Baibel i Tok Wanem?

Husat i Bilong i Go Long Heven?

BOM bilong ol paitman i pairap long balus i raun long antap na i kilim i dai olgeta manmeri i stap long balus. Ol man i tokim ol famili na pren bilong dispela lain i bagarap, ol i stap nau long heven; i olsem dispela i stretim pasin nogut ol man i mekim long bagarapim ol na i no taim yet bilong ol long i dai.

Wanpela man i gat biknem long wokim musik em i dai na ol i tok, ‘nau em i winim biugel wantaim ol ensel long heven.’

Sik o hangre o birua i mekim na sampela pikinini i dai taim ol i liklik yet na ol pris pasto i tok, nau ol dispela pikinini i stap gutpela long heven, o ol i kamap ensel long heven!

Taim birua samting i bagarapim ol yangpela o ol lapun, yu ting God i laik stretim dispela na em i kisim ol i go long heven bilong i stap gutpela wantaim em? Yu ting God i laik lukautim ol gutpela man na em i kisim ol i go long heven? Baibel i tok wanem?

Ol i No i Stap Long Heven

Baibel i tok klia olsem: “Ol man i save mekim pasin nogut, ol bai i no inap i go insait long kingdom bilong God.” (1 Korin 6:9) Tasol Baibel i toktok tu long planti stretpela man na ol man i kisim bagarap long han bilong ol man nogut, em ol i no bilong i go long heven.

Klostu long taim ol man i kilim i dai Jon Bilong Baptais, Jisas yet i tok: “Mi tok tru long yupela, Jon Bilong Baptais em i winim olgeta man i bin kamap long graun. Tasol man i stap liklik tru long kingdom bilong heven, em i winim Jon.” (Matyu 11:11) King nogut Herot i laik bagarapim Jisas na em i kilim i dai olgeta manki i no winim yet tupela krismas, em ol i stap long Betlehem na ol hap klostu. (Matyu 2:16) Tasol Jisas i tok: “I no gat narapela man [o meri o pikinini] i bin i go antap long heven. Nogat. Pikinini Bilong Man em wanpela tasol i bin lusim heven na i kam daun.” (Jon 3:13) Bilong wanem Jisas i no tok ol dispela lain i bagarap long han bilong man nogut ol i stap long heven?

Jisas i Opim Rot

Jisas i tok: “Mi yet mi rot, na mi as bilong tok tru, na mi as bilong laip,” na aposel Pol i tok, Jisas em i “kirap paslain long ol arapela man i dai pinis, olsem namba wan kaikai i redi long gaden.” (Jon 14:6; 1 Korin 15:20) Olsem na i no gat wanpela man inap i go paslain long em long heven. Tasol taim Jisas i go antap long heven 40 de bihain long taim em i kirap bek, yu ting ol bilipman bilong bipo ol i kirap bek na bihainim em i go long heven? Inap 10-pela de bihain, aposel Pita i tok long King Devit olsem: “Em i dai pinis, na ol i planim em. Na matmat bilong en i stap namel long yumi inap long nau. . . . Devit i no bin i go long heven.”​—Aposel 2:​29, 34.

Olsem na taim God i kisim man i go long heven, i no olsem God i laik stretim samting nogut i bin painim em, o God i laik givim pe long em long gutpela pasin em i bin mekim. Nogat. God i laik kisim sampela manmeri i go long heven bilong kamapim wanpela lain king em Krais i bosim, na God i makim ol long spirit holi.​—Rom 8:​15-17; KTH 14:​1-3.

