Tok Bilong God i Gat Laip
Laip Oltaim—Bai Ol i Kisim We?
JISAS i tokim ol disaipel bilong em: “Long haus bilong Papa bilong mi i gat planti rum. . . . Mi go bilong redim ples bilong yupela. Na sapos mi go redim ples bilong yupela, bai mi kam bek na mi kisim yupela i go i stap wantaim mi. ”—Jon 14:2, 3.
Heven em i ples bilong Jisas. Em i stap long heven na God i bin salim em i kam daun long graun. Nau Jisas i tokim ol aposel, em bai kisim ol i go i stap wantaim em long heven. Tasol Jisas wantaim ol disaipel bilong em bai mekim wanem wok long heven?
Yumi save God i bin makim Jisas bilong kamap King long Kingdom bilong Em. Tasol i gat sampela man moa ol bai mekim wok king wantaim Krais long dispela kingdom o gavman bilong God long heven. Jisas i tokim ol aposel bilong em: “Papa bilong mi em i givim kingdom long mi, olsem tasol mi givim kingdom long yupela.” (Luk 22:29) Pol na Timoti ol i bilong dispela lain ol bai mekim wok king wantaim Krais. Olsem na Pol i raitim pas long Timoti na em i tok: “Sapos yumi stap strong long karim olgeta hevi, orait bai yumi stap king tu wantaim em.”—2 Timoti 2:12.
Tasol husat bai stap long graun aninit long Kingdom bilong God? Dispela man i givim baptais long Jisas, em kandere bilong em, em Jon Bilong Baptais. Jisas i stori long Jon na em i tok: “Jon Bilong Baptais em i winim olgeta man i bin kamap long graun.” Jon em i redim rot bilong Krais, na em i bungim ol dispela man em bihain bai ol i kamap disaipel bilong Jisas, na long dispela rot Jon i winim olgeta narapela man i kamap long graun. Tasol Jisas i tok: “Man i liklik long kingdom bilong heven, em i winim Jon.” (Matyu 11:11) Olsem na Jon em i no insait long dispela lain bilong mekim wok king wantaim Krais long heven. Em i insait long dispela lain ol bai stap long graun aninit long Kingdom.
Baibel i tok “liklik lain,” olsem sampela manmeri tasol, ol bai go long heven na mekim wok king wantaim Krais Jisas. Baibel i tok dispela lain em inap olsem 144,000. Ol narapela gutpela manmeri ol bai stap long graun na ol dispela king bai bosim ol.—Luk 12:32; Revelesen 14:1, 3.
Taim Kingdom bilong God i bosim graun, graun bai kamap gutpela ples Paradais, wankain olsem Paradais bilong Iden em God i bin putim Adam tupela Iv long en. Long dispela taim bai ol samting i kamap olsem Baibel i tok long Sam 37:29: “Ol stretpela man bai i kisim graun God i givim ol, na bai ol i stap oltaim long en.”