De Valentain—Em i Kirap We?

LONG planti kantri ol i kolim Februeri 14 olsem De Valentain, na long dispela taim planti man i givim presen o kat (ol i kolim Valentain) long narapela. Tasol dispela pasin i kirap olsem wanem?

Wanpela buk (Brewer’s Dictionary of Phrase and Fable) i tok: ‘Wanpela pris bilong Rom, nem bilong em Santu Valentain, i bin kalabus, long wanem, em i bin helpim lain Kristen em ol man i mekim nogut long ol. Em i tanim bel na kamap wanpela Kristen na . . . ol man i kilim em i dai. Em de Februeri 14 . . .

‘Dispela pasin bilong bipo long salim presen o kat i no samting tru bilong dispela santuman, em pasin bilong ol Rom bipo . . . o em i kamap long pasin bilong ol pisin taim ol i laik kamapim pikinini. Bipo ol man i tingim dispela de na givim presen long ol narapela. Long nau ol man i baim kat na salim long narapela ol i laikim tumas. Ol dispela kat i gat piksa bilong pikinini [cupid] i holim banara o i gat piksa bilong klok bilong man long en, na ol i salim long narapela.’

Dispela pikinini (cupid) na De Valentain i wankain olsem wanem? Buk i tok moa: ‘Dispela tok Cupid i kamap long wanpela tok Rom, em cupido, olsem: givim bel long narapela. Wanpela god bilong ol Rom, em god bilong pasin bilong man i laikim meri, na ol i makim em olsem wanpela naispela manki, em i gat pul olsem pul bilong pisin, na em i karim banara wantaim ol spia.’

Narapela buk (The World Book Encyclopedia) i tok moa long as bilong ol samting bilong De Valentain. Buk i tok, ‘Wanpela stori i olsem: Bikman bilong Rom em Klaudias Namba 2, long yia 268 samting i bin tambuim ol yangpela man long marit. Dispela bikman i ting man singel i kamap gutpela soldia, winim man marit. Wanpela pris, nem bilong em Valentain, i no bihainim tok bilong king na long pasin hait em i stretim marit bilong ol yangpela i laik marit. . . . Planti stori i tok gavman i kilim i dai Valentain long Februeri 14 long yia 269 samting. Long yia 496 Santu Pop Gelasias Namba Wan i makim Februeri 14 olsem De bilong Santu Valentain.’

Maski wanem as tru bilong dispela de, yumi save as bilong en em ol bilip haiden bilong bipo. Na tu, em i stap long lista bilong “ol santu” bilong ol lotu ol i holim nating nem Kristen. Na, dispela de em rot bilong ol bisnis i ken pulim mani bilong ol man i no gat save long as tru bilong dispela de.​—2 Korin 6:​14-18.

Taim yu kaunim dispela nius, sapos yu gat sampela askim bilong Baibel, yu ken painim ol Witnes Bilong Jehova long Haus Kingdom bilong ol long hap bilong yu, o yu ken salim pas long lain i raitim dispela nius. (Lukim pes 5.)

[Piksa Kredit Lain long pes 32]

Dover Publications, Inc.