Jisas i Skulim Ol Man Long Kingdom Bilong God

“Jisas i raun long ol taun na ol ples na em i wok long autim gutnius bilong kingdom bilong God.”​​—LUK 8:1.

YUMI save amamas long toktok long ol samting em yumi tingim olsem ol i bikpela samting, em ol samting yumi laikim tumas. Olsem Jisas yet i bin tok, ‘man i save autim tingting i pulap long bel bilong en.’ (Matyu 12:34) Taim yumi skelim ol samting em Jisas i autim tok long en, yumi luksave olsem Kingdom Bilong God i bikpela samting long em.

Kingdom Bilong God em wanem samting? Kingdom em gavman we king i bosim. Olsem na Kingdom Bilong God em wanpela gavman em God yet i bin kamapim. Planti taim Jisas i stori long Kingdom Bilong God, na dispela i olsem bikpela tok em i autim. Insait long ol fopela Gutnius, dispela tok Kingdom i stap olsem 110 taim. Jisas i yusim ol tok long skulim ol man, na ol samting em i mekim dispela tu i skulim gut ol man long Kingdom Bilong God na ol wok em Kingdom bai mekim.

Husat em i King? Ol man bilong graun i no votim dispela Man husat i stap King long Kingdom Bilong God. Nogat. God yet i makim dispela man long kamap King. Long wok tisa bilong em, Jisas i tokaut olsem God i bin makim em long kamap King.

Jisas i save olsem Baibel i tok profet long Mesaia bai bosim wanpela Kingdom bilong i stap oltaim oltaim. (2 Samuel 7:​12-​14; Daniel 7:​13, 14; Matyu 26:​63, 64) Tingim, Jisas yet i bin tokaut olsem em i dispela Mesaia em God i bin tok promis long salim i kam. Long dispela rot, Jisas i tokaut olsem em i dispela King em God yet i bin makim. (Jon 4:​25, 26) Olsem na sampela taim, i stret Jisas i yusim dispela hap tok olsem “kingdom bilong mi.”​​—Jon 18:36.

Jisas i skulim tu ol man olsem bai i gat sampela arapela man tu i wok king wantaim em long Kingdom. (Luk 22:​28-​30) Em i kolim ol dispela wanwok olsem “liklik lain sipsip,” long wanem, ol i liklik lain tasol. Em i tok long ol: “Papa bilong yupela em i tok pinis long em bai i stap king bilong yupela na givim kingdom bilong en long yupela.” (Luk 12:32) Laspela buk bilong Baibel i soim olsem 144,000 manmeri bai mekim wok king wantaim Krais.​​—KTH 5:​9, 10; 14:1.

Kingdom i stap we? Jisas i tokim bikman bilong Rom, em Pontius Pailat: “Kingdom bilong mi em i no bilong dispela graun.” (Jon 18:36) Kingdom Bilong God em Krais i stap king bilong en, em i no inap mekim wok bos long rot bilong ol lain bilong graun. Nogat. Planti taim Jisas i kolim Kingdom Bilong God olsem “kingdom bilong heven.”a (Matyu 4:​17; 5:​3, 10, 19, 20) Olsem na Kingdom Bilong God em i wanpela gavman bilong heven.

Jisas i save olsem em bai stap sotpela taim long graun na i go bek long heven. Em i tok, long heven em bai “redim ples.” Dispela bai opim rot long ol wanwok bilong em i go stap wantaim em.​​—Jon 14:​2, 3.

Kingdom i mekim wanem wok? Jisas i skulim ol manmeri long beten long God olsem: “Kingdom bilong yu i mas i kam. Mipela i mas bihainim laik bilong yu long graun olsem ol i save bihainim long heven.” (Matyu 6:​9, 10) Ol i wok long bihainim laik bilong God long heven. Kingdom em rot bilong God long kamapim samting em i tingting pinis long mekim long graun. Bilong mekim olsem, Kingdom bai kamapim ol bikpela senis long graun.

Kingdom bai mekim wanem wok long graun? Jisas i tok Kingdom Bilong God bai pinisim olgeta pasin nogut long rot bilong rausim ol man husat i tingting strong long mekim pasin nogut. (Matyu 25:​31-​34, 46) Dispela i makim olsem olgeta kain pasin korapsen na pasin nogut bai pinis olgeta. Jisas i tok, graun bai pulap long ol manmeri i “daunim nem bilong ol yet,” na “bihainim stretpela pasin,” na “marimari long ol arapela,” na “bel bilong ol i klin,” na ol i save “mekim dai ol kros na pait.”​​—Matyu 5:​5-9.

