Yu Ting Kingdom Bilong God Em Samting Bilong Bel?

“Kingdom Bilong God i save kamap taim man i bilip.” Em tok Pop Benedict Namba 16 i raitim long buk Jesus of Nazareth. Long tingting bilong sampela man, Kingdom Bilong God em senis i kamap long bel bilong man taim em i kisim Jisas Krais long laip bilong em na i bilip. Yu ting Kingdom Bilong God i makim tasol senis em man i mekim, olsem kingdom ‘i stap insait long bel tasol’?

LONG tingting bilong Jisas, Kingdom em i bikpela samting tru. Pop Benedict i tok Kingdom em i “nambawan samting Jisas i autim tok long en.” Jisas i bin stap sotpela taim tasol long graun, tasol planti taim em i bin raun long olgeta hap na “autim gutnius bilong Kingdom.” (Matyu 4:23) Long rot bilong wok tisa bilong Jisas na ol mirakel em i wokim, em i kamapim klia olsem Kingdom i no makim tasol olsem man i kisim God long laip bilong em na bihainim tok bilong em, nogat. Dispela Kingdom i gat wok bos, wok jas, na ol blesing bilong i stap oltaim oltaim.

Wok King na Wok Jas

Klostu long taim Jisas i pinisim wok bilong em long graun, mama bilong tupela disaipel bilong em, Jems na Jon, em i kam long Jisas na i tok: “Yu mas tok olsem tupela pikinini man bilong mi i ken sindaun klostu long yu long Kingdom bilong yu, wanpela long han sut bilong yu na narapela long han kais bilong yu.” (Matyu 20:21) Em i no toktok long samting i stap insait long bel bilong ol pikinini bilong em, nogat. Em i save olsem Jisas bai mekim wok king long dispela Kingdom na em i laik bai tupela pikinini bilong em tu i mekim wok king wantaim Jisas. Tru tumas, Jisas i bin promisim 11-pela gutpela aposel olsem ol bai stap long Kingdom bilong em na “sindaun long ol sia king” na mekim wok “jas” wantaim em. (Luk 22:30) Olsem na ol disaipel bilong Jisas i save olsem Kingdom bilong em bai mekim wok olsem wanpela edministresen, o gavman.

Olsem wanem long ol manmeri long taim bilong Jisas? Ol i ting Kingdom i makim tasol olsem man i senisim pasin bilong em, o ol i bin i gat narapela tingting? Orait paslain liklik long Pasova bilong yia 33 C.E. taim Jisas i sindaun long wanpela donki na i go insait long Jerusalem, ol manmeri i amamas long em na sampela i singaut na i tok: “Plis seivim dispela Pikinini bilong Devit!” (Matyu 21:⁠9) Bilong wanem ol i singaut olsem? Ating ol i luksave olsem Jisas em dispela Mesaia em God i bin tok promis long en na God bai givim em wanpela Kingdom bilong i stap oltaim oltaim, em “sia king bilong papa bilong en Devit.” Ol i laik tru long lukim ol samting em Kingdom bai kamapim, olsem bel isi, stretpela pasin, na God i kisim bek ol.​—⁠Luk 1:32; Sekaraia 9:⁠9.

Ol Blesing Bilong Oltaim Oltaim

Maski sampela manmeri i no amamas long wok bilong Jisas, ol i save long wanpela samting em i skulim ol manmeri long en. Long taim ol i nilim Jisas long diwai pos, wanpela stilman em ol i nilim em klostu long Jisas, em i tok: “Jisas, tingim mi taim yu kamap King.” Orait Jisas i tok wanem long em? Em i tokim dispela man olsem: “Yu bai stap wantaim mi long Paradais.”​—⁠Luk 23:​42, 43.

Dispela stilman i bilip olsem taim Jisas i kirap bek long dai, em bai kisim wanpela Kingdom. Jisas bai i gat strong na laik tru long kirapim bek dispela stilman na stretim pasin bilong em, na Jisas bai mekim olsem tu long planti milion narapela manmeri. Yes, taim Jisas i kamap King long heven, long rot bilong Kingdom em bai kamapim ol blesing bilong i stap oltaim oltaim long ol manmeri long olgeta hap bilong graun.​—⁠Jon 5:​28, 29.

