Yu Ting Olgeta Gutpela Man i Go Long Heven?

BIHAIN long laspela kaikai em Jisas i bin mekim wantaim ol aposel bilong em long apinun paslain long ol birua i kilim em i dai, Jisas i tok promis long ol olsem em bai givim wanpela ples long ol long heven olsem prais. Em i tok: “Long haus bilong Papa bilong mi i gat planti rum i stap, na mi go bilong redim ples bilong yupela.” (Jon 14:2) Bilong wanem Jisas bai givim wanpela ples long ol long heven? Ol bai mekim wanem long heven?

Jisas i tingim wanpela spesel wok em ol aposel bilong em bai mekim. Long dispela apinun yet, em i tok: “Taim ol samting i kamap bilong traim mi, yupela i bin i stap wantaim mi, na yupela i no lusim mi. Papa bilong mi em i givim kingdom long mi, olsem tasol mi givim kingdom long yupela.” (Luk 22:​28, 29) God i bin tok promis long Jisas olsem em bai stap King na givim wanpela samting long ol manmeri bilong graun, em samting ol i sot tru long en​—wanpela gutpela gavman. Jisas bai kisim bek ol man long ol pen na hevi bilong ol na em bai bagarapim ol lain i mekim nogut long ol. Tru, ol manmeri Jisas bai bosim ol bai stap “long olgeta hap bilong graun,” tasol sia king bilong Jisas bai stap long heven.​—Song 72:​4, 8; Daniel 7:​13, 14.

Tasol i no Jisas wanpela tasol bai stap king na bosim graun. Olsem na em i tok promis long ol aposel bai kisim ples long heven. Ol i namba wan lain em i makim bilong “i stap king na bosim ol manmeri bilong graun.”​—KTH 5:10.

Hamas man bai go long heven? Olsem long ol narapela gavman, liklik lain tasol i mekim wok king long Kingdom Bilong God long heven, na bikpela lain manmeri i stap aninit long wok bos bilong dispela Kingdom. Jisas i tokim ol man husat bai mekim wok king wantaim em: “Yupela liklik lain sipsip, yupela i no ken pret. Papa bilong yupela em i tok pinis long em bai i stap king bilong yupela na givim kingdom bilong en long yupela.” (Luk 12:32) Namba bilong dispela “liklik lain” em bai inap olsem 144,000. (KTH 14:1) Dispela em i liklik namba tasol taim yumi skelim wantaim planti milion manmeri em ol bai stap oltaim oltaim long graun aninit long dispela Kingdom.​—KTH 21:4.

Olsem na i no olgeta gutpela man bai go long heven. Aposel Pita i tokaut klia long King Devit olsem: “Devit i no bin i go long heven.” (Aposel 2:34) Jon Bilong Baptais em i gutpela man. Tasol tok bilong Jisas i makim olsem em bai i no kisim namba olsem king long heven. Jisas i tok: “Jon Bilong Baptais em i winim olgeta man i bin kamap long graun. Tasol man i stap liklik tru long kingdom bilong heven, em i winim Jon.”​—Matyu 11:11.

Bai Yu Kisim Prais Bilong Ol Gutpela Man?

Bilong kisim prais bilong i stap oltaim oltaim long graun, man i mas mekim wanem? Jisas i tok: “God i gat wanpela Pikinini tasol i stap. Tasol God i laikim tumas olgeta manmeri bilong graun, olsem na em i givim dispela wanpela Pikinini long ol. Em i mekim olsem bilong olgeta manmeri i bilip long em ol i no ken lus. Nogat. Bai ol i kisim laip i stap gut oltaim oltaim.” (Jon 3:16) Tingim: God i laikim tumas ol manmeri bilong graun na dispela i kirapim em long wokim rot bambai olgeta manmeri inap kisim laip i stap oltaim oltaim; tasol ol manmeri husat i “bilip,” ol tasol bai kisim dispela prais.

Stretpela save i mas i stap olsem as bilong bilip. (Jon 17:3) Yu inap kamapim klia olsem yu gutpela man sapos yu kisim save long ol samting Jehova i tingting pinis long mekim bilong helpim ol man. Larim bilip bilong yu long ol samting yu lainim i kirapim yu long mekim wok. Na yu ken bilip tru olsem, rot i op long yu inap kisim laip i no gat pinis bilong en.

[Blok long pes 7]

Baibel i Tok Wanem?

Askim:

Wanem samting i painim ol gutpela man taim ol i dai?

Bekim:

“Ol man i dai pinis, ol i no inap save long wanpela samting.”​​—SAVEMAN 9:​4, 5.

Askim:

Ol gutpela man inap wetim wanem gutpela samting bai kamap long bihain?

Bekim:

“Taim i laik kamap na olgeta manmeri i stap long matmat ol bai i harim maus bilong Pikinini, na ol bai i lusim matmat na i kam ausait.”​​—JON 5:​28, 29.

Askim:

Klostu olgeta gutpela manmeri bai i sindaun we?

Bekim:

“Ol stretpela man bai i kisim graun God i givim ol, na bai ol i stap oltaim long en.”​​—SONG 37:29.