Yu ting ol kain gutpela man olsem i mas stap long graun we ol pipia na marasin nogut i bagarapim win na graun? Nogat tru! Jisas i tok promis olsem ol gutpela senis bai kamap long graun taim Kingdom Bilong God i mekim wok bos. Wanpela man husat i hangamap long pos i stap klostu long Jisas, em i tok: “Jisas, taim yu kamap king, yu ken tingting long mi.” Jisas i bekim tok olsem: “Mi tok tru long yu tude, Yu bai stap wantaim mi long Paradais.” (Luk 23:​42, 43; NW) Yes, Kingdom Bilong God bai mekim dispela graun i kamap wanpela ples paradais​​—wankain long dispela Paradais long gaden Iden.

Kingdom bai mekim wanem samting moa bilong helpim ol man? Jisas i tok promis long ol samting em Kingdom Bilong God bai kamapim. Na tu, em i soim ol samting em Kingdom bai mekim. Jisas i bin mekim planti mirakel bilong oraitim ol man, na long dispela rot em i soim piksa tasol bilong ol bikpela wok moa bai kamap taim em i mekim wok bos insait long Kingdom. Gutnius Matyu i raitim i tok long Jisas olsem: “[Em] i go raun long olgeta hap bilong distrik Galili. Em i save go insait long ol haus lotu bilong ol na skulim ol manmeri. Em i autim gutnius bilong kingdom bilong God, na em i mekim orait olgeta sik na olgeta samting i bagarapim bodi bilong ol manmeri.”​​—Matyu 4:​23.

Jisas i bin oraitim ol man i gat kain kain hevi long bodi. Em i “opim ai” bilong wanpela man husat i stap aipas long taim mama i karim em. (Jon 9:​1-7, 32, 33) Em i bin putim han i go isi tasol na tatsim wanpela man husat i gat sik lepra na oraitim em. (Mak 1:​40-​42) Wanpela taim “ol i bringim wanpela man i kam long em, yau bilong en i pas na tang bilong en i hevi, na em i no inap toktok gut,” na Jisas i kamapim klia olsem em inap “mekim ol yaupas i harim tok, na ol mauspas i toktok.”​​—Mak 7:​31-​37.

Dispela King em God i makim, strong bilong em i winim tu strong bilong dai. Baibel i stori long 3-pela taim Jisas i givim bek laip long ol lain i dai pinis. Wanpela wido i gat wanpela pikinini man tasol na Jisas i kirapim bek dispela pikinini, na wanpela pikinini meri husat i gat 12 krismas, na gutpela pren bilong em Lasarus.​​—Luk 7:​11-​15; 8:​41-​55; Jon 11:​38-​44.

Jisas i stori long gutpela taim tru bai painim ol manmeri i stap aninit long wok bos bilong Kingdom Bilong God, na long rot bilong aposel Jon em i tok profet olsem: “Harim. Nau haus bilong God i stap wantaim ol manmeri. Em bai i stap namel long ol, na ol bai i stap ol lain manmeri bilong em. Yes, God yet bai i stap wantaim ol, na em bai i stap God bilong ol. Em bai i mekim drai wara i stap long ai bilong olgeta bilong ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta.” (KTH 1:1; 21:​3, 4) Man! Piksaim long tingting olsem wanpela taim bai i kamap na bai i no gat aiwara bilong bel sore, na no gat pen na dai! Long dispela taim, bai yumi lukim bikpela truim bilong beten yumi save mekim long laik bilong God i mas kamap long graun olsem i kamap long heven.

Kingdom Bilong God bai kam long wanem taim? Jisas i tok taim em i kirap long mekim wok king, dispela bai makim olsem em i “kam bek.” Jisas i mekim tok profet bilong soim wanem taim em bai kirap long mekim wok king. Long dispela taim, hevi bai kamap long olgeta hap bilong graun na bai i gat ol bikpela pait, guria, bikpela sik, na ol man bai sot long kaikai, na planti man moa bai brukim lo. (Matyu 24:​3, 7-​12; Luk 21:​10, 11) Ol dispela samting na planti narapela samting em Jisas i tok profet long en, ol i stat long kamap kirap long yia 1914​—Wol Woa 1 i bin kamap long dispela yia. Olsem na Jisas i mekim wok nau olsem King. Klostu nau bai Kingdom Bilong God i kam na kamapim laik bilong God long graun.b

Taim Kingdom Bilong God i kam, dispela bai mekim wanem long yu yet? Dispela em samting i stap long han bilong yu yet; bai yu mekim wanem taim yu harim tok bilong Jisas?

[Ol Futnot]