Diwai Kwiva i Kisim Dispela Nem Olsem Wanem?

OL MAN i raun long ples wesan long ol hap saut bilong Afrika i kirap nogut tru taim ol i lukim wanpela diwai kwiva. Wanpela man bilong raitim buk (Jon Manchip White) i bin stori long diwai kwiva olsem: ‘Skin bilong dispela diwai i waitpela liklik na i gat ol waitpela makmak long en . . . na em i sanap stret long ol kil bilong maunten. . . . Ol i sanap olsem soldia bilong wanpela ami, na ol i lain pinis long bikpela win, na san, na no gat wara, na long kol bilong nait.’​—Buk The Land God Made in Anger.

I gat 150 kain diwai aloe long ol hap saut bilong Afrika na diwai kwiva em wanpela. Lip bilong diwai kwiva i gat ol nil na wara, maski em i stap long ol hap i kisim liklik ren o hap i no gat ren. Dispela diwai i stap laip, long wanem, em i bungim wara long namel bilong en. Olsem na long mun Jun na Julai dispela diwai i putim yelopela plaua, na ol pisin na binen na wanpela kain monki (baboon) ol i amamas long kam na dring wara bilong dispela plaua.

Olsem wanem na ol i kolim dispela diwai, diwai kwiva? Long wanem, wanpela lain ol i kolim Busman, ol i save raun na painim abus long hap bilong saut bilong Afrika, ol i save kisim han bilong diwai kwiva na wokim paus bilong pulimapim ol spia bilong banara. Ol i kolim dispela paus olsem kwiva. Ol dispela Busman i save tekewe namel bilong han bilong diwai na larim skin bilong en i drai, olsem na em i kamap olsem mambu bilong pulimapim ol spia bilong banara long en.