Stadi 6
Kingdom Bilong God Em i Wanem Samting?
Kingdom Bilong God i stap we? (1) Husat i stap King bilong en? (2)
I gat sampela man i wok wantaim King? Sapos olsem, hamas man i mekim dispela wok? (3)
Wanem samting i makim olsem yumi stap long taim bilong las de? (4)
Kingdom Bilong God bai mekim wanem bilong helpim ol man long bihain? (5-7)
1. Taim Jisas i stap long graun, em i skulim ol disaipel bilong em long beten long Kingdom i mas i kam. Kingdom em wanpela gavman i gat king olsem bos bilong en. Kingdom Bilong God em i narapela kain gavman. Em i stap long heven na em bai bosim dispela graun. Em bai litimapim o mekim holi nem bilong God. Em i mekim na bai ol man i bihainim laik bilong God long graun olsem ol i save bihainim long heven.—Matyu 6:9, 10.
2. God i bin tok promis olsem Jisas bai stap King long Kingdom Bilong Em. (Luk 1:30-33) Taim Jisas i stap long graun pasin bilong em i kamapim klia olsem em bai stap gutpela King tru i mekim stretpela pasin. Taim em i go bek long heven, i no wantu tasol em i kamap King long Kingdom Bilong God. (Hibru 10:12, 13) Long 1914, Jehova i givim bikpela namba long Jisas olsem Em i bin tok promis long em. Kirap long dispela taim, Jisas i mekim wok king long heven olsem King em Jehova i bin makim.—Daniel 7:13, 14.
3. Na tu, Jehova i bin makim sampela gutpela man na meri bilong graun long go long heven. Ol bai wok wantaim Jisas long bosim graun, na ol bai stap king, na jas, na pris. (Luk 22:28-30; KTH 5:9, 10) Jisas i bin kolim ol dispela wanwok bilong em long Kingdom olsem “liklik lain sipsip.” Ol inap 144,000.—Luk 12:32; KTH 14:1-3.
4. Taim Jisas i kamap King, wantu em i rausim Satan na ol ensel nogut bilong em long heven i kam daun long graun. Olsem na kirap long 1914 ol samting long graun i go nogut tru. (KTH 12:9, 12) Ol bikpela pait, hangre, sik, pasin nogut i go bikpela—ol dispela samting i hap bilong wanpela “mak” i kamapim klia olsem Jisas i wok i stap olsem King na yumi stap long taim bilong las de.—Matyu 24:3, 7, 8, 12; Luk 21:10, 11; 2 Timoti 3:1-5.
5. Klostu nau Jisas bai skelim ol manmeri; em bai putim ol long tupela lain olsem wasman bilong sipsip i putim ol sipsip long narapela hap na ol meme long narapela hap. Ol “sipsip” em ol man i bin stap gut long em. Ol bai kisim laip oltaim long graun. Ol “meme” em ol man i bin sakim Kingdom Bilong God. (Matyu 25:31-34, 46) Klostu nau Jisas bai bagarapim ol man i olsem meme. (2 Tesalonaika 1:6-9) Sapos yu laik kamap wanpela “sipsip” bilong Jisas, yu mas harim tok bilong Kingdom na bihainim ol samting yu kisim save long en.—Matyu 24:14.
6. Long nau i gat planti kantri long graun. Olgeta wan wan kantri i gat gavman bilong ol yet. Planti taim ol dispela kantri i pait wantaim. Tasol Kingdom Bilong God bai senisim ol gavman bilong ol man. Dispela wanpela gavman bai bosim olgeta hap bilong graun. (Daniel 2:44) Long dispela taim bai i no gat moa pait, pasin raskol, na pasin bilong bagarapim man. Olgeta manmeri bai stap bel isi na wanbel.—Maika 4:3, 4.
7. Long Taim Bilong Wan Tausen Yia Bilong Jisas i Stap King, ol man i bin stap gut long God bai ol i kamap gutpela olgeta, na olgeta hap bilong graun bai kamap wanpela paradais. Long pinis bilong wan tausen yia, Jisas bai pinisim olgeta wok God i bin givim long em. Nau em bai givim Kingdom i go bek long Papa bilong em. (1 Korin 15:24) Olsem wanem? Yu laik tokim ol pren na wanblut bilong yu long ol samting Kingdom bai mekim?
[Piksa long pes 13]
Taim Jisas i bosim graun bai i no gat moa pasin birua o bel nogut