“Buk i Helpim Mi Tru”

DISPELA em tok bilong wanpela yangpela long hap bilong Wes Indis taim em i bin kaunim buk Rot Bilong i Stap Amamas Taim Yu Yangpela Yet. Yangpela meri i tok: ‘Taim mi kaunim sapta 5, i olsem ol i bin raitim stori bilong mi yet. Dispela sapta i stori long pasin bilong pilai long skin na pasin bilong sodom.

‘Inap 3-pela yia pinis mi bin wok strong long daunim pasin bilong pilai long skin bilong mi yet. Mi ting mi wanpela tasol i gat dispela kain hevi. Mi amamas long yupela i bin wokim dispela gutpela buk, long wanem, em i givim gutpela tok long mi na nau mi wok long bihainim ol tok bilong daunim dispela pasin.

‘Narapela hevi bilong mi em boipren. Mi bin kisim planti bel hevi long dispela. Boipren bilong mi em i gat narapela gelpren na em i save laikim em moa yet, na mi nogat. Mi no save bai mi mekim wanem samting.

‘Tasol mi mas toksave olsem, taim ol pren, o boipren bilong mi i mekim na mi bel hevi, mi save kisim dispela liklik buk na kaunim. Buk ya i save helpim mi tru. Buk i givim ol gutpela tok long mi, em bipo mi no bin save long en. Mi kaunim pinis planti sapta na mi pilim tru ol dispela tok na mi laik krai. Taim mi kaunim sapta 8 na 23, dispela i mekim gut bel bilong mi.’

Long kamap bikpela long dispela taim nau em i hatwok tru. Planti kain kain nupela samting i save kamap long planti ol yangpela, olsem na ol i mas skelim gut tingting bilong ol long ol samting. Olsem: I gutpela sapos mi smok o kisim ol drak? Wanem pasin i stret taim yangpela man na meri i wokabaut wantaim? Sapos yu laik kisim sampela save moa, o yu laik bai wanpela man i lainim yu long tok bilong Baibel long haus bilong yu yet, no gat pe, salim pas na toksave long I.B.S.A., Box 636, Boroko, N.C.D., o lukim atres i stret long yu long pes 5.