Ol i Painim Pinis Bikpaia o Nogat?
LONG nau planti man i lusim dispela bilip long bikpaia? Ating dispela bilip i no inap winim dispela taim bilong yumi long skelim gut ol samting. O ating planti man i pilim olsem, dispela bilip long givim pen oltaim oltaim long man long ples paia i no stret long wanpela God bilong pasin sori na stretpela pasin olsem Baibel i toktok long en. Sampela pris pasto i lukim dispela na ol i mekim samting i narapela kain tru. Harim dispela stori:
Long Amerika wanpela televisen kampani na wanpela nius bilong ol evanjelis i tokaut, sampela saintis i painim pinis bikpaia taim ol i wokim wanpela hul long Saibiria! Wanpela nius (Biblical Archaeology Review) i bin kamapim wanpela stori bilong dispela samting.
Ol man i bin tok, wanpela lain saintis bilong Finlan na Nowe i boaim hul i go daun tru insait long graun bilong traim sampela wok bilong ol. Taim ol i boaim hul inap sampela kilomita, ol i kirap nogut, boa bilong ol i raun nating tasol! Taim ol i skelim hat bilong dispela ples daun ol i kirap nogut moa yet—em i winim 1000 digri Selsias! Na ol i kirap nogut gen taim ol i putim wanpela maikrofon i go daun na ol i harim planti tausen—o ating sampela milion manmeri i singaut na krai long bikpela pen! Stori i tok, ol saintis hia i bin longlong nabaut na sampela bilong ol i bin ranawe long wok. Sampela i laik haitim dispela samting na sampela narapela ol i kamap “Kristen,” long wanem ol i ting bikpaia i stap tru.
Ol man i raitim dispela stori long nius samting i tok dispela stori i gat as tru. Rik Bula, em i man bilong lukautim wanpela program long redio i tok long nius Christianity Today, em wantaim ol wanwok bilong em i wok long painim as bilong dispela stori. Ol i kisim save olsem, ol man i kisim dispela stori long sampela niuspepa na niuspepa i kisim long sampela pas, na ol man i raitim dispela pas i bin kisim gen long wanpela niuspepa i no save gut long as bilong dispela stori.
Narapela as bilong dispela stori i kam long pas bilong wanpela man Nowe. Taim ol i askim em long dispela samting, em i tokaut stret olsem, pas bilong em i stori giaman tasol. Em i raitim, long wanem em i ting ol man bai bilipim na raitim long nius samting. Ating em i save pinis olsem planti misin ol i bilip nating long samting ol i laik bilip long en.
Long Olpela Testamen bilong Baibel Hibru wanpela tok Hibru, em sheol i stap 65 taim na ol i tanim dispela tok olsem “hel o bikpaia.” Long Baibel King James ol i tanim dispela tok sheol 31 taim olsem “hel” na inap 31 taim olsem “matmat” na 3-pela taim olsem “hul.” Long Nupela Testamen bilong dispela Baibel ol i tanim tok Grik Hades olgeta taim olsem “hel.” Insait bilong dispela tupela tok sheol na hades em matmat tasol na i no makim wanpela ples bilong kukim ol man long paia o givim pen long ol insait long wanpela hul i stap long hap bilong Saibiria.
[Piksa Kredit Lain long pes 31]
Picture Book of Devils, Demons and Witchcraft/Ernst and Johanna Lehner/Dover