Yu Ken Ting Olsem Wanem Long Kingdom?

KRAIS JISAS i lainim ol disaipel bilong em long beten olsem: “Kingdom bilong yu i mas i kam.” (Matyu 6:10) Ol man i tok ol i disaipel bilong Jisas, planti taim ol i bin beten long God olsem!

Jisas i lainim ol disaipel bilong em long beten long Kingdom bilong God i ken i kam, na tu, taim em i autim tok em i mekim bikpela toktok long Kingdom. Olsem na wanpela bikpela buk (Encyclopædia Britannica) i tok, planti man i ting Kingdom bilong God i olsem “as tok bilong ol tok Jisas i autim.”

Taim ol disaipel bilong Krais long nau i beten long Kingdom i ken i kam, ol i laik bai wanem samting tru i kamap? Ol i ken ting olsem wanem long Kingdom, na yu tu yu ken ting olsem wanem long Kingdom? Jisas i gat wanem kain tingting long Kingdom?

Tingting Bilong Jisas Long Kingdom

Planti taim Jisas i kolim em yet olsem “Pikinini Bilong Man.” (Matyu 10:23; 11:19; 16:28; 20:​18, 28) Dispela i kirapim yumi long tingim tok bilong profet Daniel, em i tok long ‘wanpela pikinini bilong man.’ Daniel i lukim driman i makim samting i mas kamap long heven long bihain. Em i stori olsem: “Mi lukim wanpela [pikinini bilong man]. Em i stap namel long ol klaut na i wokabaut i kam klostu long mi. Na ol i kisim em i go long dispela Man bilong bipo bipo yet. Dispela Man bilong bipo bipo yet i mekim em i kamap king na i givim em strong na biknem. Na em bai i stap king i gat strong oltaim oltaim, na wok king bilong en bai i no inap pinis. Na olgeta manmeri bilong olgeta kantri na olgeta lain na olgeta tok ples bai i stap aninit long en.”​—⁠Daniel 7:​13, 14, lukim tu liklik tok bilong ol dispela ves daunbilo long pes long Baibel.

Jisas i tokim ol aposel bilong em long taim em bai kisim dispela wok king, na em i tok: “Taim . . . Pikinini Bilong Man bai i gat biknem na i sindaun long sia king bilong en, long dispela taim yupela ol man i bin bihainim mi yupela tu bai i sindaun long 12-pela gutpela sia [king].” Na Jisas i tok moa olsem: “Taim Pikinini Bilong Man i kam bek olsem king . . . olgeta lain manmeri bai ol i kam bung long pes bilong em. Na em bai i tilim ol na putim ol long tupela lain, olsem wasman i save tilim ol sipsip i go long hap na ol meme i go long hap. . . . Ol dispela lain [i mekim pasin i no stret] bai i go bilong kisim pe nogut. . . . Tasol ol stretpela manmeri bai i kisim laip i stap oltaim oltaim.”​—⁠Matyu 19:28; 25:​31, 32, 46.

Ol dispela tok profet long ol sia king na olgeta lain manmeri, dispela i makim olsem Kingdom em i wanpela gavman, na Jisas wantaim sampela disaipel bilong em bai mekim wok king long en na bosim olgeta manmeri i stap long graun. Dispela gavman bai i gat strong long givim pe nogut long olgeta man i mekim pasin i no stret​—⁠bai ol i dai. Tasol taim Kingdom i bosim graun, ol man i laikim tumas stretpela pasin ol bai kisim laip i stap oltaim, em presen God i givim long ol.

Ol dispela samting i kamapim klia olsem, Kingdom bilong God em i wanpela gavman bilong heven em God yet i bin kamapim. Olsem na Kingdom em i no makim misin, na i no gat wanpela tok long Baibel i makim olsem Kingdom em i samting bilong graun. Na tu, gavman God yet i bin kamapim i no wanpela samting i stap long bel bilong man. Nogat. Tru tumas, Kingdom bilong God em i wanpela gavman, olsem na taim yumi kamap Kristen, i no olsem nau Kingdom i stap long bel bilong yumi. Nogat. Orait, bilong wanem sampela man i ting Kingdom em i samting bilong bel?

Yu Ting Kingdom i Stap Insait Long Yumi?

Sampela man i ting Kingdom i stap long bel bilong yumi, long wanem, sampela Baibel i tanim tok bilong Jisas long Luk 17:​21 olsem: “Kingdom bilong God em i stap insait long yupela.” Lukim liklik tok i stap daunbilo long pes long Baibel Pisin.