Kingdom Bilong Heven

Jisas i kolim dispela lain king o gavman olsem “kingdom bilong heven,” o “kingdom bilong God.” (Matyu 5:​3, 20; Luk 7:28) God i no laik bai planti manmeri tru i insait long dispela lain ol bai mekim wok king. Olsem na Jisas i kolim ol olsem “liklik lain sipsip.” (Luk 12:32) Long tok ples ol i raitim dispela hap bilong Baibel long en long pastaim, dispela tok “liklik” (mi·krosʹ) i narapela kain tru long tok bikpela (meʹgas). Long Luk 12:​32, dispela tok i makim hamas i insait long dispela lain, olsem ol i no planti. Olsem na i no olgeta manmeri ol inap insait long “kingdom bilong heven.” Yumi ken tok piksa olsem: Sapos ol i tokim yu long kapsaitim liklik wara i go insait long glas, bai yu no pulimapim tumas na wara i kapsait, a? Olsem tasol i no planti manmeri tumas i insait long dispela “liklik lain sipsip.” God i makim pinis hamas manmeri (“liklik lain”) bai ol i mekim wok king wantaim Krais.

Aposel Jon i kolim namba tru bilong dispela lain king, em 144,000. (KTH 14:​1, 4) Pastaim Buk Kamapim Tok Hait i tok, ol dispela manmeri i ‘bilong olgeta lain man, na olgeta tok ples, na olgeta kain skin, na olgeta kantri, na ol i kamap lain king na lain pris bilong God,’ na ol i mas i stap king long heven na bosim olgeta manmeri bilong graun. (KTH 5:​9, 10) Dispela lain king i wok wantaim Krais Jisas, em dispela Kingdom Jisas i lainim ol disaipel long beten long en. Long rot bilong dispela Kingdom bai God i pinisim ol wok gavman nogut ol man i bin mekim, na em bai kamapim bek stretpela pasin na gutaim long graun, em ples bilong ol man, na bai olgeta manmeri long graun inap i stap oltaim oltaim.​—Song 37:29; Matyu 6:​9, 10.

Em i Makim Lain King

Pasin giaman na pasin nogut i pulap long ol gavman bilong graun em Kingdom bai senisim, olsem na yumi save God i mas skelim gut ol man ol bai insait long dispela gavman bilong heven, a? Ol manmeri bilong nau i stap olsem ol planti handet pasindia long wanpela balus i bagarap na i stap long taim nogut bilong bikpela win na ren. Sapos yu stap long dispela balus, yu no laik bai ol yangpela man i no gat save ol i stiaim balus, a? Yu laik bai ol i skelim gut ol man bilong stiaim balus na makim tasol ol man ol inap tru long mekim wok.

Long lain ol bai mekim wok king wantaim Krais long heven, yumi amamas long save, ‘God yet i bin putim olgeta wan wan olsem em yet i laikim.’ (1 Korin 12:18) I no laik bilong man o laik long kisim biknem na man i kisim wok long Kingdom. (Matyu 20:​20-23) God i kolim pinis ol mak man i mas winim long bilip na pasin bilong em, na ol man i winim ol dispela mak ol tasol inap insait long Kingdom. (Jon 6:44; Efesus 5:5) Ol tok Jisas i mekim taim em i kirap long autim tok antap long maunten i makim ol pasin dispela lain i mas mekim bambai ol inap mekim wok king wantaim em​—ol i mas tingim gut ol samting bilong spirit, na daunim nem bilong ol yet, na laikim tumas long bihainim stretpela pasin, na mekim pasin marimari, na bel bilong ol i mas i stap klin, na ol i mas mekim dai ol kros na pait.​—Matyu 5:​3-9; lukim tu Kamapim Tok Hait 2:10.

Tasol gutpela tru, klostu olgeta manmeri i bin i stap long graun, maski God i no bin makim ol bilong i stap king long heven, ol i no lus. Ol inap kisim laip oltaim long graun aninit long Kingdom bilong God. Ol manmeri i kisim bagarap longtaim bipo long han bilong ol man nogut, ol bai kirap bek na i stap hia long graun wantaim ol manmeri i abrusim bagarap na ol i lukim Kingdom bilong God “i kam” tru. Bai God i truim tok promis bilong em: “Ol gutpela stretpela man bai i stap gut oltaim long graun.”​—Matyu 6:​9, 10; Sindaun 2:21; Aposel 24:15.