“No Ken Les”

TAIM mama i karim Wilma Rudolf em i liklik tru na em i gat sik. Em i no kirap na wokabaut hariap. Taim em i gat 4-pela krismas em i kirap wokabaut. Bihain em i sik nogut tru. Em i kisim sik fiva na strongpela kus. Wilma i winim dispela sik, tasol wanpela lek bilong em i dai. Mama bilong Wilma i strong long pikinini bai wokabaut, olsem na em i wok long rapim rapim lek bilong Wilma, na em i lainim narapela 3-pela pikinini bilong em long mekim olsem. Olsem na i gat 4-pela, mama na 3-pela pikinini, i mekim wok olgeta de long rapim lek bilong Wilma.

Ol dokta i pasim hap ain long lek bilong Wilma na taim em i gat 8-pela krismas em inap wokabaut. Bihain liklik em inap ran na pilai wantaim ol narapela pikinini. Em i mekim ol eksasais, na dispela wantaim tok bilong mama, olsem: “No ken les” dispela i bin helpim Wilma long wokabaut.

Wilma i no les. Long 1960 long spot Olimpik long Rom, Itali, em i winim 3-pela medal gol.

Long taim bilong namba wan pait, Glen Kaningham i gat 7-pela krismas, na paia i bin kukim nogut tru tupela lek bilong em. Planti mun em i mas slip long bet na ol dokta i tok, ating em i no inap wokabaut gen. Long olgeta de mama bilong Glen i rapim ol masol bilong lek na em i wok long kirapim em long wokabaut na bihain long ran. Glen i no les. Em i kamap man bilong ran long resis na em i winim 21 bilong 31 resis em i bin insait long en. Long 1934 em i winim ol man bilong olgeta kantri taim em i ran long resis em inap 1,600 mita.

Sampela taim yumi olgeta i kisim kain kain hevi. Planti hevi, em sik bilong skin. Sapos olsem, no ken les, wok strong long winim dispela hevi! Aposel Pol i bin tok: “Mipela i no save slek,” long ol samting bilong spirit. “Tru, bodi bilong mipela i laik bagarap. Tasol bel bilong mipela i save kamap nupela gen long olgeta de.”​—2 Korin 4:16.

[Piksa Kredit Lain long pes 31]

UPI/Bettmann Newsphotos