Wanpela buk (The Interpreter’s Dictionary of the Bible) i stori long dispela samting na i tok: ‘Ves 20 i soim yumi, Jisas i toktok long ol Farisi. Sampela man i ting kingdom bilong God em i samting bilong bel o i olsem long bel man i pilim olsem God i kisim em bek pinis, tasol dispela tingting i pait long ol tok i stap klostu, na em i pait long olgeta tok bilong Nupela Testamen i stori long kingdom.’

Long Baibel Pisin ol i tanim tok bilong Luk 17:21 olsem: “Kingdom bilong God em i stap pinis namel long yupela.” Ol Farisi i man bilong bikhet, na dispela tok Jisas i mekim long ol i no makim olsem Kingdom i stap insait long bel bilong ol. Nogat. Inap longtaim pinis ol i bin wetim wanpela man God i makim em bilong kisim bek ol na bilong kamap king na Jisas em i dispela man. Em bai kamap King bilong Kingdom na em i stap namel long ol, olsem na em inap tok, Kingdom i stap pinis namel long ol. Tasol bikpela hap taim i mas lus pastaim, na bihain bai Kingdom bilong God i kamap.

Kingdom i Mas Kamap Long Wanem Taim?

God i makim sampela disaipel bilong Krais Jisas bilong mekim wok king wantaim em long Kingdom bilong heven. Olsem Jisas, ol tu ol i mas stap gut long God inap long taim ol i dai, na ol i kirap bek olsem spirit na kisim laip long heven. (1 Pita 3:18) Ol i no bikpela lain, nogat; Jisas i baim bek 144,000 namel long olgeta manmeri bilong graun bilong mekim wok king na wok pris. (Kamapim Tok Hait 14:​1-4; 20:⁠6) Ol gutpela aposel bilong Jisas ol tu ol i insait long dispela lain bilong mekim wok king wantaim em.​—⁠Luk 12:⁠32.

Wanpela taim Jisas i mekim tok promis long ol disaipel bilong em olsem: “Sampela man i sanap hia bai ol i no i dai yet, na bai ol i lukim Pikinini Bilong Man i kam olsem king.” (Matyu 16:28) Tok i kamap bihain stret long dispela tok, olsem long Matyu 17:​1, i kamapim klia olsem inap 6-pela de bihain, truim bilong dispela tok promis i bin kamap olsem: Jisas i kisim 3-pela disaipel bilong em i go antap long wanpela maunten na ol i lukim bodi bilong em i senis na i kamap narapela kain. Ol samting ol i lukim long dispela taim i olsem piksa bilong bikpela namba Jisas bai holim long Kingdom. (Matyu 17:​1-9) Tasol Kingdom i no bin kamap long taim bilong ol. Nogat. Orait, Kingdom i mas kamap long wanem taim?

Jisas i mekim wanpela tok piksa i makim olsem em i no ken kisim kwik wok king. Luk 19:​11-15 i tok: “Em i givim wanpela tok piksa tu long ol, long wanem, em i kamap klostu pinis long Jerusalem, na ol i ting nau tasol kingdom bilong God bai i kamap ples klia. Em i tok olsem, ‘Wanpela bikman i laik i go long wanpela longwe ples, bai ol i ken makim em i kamap king. Na bihain bai em i kam bek long as ples na bosim ol lain bilong en. Taim em i laik i go, em i singautim 10-pela wokboi bilong en, na em i tilim 20 kina 20 kina long ol. Na em i tokim ol olsem, “Yupela kisim dispela mani na wok bisnis long en, inap long taim mi kam bek.” . . . Ol i makim em i kamap king, na bihain em i kam bek. Em i kam bek pinis, orait em i tok olsem, “Singautim ol dispela wokboi bipo mi bin givim mani long ol. Mi laik save hamas winmani olgeta wan wan man i bin kisim.” ’ ”

Long taim bilong Jisas, bikpela hap taim i mas lus na bai wanpela bikman inap kamap king​—⁠em i mas lusim Israel na i go long Rom, na wet long Rom inap long ol i makim em i kamap king, na bihain em i kam bek gen long ples olsem king. Jisas em i dispela “bikman.” Papa bilong em long heven bai givim namba long em long mekim wok olsem King bilong Kingdom, tasol em i no ken kisim kwik dispela wok. Nogat. Ol disaipel bilong em i mas mekim wok long mani em i givim long ol, olsem ol i mas autim tok bilong Kingdom, na ol i mas mekim inap longtaim liklik, na bihain bai em i kam bek olsem King.

Kingdom i Kam Olsem Wanem?

