Hel i Makim Wanem Samting Tru Tru?

MASKI yu tingim wanem samting taim yu harim dispela tok “hel,” bikpela lain manmeri i save ting hel em i ples we man bai kisim strafe long ol sin bilong em. Baibel i stori long sin na samting sin i kamapim olsem: “Yumi save, wanpela man i bin mekim sin, na long dispela pasin sin i kamap long graun. Na sin i bringim dai i kam. Na dai i kisim olgeta man, long wanem, olgeta man i bin mekim sin.” (Rom 5:12) Na tu, Baibel i tok: “Sin i save givim pe long ol wokboi bilong en. Dispela pe em dai tasol.” (Rom 6:23) Pe bilong sin em dai, olsem na bilong painimaut mining tru bilong dispela tok hel, yumi mas save long bekim bilong dispela bikpela askim: Wanem samting i painim yumi taim yumi dai?

Olsem wanem? I gat sampela samting bilong man i stap laip yet bihain long em i dai? Hel em i wanem samting, na wanem kain pipel i save go long en? Gutpela samting inap painim ol man i stap long hel? Baibel i kamapim ol tok tru i bekim gut ol dispela askim.

I Gat Laip Bihain Long i Dai?

Yu ting i gat samting i stap insait long yumi, olsem wanpela soul o wanpela spirit, na maski bodi i dai pinis dispela samting i stap laip yet? Tingim olsem wanem namba wan man Adam i bin kisim laip. Baibel i tok: “Bihain God, Bikpela i kisim graun na em i wokim man long en. Na em i winim win bilong laip i go insait long nus bilong man, na man i kisim laip.” (Stat 2:⁠7) Pasin bilong pulim win i mekim na man i stap laip, tasol taim God i winim “win bilong laip” i go insait long nus bilong Adam, dispela i no makim tasol pasin bilong winim win nating i go insait long waitlewa bilong em. Nogat. Em i makim olsem God i putim strong bilong laip i go insait long bodi bilong Adam, na dispela strong bilong laip i wok i stap insait long olgeta man na animal samting long graun. (Stat 6:17; 7:22) Baibel i tok dispela strong i mekim ol samting i stap laip em i “spirit.” (Jems 2:26) Dispela spirit i kain olsem pawa i save ran i go long wanpela masin o TV samting na inapim ol long mekim wok. Pawa yet i no kisim pasin bilong dispela masin, olsem tasol dispela strong i save mekim man na animal i stap laip, em i no save kisim pasin bilong dispela man o animal. Dispela strong i no gat sampela pasin o tingting.

Wanem samting i kamap long dispela spirit taim man i dai? Saveman 8:8 i tok: “Long taim bilong dai, spirit bilong yumi i laik lusim bodi bilong yumi, na yumi no inap pasim.” Taim wanpela i dai, spirit bilong em i no save stap olsem wanpela ensel samting long wanpela ples bilong ol spirit, nogat. “Spirit God i bin givim yupela bai i go bek long God.” (Saveman 12:⁠7) Dispela i makim olsem God tasol inap givim laip gen long dispela man long bihain.

Sokratis na Pleto tupela saveman bilong Grik bilong bipo, ol i bilip olsem man i gat wanpela soul i stap insait long bodi bilong em, na taim bodi i dai dispela soul i stap yet, em i no save dai. Baibel i tok wanem long soul? Stat 2:7 i tok Adam i kamap wanpela soul i gat laip. Em i no bin kisim wanpela soul, nogat, em yet i wanpela soul. Baibel i stori olsem wanpela soul i mekim sampela wok, hangre long kaikai, krai i stap, i kisim bagarap olsem wanpela laion i bruk brukim, na kain samting olsem. (Wok Pris 23:​30, King James Version; Lo 12:​20, KJ; Jeremaia 13:​17, KJ; Song 7:​2, KJ) Yes, man yet em i wanpela soul. Taim wanpela man i dai, em wanpela soul i dai.​—⁠Esekiel 18:​4, KJ.

Orait, ol man i dai pinis ol i stap olsem wanem? Taim Jehova i kotim Adam, em i tok: “Mi bin wokim yu long graun, na bai yu go bek gen long graun.” (Stat 3:19) Taim God i no wokim yet Adam long graun na givim laip long em, Adam i stap we? Em i no stap. Olsem tasol taim Adam i dai, em i no stap. Saveman 9:​5, 10 i kamapim klia man i dai i stap olsem wanem, em i tok: “Sapos yu mekim wanpela wok, orait taitim bun na mekim save tru. Long wanem, bai yu no inap mekim wok o tingting o kisim gutpela tingting na save long ples bilong ol man i dai pinis, dispela ples bai yu go long en.” Olsem Baibel i kamapim, i dai i makim olsem man i no stap. Ol man i dai ol i no save long wanpela samting, o pilim ol samting long bel, o wokim tingting.

Karim Pen Oltaim o Matmat Tasol?

