Skul Yumi Kisim Long Jisas

Long i Stap Bilong Ol Man Long Bihain

Jisas i bin tok promis long ol man bai kisim laip long heven o nogat?

Yes, em i bin tok promis long dispela! Jisas i bin kirap bek na em i go antap long heven bilong i stap wantaim Papa bilong em. Tasol paslain long em i dai na kirap bek, em i bin tokim 11-pela aposel em ol i stap gut long em, olsem: “Long haus bilong Papa bilong mi i gat planti rum i stap, na mi go bilong redim ples bilong yupela.” (Jon 14:2) Tasol liklik lain tasol bai kisim laip long heven. Jisas i kamapim klia dispela samting taim em i tokim ol disaipel bilong em olsem: “Yupela liklik lain sipsip, yupela i no ken pret. Papa bilong yupela em i tok pinis long em bai i stap king bilong yupela na givim kingdom bilong en long yupela.”​​—Luk 12:32.

“Liklik lain sipsip” bai mekim wanem wok long heven?

Papa i laik bai dispela liklik lain i wok wantaim Jisas insait long wanpela gavman long heven. Olsem wanem yumi save long dispela? Bihain long Jisas i kirap bek pinis, em i tokim aposel Jon olsem sampela man husat i stap gut long em, “bai ol i stap king na bosim ol manmeri bilong graun.” (KTH 1:1; 5:​9, 10) Dispela em wanpela gutpela samting tru. Wanpela samting ol man i nidim tru em gutpela gavman. Dispela gavman em Jisas i stap king bilong en, em bai mekim wanem ol wok? Jisas i tok: “Long taim olgeta samting i kamap nupela, na Pikinini Bilong Man bai i gat biknem na i sindaun long sia king bilong en, long dispela taim yupela ol man i bin bihainim mi yupela tu bai i sindaun long 12-pela gutpela sia.” (Matyu 19:28) Wok bos bilong Jisas na ol disaipel bilong em bai mekim “olgeta samting i kamap nupela,” olsem gutpela sindaun tru em namba wan man na meri i bin amamas long en paslain long ol i mekim sin.

Jisas i promisim olgeta arapela man long bilip na wetim wanem samting?

God i wokim ol man bilong i stap long graun, tasol em i wokim Jisas bilong i stap long heven. (Song 115:16) Olsem na Jisas i tok: “Yupela ol lain bilong daunbilo. Tasol mi, mi bilong antap.” (Jon 8:​23) Jisas i tok bihain ol man bai kisim gutpela sindaun long graun. Em i bin tok: “Ol manmeri i save daunim nem bilong ol yet, em ol i ken amamas. Bai God i givim olgeta graun long ol.” (Matyu 5:5) Em i tingim hap bilong Buk Song we i tok: “Ol manmeri i daunim nem bilong ol yet, bai God i givim olgeta graun long ol. Bai ol i sindaun gutpela tumas na amamas i stap. Ol stretpela man bai i kisim graun God i givim ol, na bai ol i stap oltaim long en.”​​—Song 37:​11, 29.

Olsem na dispela “liklik lain sipsip” i go long heven, i no ol tasol bai kisim laip oltaim, nogat. Jisas i bin tok tu olsem planti milion manmeri long graun, ol inap bilip na wet long kisim gutpela samting bihain. Em i tok: “God i laikim tumas olgeta manmeri bilong graun, olsem na em i givim dispela wanpela Pikinini long ol. Em i mekim olsem bilong olgeta manmeri i bilip long em ol i no ken lus. Nogat. Bai ol i kisim laip i stap gut oltaim oltaim.”​​—Jon 3:​16.

God bai mekim wanem bilong tekewe pen na hevi bilong ol man?

Jisas i tok long ol man bai kamap fri long tupela samting we i save daunim ol, em i tok: “Nau bai God i skelim pasin bilong ol manmeri bilong dispela graun. Nau bai em i rausim dispela hetman i save bosim dispela graun.” (Jon 12:31) Namba wan samting: God bai skelim ol man nogut em ol i save givim pen na hevi long ol arapela, na em bai bagarapim ol. Na namba tu samting: God bai rausim Satan na em bai i no inap moa long giamanim ol manmeri.

Olsem wanem long ol lain man i stap bipo na ol i dai, tasol ol i no bin i gat rot long kisim save long God na Krais bambai ol i ken bilip long tupela? Jisas i tokim wanpela man nogut husat i hangamap klostu long em: “Mi tok tru long yu tude, Yu bai stap wantaim mi long Paradais.” (Luk 23:​43, NW) Dispela man, wantaim planti arapela milion manmeri, bai i gat rot long kisim save long God taim Jisas i kirapim bek em long Paradais long graun. Rot bai op long em i ken stap wanpela bilong ol manmeri husat i save mekim pasin daun na stretpela pasin em ol bai kisim laip oltaim long graun.​​—Aposel 24:15.

Bilong kisim sampela save moa, lukim sapta 3 na sapta 7 bilong buk Tru Tru Baibel i Tok Wanem? a

[Futnot]

[Piksa long pes 23]

“Ol stretpela man bai i kisim graun God i givim ol, na bai ol i stap oltaim long en.”​​—Song 37:29