Ol man i laikim tumas God, taim ol i beten long Kingdom i mas i kam, ol i laik bai wanem samting tru i ken kamap? Ol i laik bai Kingdom bilong heven i kirap mekim wok bilong en long bagarapim ol gavman bilong graun, em ol i no bin truim promis bilong ol long kamapim gutaim tru. Daniel i tok profet long dispela samting olsem: “Taim ol dispela king i stap yet God bai i kirapim wanpela kingdom na dispela kingdom bai i stap oltaim oltaim. Ol arapela king i no inap daunim kingdom bilong God, tasol em bai i daunim ol na bagarapim ol arapela king na kingdom bilong en bai i stap oltaim.” (Daniel 2:44) Dispela samting bai kamap long wanem taim?

Jisas i tok profet olsem dispela samting bai kamap long taim bilong wanpela lain man i lukim ol bikpela hevi tru i kamap long graun. Bilong ol man i ken save Jisas i “kam bek” pinis olsem king, em i kolim planti samting bai kamap i olsem “mak” bilong dispela​—⁠olsem ol bikpela bikpela pait, na guria, na hangre, na sik bai kamap, na ol man bai autim tok bilong Kingdom bilong God long olgeta hap.​—⁠Matyu, sapta 24, 25; Mak, sapta 13; Luk, sapta 21.

Sampela samting Jisas i kolim i kamap nau long taim bilong yumi na yumi lukim. Olsem na i no longtaim na bai Kingdom bilong God i kamapim planti gutpela blesing long ol manmeri. Yu tu yu inap kisim ol dispela gutpela samting taim Kingdom i bosim graun. Orait, yu wantaim famili bilong yu i ken ting olsem wanem long Kingdom bilong God?

Ol Blesing Bilong Kingdom

Ol man long olgeta hap long graun bai stap amamas. “Nupela skai”​—⁠em Kingdom bilong heven​—⁠bai kamapim “nupela graun,”​—⁠em ol manmeri i stap aninit long Kingdom hia long graun. Aposel Jon i tok: “God yet bai i stap wantaim ol. . . . Em bai i mekim drai wara i stap long ai bilong olgeta.” Bai i no gat wanpela samting i mekim na man i no inap stap amamas, long wanem, “ol bai i no bel hevi moa na krai moa, na ol bai i no inap kisim pen gen.”​—⁠Kamapim Tok Hait 21:​1-4.

Ol man i no ken i dai moa. Bai yumi no bel hevi moa, long wanem, i dai i no ken painim moa ol manmeri yumi laikim tumas ol. Baibel i tok: “[Krais] i pinisim pinis olgeta arapela birua, orait em bai i pinisim dai tu.” (1 Korin 15:26) Bai i no gat wok moa long planim man i dai pinis. Ol man i dai pinis na God i tingim ol, bai ol i kirap bek!​—⁠Jon 5:​28, 29.

Skin bilong man bai kamap gutpela na i no gat sik. Bai ol haus sik i no gat wok moa. Bai ol man i no gat sik moa long skin o long tingting. Krais Jisas, em Man i save tru long pinisim olgeta kain sik, em bai mekim wok long ofa bilong em na “mekim orait ol manmeri bilong olgeta lain man.” (Kamapim Tok Hait 22:​1, 2; Matyu 20:28; 1 Jon 2:​1, 2) Taim Jisas i stap long graun, em i bin mekim orait ol sikman, na dispela i makim ol samting em bai mekim long rot bilong Kingdom.​—⁠Lukim Aisaia 33:24; Matyu 14:14.

Kaikai bai kamap planti. Olsem wanpela man bilong raitim song i tok, “planti rais na wit samting i ken kamap long ol gaden bilong ol manmeri.” (Buk Song 72:16) Na Aisaia i mekim tok profet olsem: “Bikpela I Gat Olgeta Strong bai i redim bikpela kaikai tru. Bai i gat planti gutpela gutpela abus na nambawan wain tru bilong dring. Na ol manmeri bilong olgeta kantri bai i kam bung long dispela kaikai.” (Aisaia 25:⁠6) Olsem na taim Kingdom i bosim graun, ol man i no ken hangre moa.

Olgeta hap bilong graun bai kamap paradais. Olsem na tok promis Jisas i mekim long wanpela man nogut i tanim bel bai kamap tru, em olsem: “Bai yu stap wantaim mi long [Paradais].” (Luk 23:43) Yu tu yu inap kisim laip oltaim long dispela graun, em olgeta hap bai kamap gutpela ples tru na i no gat pasin nogut i stap long en.​—⁠Jon 17:⁠3.

Olgeta man i bihainim tok bilong God ol inap kisim ol dispela gutpela samting. Baibel, em Tok bilong Jehova, i bin tok promis olsem. Em nau, yu ken save, Kingdom bilong God bai mekim olgeta dispela gutpela samting em inap helpim yu.

[Piksa long pes 7]

Yu bilipim ol tok Jisas i mekim long Kingdom bilong God?