Ol man i dai ol i no save long wanpela samting, olsem na hel i no ken makim wanpela ples paia we ol man nogut i karim pen bihain long ol i dai. Orait, hel em i makim wanem samting? Wok bilong skelim samting i bin painim Jisas bihain long em i dai i helpim yumi long bekim dispela askim. Luk, em wanpela man bilong raitim Baibel, em i tok: “God bai i no larim [Jisas] i stap long ples bilong ol man i dai pinis [“hel,” King James Version], na God bai i no larim em i sting long matmat.”a (Aposel 2:31) Dispela hel em Jisas i bin go long en i stap long wanem hap? Aposel Pol i tok: “Krais i bin i dai bilong rausim olgeta sin bilong yumi, olsem tok i stap long buk bilong God. Na ol i putim em long matmat, na long de namba 3 em i kirap bek, olsem tok i stap long buk bilong God.” (1 Korin 15:​3, 4) Olsem na Jisas i bin stap long hel, em matmat, tasol God i no lusim em olgeta long dispela hap, long wanem, God i bin kirapim em bek.

Tingim tu stretpela man Jop, em i bin karim planti hevi. Jop i laik ranawe long ol hevi bilong em, na em i kamapim dispela askim: “Plis, haitim mi long hel [Sheol] inap long taim kros bilong yu i pinis; na yu ken makim wanpela taim na bai yu tingim mi.”b (Jop 14:​13, Douay Version) I no stret long ting Jop i laik go long wanpela ples paia bilong abrusim ol hevi! Long tingting bilong Jop, “hel” i makim matmat tasol, em ples we ol pen na hevi bilong em bai pinis. Olsem na hel olsem Baibel i kamapim i makim matmat tasol, em hap we ol gutpela man na ol man nogut wantaim i save go long en.

Helpaia​—⁠Bagarapim Olgeta?

Yu ting paia bilong hel em i tok piksa i makim samting i pinis o bagarap olgeta? Bilong soim olsem Hades, o hel, i no ples paia, Baibel i tok: “Em i tromoi Dai wantaim Hel i go daun long dispela bikpela hul i gat paia.” Dispela “bikpela hul i gat paia” em i wanpela tok piksa, long wanem, dai na hel (Hades) ol i tromoi i go long en em ol samting yu no inap kukim long paia. “Dispela bikpela hul i gat paia em i namba 2 dai”​—⁠dai we i no gat rot long kisim laip gen.​—⁠KTH 20:​14, Nupela Testamen na Ol Sam.

Mining bilong dispela bikpela hul i gat paia i klostu wankain olsem tok Jisas i kamapim taim em i stori long “paia bilong Gehena [hel, Buk Baibel].” (Matyu 5:​22, NW; Mak 9:​47, 48, NW ) Dispela tok Gehena i kamap 12-pela taim long Ol Skripsa Grik, na em i makim ples daun bilong Hinom, ausait long banis bilong taun Jerusalem. Taim Jisas i stap long graun, dispela ples daun em i wanpela ples bilong tromoi pipia, “ol i tromoi bodi bilong man nogut i dai pinis na ol animal i dai pinis na ol narapela kain pipia i go daun long en.” (Smith’s Dictionary of the Bible) Paia i no save dai, long wanem, ol i save tromoi marasin salfa long en bilong kukim ol pipia. Jisas i mekim wok long dispela ples daun bilong makim stret samting i bagarap olgeta.

Gehena i makim samting i bagarap olgeta na i wankain olsem dispela hul i gat paia. Ol “i tromoi” Dai na Hades long dispela hul i gat paia, dispela i makim olsem ol bai pinis olgeta taim ol man i no kalabus moa long sin na hevi bilong i dai. Ol man i strong long mekim rong na ol i no laik tanim bel, ol tu bai go long dispela hul. (KTH 21:⁠8) Ol tu bai pinis olgeta. Tasol ol man husat i stap long tingting bilong God na ol i stap long hel​—⁠matmat​—⁠i gat gutpela samting tru bai painim ol long bihain.

Olgeta Man i Lusim Hel!

Kamapim Tok Hait 20:13 (Nupela Testamen na Ol Sam) i tok: “Solwara i givim bek olgeta daiman i stap long en, na Dai wantaim Hel i givim bek olgeta daiman i stap long dispela.” Yes olgeta man bai lusim dispela hel Baibel i stori long en. Olsem Jisas i tok promis: “Yupela i no ken tingting planti long dispela tok bilong mi. Taim i laik kamap na olgeta manmeri i stap long matmat ol bai i harim maus bilong Pikinini, na ol bai i lusim matmat na i kam ausait.” (Jon 5:​28, 29) Long nau stret ol i no stap laip long wanpela hap, tasol ol milion milion man i dai pinis husat i stap long tingting bilong God Jehova, ol bai kirap bek, o kisim laip gen long graun i kamap wanpela ples paradais.​—⁠Luk 23:43; Aposel 24:⁠15.

Long nupela taim God bai kamapim, ol manmeri i kirap bek na bihainim ol stretpela lo bilong em, dai i no ken painim ol gen. (Aisaia 25:⁠8) Jehova bai “mekim drai wara i stap long ai bilong olgeta bilong ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen.” Tru tumas, “ol dispela samting bilong bipo [bai] ol i pinis olgeta.” (KTH 21:⁠4) Gutpela samting tru bai painim ol man i stap long hel​—⁠“matmat”! Dispela gutpela samting inap tru long kirapim yumi long kisim moa save long God Jehova na pikinini bilong em, Jisas Krais.​—⁠Jon 17:⁠3.

[Ol Futnot]

[Piksa long pes 5]

Jop i beten long em i ken go long hel na bai ol hevi i no inap daunim em moa

[Piksa long pes 6]

Paia bilong Gehena—⁠piksa i makim pasin bilong pinis olgeta

[Piksa long pes 7]

‘Olgeta manmeri i stap long matmat ol bai kam ausait’