Kisim Skul Long Tok Bilong God

Dispela atikol i kamapim sampela askim em ating yu laik save long en, na i soim yu wanem hap bilong Baibel yu inap ritim bilong painim bekim. Ol Witnes Bilong Jehova bai amamas long toktok wantaim yu long ol dispela bekim.

1. Kingdom Bilong God em wanem samting?

Kingdom Bilong God em wanpela gavman bilong heven. Em bai senisim olgeta arapela gavman na kamapim laik bilong God long heven na graun. Olsem na Kingdom Bilong God em dispela gutpela gavman yumi gat laik long en.​—⁠Ritim Daniel 2:44; Matyu 6:​9, 10.

Wanpela kingdom i mas i gat wanpela king bilong en. Jehova i makim Pikinini bilong em, Jisas, long kamap King long Kingdom bilong Em.​—⁠Ritim Luk 1:​30-33.

2. Bilong wanem Jisas i gutpela King?

Pikinini Bilong God em i gutpela King, long wanem, em i save mekim gutpela pasin, em i strong long mekim stretpela pasin, na em i gat bikpela strong inap long helpim ol manmeri. (Matyu 11:​28-30) Bihain long kirap bek, Jisas i go antap long heven na em i wet long han sut bilong God. (Hibru 10:​12, 13) Orait nau God i givim strong long em bilong kirap mekim wok king long heven.​—⁠Ritim Daniel 7:​13, 14.

3. Husat bai mekim wok king wantaim Jisas?

God i bin makim wanpela lain manmeri bilong wok king wantaim Jisas long heven, na Baibel i kolim ol olsem “ol manmeri bilong God.” (Daniel 7:27) Namba wan lain i insait long en em ol gutpela aposel bilong Jisas. I kam inap nau, Jehova i makim yet ol man na meri i stap gut long em long insait long dispela lain. Olsem Jisas, ol i kirap bek long bodi bilong heven.​—⁠Ritim Jon 14:​1-3; 1 Korin 15:​42-45.

Hamas manmeri bai go long heven? Jisas i kolim ol olsem “liklik lain sipsip.” (Luk 12:32) Namba bilong ol em 144,000, na ol bai wok king wantaim Jisas na bosim ol manmeri bilong graun.​—⁠Ritim Revelesen 5:​9, 10; 14:⁠1.

4. Kingdom Bilong God i kirap mekim wok long wanem taim?

Jisas i kamap King long 1914.a Bihain liklik, em i tromoi Satan wantaim ol ensel nogut i kam daun long graun. (Revelesen 12:​7-10, 12) Kirap long dispela taim ol hevi i go bikpela tru. Ol woa, bikpela guria, bikpela hangre, bikpela sik, na pasin bilong brukim lo, em ol hap bilong sain bilong pinis bilong pasin nogut bilong dispela graun. (2 Timoti 3:​1-5) Olgeta man i laik kisim ol gutpela blesing aninit long Kingdom Bilong God, ol i mas kisim save long olsem wanem ol inap kamap disaipel bilong King, em Jisas.​—⁠Ritim Luk 21:​7, 10, 11, 31, 34, 35.

5. Kingdom Bilong God i mekim wanem wok?

Long rot bilong wok autim tok long olgeta hap, Kingdom Bilong God i helpim planti milion manmeri bilong olgeta kantri long kisim save long ol pasin bilong God. (Matyu 24:14) Taim dispela Kingdom i pinisim pasin nogut bilong dispela graun, em bai lukautim “bikpela lain manmeri” husat i stap aninit long Jisas.​—⁠Ritim Revelesen 7:​9, 10, 13-17.

Insait long 1,000 yia, isi isi Kingdom Bilong God bai kamapim Paradais long graun. Bihain, Jisas bai givim Kingdom i go bek long Papa bilong em. (1 Korin 15:​24-26) Yu save long wanpela em yu laik tokim em long Kingdom Bilong God?​—⁠Ritim Song 37:​10, 11, 29.

Bilong kisim sampela save moa, lukim sapta 8 na 9 bilong dispela buk em ol Witnes Bilong Jehova i wokim. Tru Tru Baibel i Tok Wanem?

[Futnot]