Hel Em Wanpela Ples i Stap Tru? Baibel i Tok Hel Em Wanem Samting?
Bekim Bilong Baibel
Planti olpela trenslesen bilong Inglis Baibel, olsem King James Version, i yusim tok ‘hel’ long sampela ves. (Buk Song 16:10; Aposel 2:27a) Olsem piksa bilong ol lotu i stap long dispela atikol i soim, planti manmeri i bilip olsem hel em wanpela ples we paia i lait oltaim long en na ol man nogut i save go long dispela hap bilong kisim panismen. Tasol Baibel i tok wanem?
Long dispela atikol
Yu ting hel em ples bilong kisim pen inap oltaim oltaim?
Nogat. Namba wan taim ol i raitim tok bilong Baibel long tokples Hibru na tokples Grik, ol i yusim dispela tok Hibru “Sheol” na tok Grik “Hades,” na mining bilong dispela tupela tok em “Matmat, em makim matmat we olgeta man bai go long en, na i no matmat bilong wan wan man. Sampela olpela trenslesen bilong Baibel i tanim dispela tok Hibru na Grik olsem “hel.” Baibel i tok olsem olgeta manmeri long “Matmat” i no stap laip moa.
Ol man i dai pinis i no gat tingting na save na ol i no inap pilim pen. “I no gat wok, o tingting, o gutpela tingting, o save, long hel.” (Eklisiastis 9:10, Douay-Rheims Version) Hel i no wanpela ples we i pulap wantaim ol man i pilim pen na krai, nogat. Baibel i tok: “Yu mas larim ol man nogut tru i sem, na larim ol i pasim maus long matmat [hel, Douay-Rheims].”—Sam 31:17; King Jems Pisin Baibel; Buk Song 115:17.
God i tok pe bilong sin em dai, na i no helpaia. God i tokim fes man, Adam, olsem pe bilong man i brukim ol lo bilong God em dai. (Stat 2:17) Em i no mekim wanpela tok olsem man bai kisim pen inap oltaim long hel. Bihain long Adam i mekim sin, God i tokim em long panismen bilong em olsem: “Yu kamap long graun na bai yu go bek gen long graun.” (Stat 3:19) Em bai i no inap stap moa. Sapos God i bin salim Adam i go long helpaia, Em bai stori long dispela samting. God i no bin senisim strafe em i makim long ol man i brukim lo bilong em. Planti yia bihain long Adam i mekim sin, God i kirapim wanpela man bilong raitim buk bilong Baibel long tok: “Pe bilong sin em dai.” (Rom 6:23) I no gat wok long givim narapela strafe gen, bikos “man i dai pinis, em i bekim pinis pe bilong ol sin bilong em.”—Rom 6:7.
God i heitim pasin bilong kukim man long paia inap oltaim. (Jeremaia 32:35) Dispela kain tok i no stret wantaim tok Baibel i kamapim olsem “God em i pasin laikim.” (1 Jon 4:8) God i laik bai pasin bilong yumi long laikim em i kirapim yumi long lotuim em, na i no pasin bilong pret long kisim pen inap oltaim oltaim.—Matyu 22:36-38.
Ol gutpela manmeri i go long hel. Ol Baibel we i yusim dispela tok “hel” i kamapim tu olsem ol gutpela man, olsem Jekop na Jop i go long hel. (Stat 37:35; Jop 14:13) Na tu, Baibel i tok Jisas Krais i bin stap long hel insait long dispela hap taim em i dai na kirap bek. (Aposel 2:31, 32) Olsem na i klia tru, taim Baibel i yusim dispela tok “hel,” em i makim tasol Matmat.b
Wanem mining bilong tok piksa bilong Jisas long maniman na Lasarus?
Jisas i mekim dispela tok piksa olsem i stap long Luk 16:19-31. Ol tok piksa i bilong helpim yumi long kisim skul long stretpela pasin o tingting bilong God long ol samting. Dispela tok piksa bilong maniman na Lasarus em i no wanpela samting we i bin kamap tru. (Matyu 13:34) Sapos yu laik kisim sampela save moa long dispela tok piksa, lukim atikol “Who Were the Rich Man and Lazarus?”
Yu ting hel i makim olsem ol man i no stap pren bilong God?
Nogat. Dispela tok olsem ol man i dai pinis inap save olsem ol i no stap pren bilong God, i pait wantaim tok bilong Baibel, we i tokaut klia olsem ol man i dai pinis i no save long wanpela samting.—Buk Song 146:3, 4; Eklisiastis 9:5.
Yu ting i gat wanpela i bin lusim hel na i kamaut?
Yes. Baibel i stori gut long 9-pela lain i stap long Matmat (sampela Baibel i trensletim olsem “hel”) na ol i kirap bek na stap laip.c Sapos ol i bin go long hel, ol inap long stori long ol samting i bin painim ol. Tasol i no gat wanpela bilong ol i kisim pen long dispela hap o stori long ol samting i bin painim ol. Bilong wanem? Olsem tok Baibel i mekim, ol i no inap wokim tingting o kisim save, i olsem ol “slip” indai.—Jon 11:11-14; 1 Korin 15:3-6.
a Planti Inglis Baibel bilong nau i no yusim dispela tok “hel” long Aposel 2:27. Tasol sampela i yusim ol tok olsem “matmat,” (New Century Version); “ples bilong man i dai pinis,” (New International Version); “man i dai” (The Passion Translation). Ol narapela Baibel i trensletim tasol tok Grik olsem “Hades.”—Holman Christian Standard Bible, NET Bible, New American Standard Bible, English Standard Version.
b Lukim blok “Original-Language Bible Words.”