Skul Yumi Kisim Long Jisas

Long Kingdom Bilong God

Kingdom Bilong God em wanem samting?

Kingdom Bilong God em wanpela gavman bai i bosim graun olgeta. Jisas i tok: “Yupela i mas mekim kain prea olsem, . . . ‘Kingdom bilong yu i mas i kam. Mipela i mas bihainim laik bilong yu long graun olsem ol i save bihainim long heven.’ ”​—Matyu 6:​9, 10; Daniel 2:44.

Husat ol bai mekim wok king long Kingdom Bilong God?

Mama i karim Jisas bilong i stap King long Kingdom Bilong God. Wanpela ensel i tokim mama bilong Jisas: “God bai i putim em i stap king olsem tumbuna bilong en Devit. Em bai i stap king bilong ol lain bilong Jekop oltaim. Na wok king bilong en bai i no inap pinis.” (Luk 1:​30-​33) Na tu, Jisas i makim sampela disaipel bilong em long mekim wok king wantaim em. Em i tokim ol aposel bilong em olsem: “Taim ol samting i kamap bilong traim mi, yupela i bin i stap wantaim mi, na yupela i no lusim mi. Papa bilong mi em i givim kingdom long mi, olsem tasol mi givim kingdom long yupela.” (Luk 22:​28, 29; Daniel 7:27) Namba bilong ol disaipel bai i mekim wok king wantaim Jisas em 144,000.​—KTH 5:​9, 10; 14:1.

Dispela gavman bai stap we?

Kingdom Bilong God bai i stap long heven na bosim graun. Jisas i tokim ol disaipel bilong em: “Sapos mi go redim ples bilong yupela [long heven], bai mi kam bek na kisim yupela i go i stap wantaim mi. Na ples mi stap long en, yupela tu bai i stap long en wantaim mi. . . . Mi go long Papa.”​—Jon 14:​2, 3, 12; Daniel 7:​13, 14.

Kingdom Bilong God bai i mekim wanem long ol pasin nogut?

Jisas bai i pinisim ol manmeri nogut long graun. Jisas i tok: “Taim Pikinini Bilong Man [Jisas] i kam bek olsem king wantaim olgeta ensel, orait em bai i sindaun long sia king bilong en. Na olgeta lain manmeri bai ol i kam bung long pes bilong em. Na em bai i tilim ol na putim ol long tupela lain . . . Na ol dispela lain [ol manmeri nogut] bai i go bilong kisim pe nogut . . . Tasol ol stretpela manmeri bai i kisim laip i stap oltaim oltaim.”​—Matyu 25:​31-​34, 46.

Husat bai stap long graun aninit long dispela Kingdom?

Jisas i tok: “Ol manmeri i save daunim nem bilong ol yet, em ol i ken amamas. Bai God i givim olgeta graun long ol.” (Matyu 5:5; Song 37:29; 72:8) Graun bai i pulap long ol manmeri em nau ol i lain long laikim tru narapela narapela. Jisas i tokim ol disaipel bilong em: “Nau mi givim nupela lo long yupela olsem, yupela wan wan i mas laikim tru ol arapela. Mi bin laikim yupela tru, na olsem tasol yupela wan wan i mas laikim tru ol arapela. Sapos yupela wan wan i laikim tru ol arapela man bilong lain bilong mi, orait dispela bai i soim olgeta man olsem, yupela i disaipel bilong mi.”​—Jon 13:​34, 35.

Kingdom Bilong God bai i mekim wanem long ol manmeri long graun?

Jisas bai i pinisim sik bilong ol manmeri. Taim Jisas i stap long graun, “em i autim tok bilong kingdom bilong God long ol [man], na em i mekim orait ol manmeri i gat sik.” (Luk 9:11) Long driman aposel Jon i lukim Jisas i kirap bek pinis, na bihain em i tok: “Nau mi lukim nupela skai na nupela graun i stap. . . . Na long sia king mi harim maus bilong wanpela man i singaut strong olsem, ‘Harim. Nau haus bilong God i stap wantaim ol manmeri. . . . Em bai i mekim drai wara i stap long ai bilong olgeta bilong ol. Na ol manmeri bai i no i dai moa.’ ”​—KTH 21:​1-4.

Kingdom Bilong God bai i kamapim bek Paradais long graun. Wanpela man nogut em ol i bin kilim em i dai wantaim Jisas, em i tok: “Jisas, taim yu kamap king, yu ken tingting long mi.” Na Jisas i tokim em olsem: “Mi tok tru long yu nau, bai yu stap wantaim mi long Paradais.”​—Luk 23:​42, 43; NW; Aisaia 11:​4-9.

Bilong kisim sampela save moa, lukim buk Tru Tru Baibel i Tok Wanem? long sapta 8a

[Futnot]