ol i stap long Atlanta, Jojia, na em i tok: “Nau jem bilong kamapim sik AIDS (HIV) i kamap pinis long olgeta hap, olsem na mipela i save bihain dispela sik bai go bikpela tru.” Ol i ting, jem i stap pinis long skin bilong 17 milion manmeri long olgeta hap bilong graun, em 3 milion moa winim yia bipo. Sori tumas, inap wan milion ol i pikinini. Wol Helt Oganaisesen i tok, sapos jem HIV i wok long kamap strong olsem, orait long yia 2000 bai em i kamap long 30 milion i go inap 40 milion manmeri. Insait long 12-pela mun, sik AIDS i kamap tru long planti man moa, inap 60 pesen, olsem na long Ogas 1994, sik AIDS i kisim pinis 4 milion manmeri na planti ol i dai pinis. Taim jem HIV i go insait pinis long skin bilong man, 10-pela yia inap lus pastaim na bihain ol mak bilong sik AIDS i kamap long skin bilong em. Sik AIDS i kalap long planti man long olgeta hap na ol dokta i no painim kwik rot bilong pasim o stretim, olsem na ol i toksave olsem ol bai mekim Kibung Bilong Sik AIDS long olgeta tupela tupela yia, na i no long olgeta yia olsem long nau. Ol bai kibung gen long Julai 1996, long Vankuva, long Britis Kalambia, long Kanada.
Ol i Lain Taim Ol i Liklik Yet
Wanpela nius bilong Toronto (The Globe and Mail) i tok olsem: “Tingting bilong pikinini long ol narapela man em samting bilong pasin ol man i mekim long em taim em i no winim yet 3-pela krismas. Dispela inap strongim tingting na bel bilong pikinini na lainim em long tingim gut rot bilong stretim hevi.” Nius i tok moa olsem: “Pikinini i go bikpela namel long ol manmeri i stap rabis, i hatwok long em i kamap man i gat gutpela tingting na mekim gutpela wok.” Dokta Fraser Mustard em i presiden bilong wanpela lain (Canadian Institute for Advanced Research) na em i tok, ol dispela kain pikinini i save skul inap wanpela o tupela yia tasol na ol i lusim, na ol i ting pasin pait em i rot bilong stretim ol hevi. Em i tok, “yumi mas lain long pasin bilong karim na stretim hevi bambai yumi inap i stap gut wantaim ol narapela man.” Nius (Globe) i tok, Yunivesiti Yel na Yunivesiti bilong Montriol i skelim dispela samting na ol i tok, “sapos papamama i pas gut wantaim pikinini, dispela inap helpim tru pikinini na bai skin bilong em i kamap strong, na em i kisim gutpela save, na i stap belgut.”
Was Gut Taim Yu Raun
Taim yu raun, tingim gut ol samting ol man klostu long yu i mekim. Wanpela nius (Claúdia) bilong Brasil i tok: “Ol man bilong stilim switkes o paus, ol i save mekim moa yet long ol man i no was gut.” Nius i tok: “Sapos wanpela man i bamim yu, o kapsaitim kopi samting long klos bilong yu, was gut. Em trik bilong man i laik pulim tingting bilong yu.” Na sapos wanpela man i askim yu long helpim em o soim rot long em, was gut. Sapos yu larim liklik samting i pulim tingting bilong yu, ating bai switkes bilong yu i lus. Wanpela man (Adriano Caleiro) long Ples Balus Intenesenel bilong biktaun Sau Paulo em i tok, yu mas was gut long switkes bilong yu long taim yu givim tiket long ples balus, na taim yu sainim pepa bilong rentim ka, na taim yu go kamap long haus pasindia o taim yu lusim, na taim yu sindaunim pikinini long teksi, o yu lukluk long ol samting long windo bilong stua, o yu sindaun dring kopi. Nius i tok, sapos wanpela man i stilim ol ki bilong yu, kwiktaim senisim ol lok. Stilman inap giaman olsem em i painim pinis switkes bilong yu na em i bekim olgeta samting long yu, tasol em i kisim pinis mak bilong ol ki bambai em inap wokim ol narapela ki na go insait long haus bilong yu bihain.
Ol i No Gat Tingting Nogut
Wanpela lain bilong helpim ol turis long Japan (Japan Helpline) ol i tok, sapos ol turis i lukim toksave olsem “I Tambu Long Ol Man Bilong Narapela Kantri,” ol i no ken kros o bel hevi. Ol man i putim kain toksave olsem, ol i laik helpim ol turis. Papa bilong wanpela liklik stua bilong televisen samting em i stori gut long dispela kain tingting. Stua bilong em i stap long Akihabara long biktaun Tokio na em i tok: “Mi no save long ol narapela tok ples na dispela i givim hevi long planti man bilong ol narapela kantri em ol i kam insait long stua bilong mi. Olsem na mi ting i gutpela mi putim toksave olsem na bai ol i no kam insait.” Wanpela nius (Asahi Evening News) i tok: “Planti man i putim kain toksave olsem, ol i no save long ol manmeri i no bilong Japan na ol i ting sapos ol i tambuim ol olsem, em gutpela rot bilong stretim dispela hevi.”
Ol Man i Skul Gut i Kilim Ol Rat
Kaunsil bilong biktaun Bombe i putim toksave olsem i gat wok bilong 76 man bilong kilim ol rat. Tasol hevi i kamap. Wanpela nius (Indian Express) i stori olsem: “Winim 40,000 man i laik kisim dispela wok, tasol planti tru ol i man i bin winim bikpela skul yunivesiti, o ol i go long koles na ol i lusim. Tasol man bilong kilim ol rat i mas skul inap long Gret 6 tasol.” Wanpela man bilong kaunsil i tok: “Olsem wanem bai mipela i givim wok bilong kilim ol rat long wanpela man i winim bikpela skul?” Ol man bilong kilim ol rat ol i save raun painim ol rat long taim bilong tudak na paitim ol long bikpela stik na kilim ol i dai. Taim ol i kilim pinis 25 rat ol i kisim pe olsem K4. Tasol kaunsil i gat narapela hevi tu, em bilong lotu. Ol man bilong lotu Jain na sampela lotu moa i tambu long kilim ol animal, na ol i save grisim ol wokman long mani bambai ol i sori long ol rat na ol i no kilim ol i dai.