Kingdom i Stap Namel Long Ol

Jisas i tok: “Kingdom bilong God i stap namel long yupela.” Dispela tok bilong Jisas i stap long Luk 17:21. Sampela Baibel i tok “kingdom bilong God em i stap insait long yupela,” na sampela narapela i tok, “i stap pinis namel long yupela.” (Lukim King Jems Nupela Testamen na BB.) Dispela tok bilong Jisas i makim wanem samting?

Ol tok i stap paslain na bihain long dispela ves i soim olsem Jisas i mekim dispela tok long wanpela lain bilong lotu Juda em ol i save birua long em, em ol Farisi. Ol i gat tingting bilong ol yet long samting em Mesaia na Kingdom bilong em bai mekim. Long tingting bilong ol, Mesaia bai “i stap namel long ol klaut” na i kam olsem King i gat biknem, na kisim bek ol Juda long han bilong ol Rom na kamapim bek kingdom bilong Israel. (Daniel 7:​13, 14) Tasol Jisas i stretim tingting kranki bilong ol na i tokim ol olsem: “Kingdom bilong God bai i no kam long pasin we olgeta man bai luksave long en.” Na em i tok moa olsem: “Harim! Kingdom bilong God i stap namel long yupela.”​—⁠Luk 17:​20, 21.

Taim Jisas i skulim ol man na em i wokim ol mirakel bilong soim klia olsem em i dispela man God i bin tok promis long em bai stap King bilong dispela Kingdom, ol Farisi em ol i no bilip na i no gat gutpela bel, ol i birua nogut tru long em. Ol i no bilip olsem Jisas em i Mesaia. Olsem na Jisas i tokaut klia long ol olsem: Dispela man husat bai stap King bilong Kingdom, em i “stap namel long [ol].” Em i no tokim ol long lukluk i go insait long ol yet.a Jisas na ol disaipel bilong em i sanap long ai bilong ol. Jisas i tok: “Kingdom bilong God i stap hia wantaim yupela.”​—⁠Luk 17:​21, Baibel Contemporary English Version.

Kingdom​—⁠Bikpela Samting Long Yu

Kingdom Bilong God em i no wanpela samting i stap insait long bel bilong ol sinman, tasol em i mas i stap bikpela samting tru long tingting bilong yumi. Long rot bilong wok tisa bilong Jisas na ol strongpela wok em i mekim, em i kirapim ol manmeri long bilip tru long wanpela stretpela gavman em bai kamapim gutaim na bel isi tru. Em i laik bai ol i kisim bilip i helpim sindaun bilong ol. Em i skulim ol long beten olsem: “Papa bilong mipela long heven, nem bilong yu i mas i stap holi. Kingdom bilong yu i mas i kam. Laik bilong yu i mas kamap long graun olsem em i save kamap long heven.” (Matyu 6:​9, 10) Planti manmeri husat i bin putim yau long ol tok bilong Jisas ol i pilim tru dispela tok na ol i bilip, na dispela i kirapim ol long bihainim Jisas bambai ol i ken kisim ol blesing long Kingdom Bilong God.

Olsem wanem? Yu laik bai yu gat kain bilip olsem? Sapos olsem, orait yu mas mekim wanem bilong kisim dispela kain bilip? Tingim ol tok Jisas i mekim bilong kirapim Bikpela Tok Long Maunten, em i tok: “Ol man i hangre long kisim save long God, ol i ken amamas, long wanem, Kingdom bilong heven em i bilong ol.” (Matyu 5:⁠3) Em i gutpela sapos yu orait long stadi long Baibel wantaim ol Witnes Bilong Jehova em ol i bin bringim dispela nius long yu. Taim yu mekim olsem, dispela bai helpim yu long senisim pasin bilong yu, na moa yet yu inap bilip na wetim dispela Kingdom em bai kamapim bel isi na gutpela sindaun long olgeta hap.

[Futnot]

[Rait long pes 11]

Yu ting Kingdom Bilong God i stap insait long bel bilong ol man em ol i birua nogut tru long Jisas na ol i laik kilim em i dai?