Stori Nating 2: Ol Man Nogut i Kisim Pen Long Hel
Wanem as bilong dispela stori nating? “Namel long ol saveman Grik, man i bin kamapim strong tru tingting bilong ol tumbuna long Hel, em Pleto.”—Histoire des enfers (Stori Bilong Hel), bilong Georges Minois, pes 50.
“Kirap long yia 150 C.E., samting, ol Kristen husat i bin skul long tok bilong ol saveman Grik, ol i kirap pilim olsem bilong kamapim bilip bilong ol, ol i mas mekim long tok i stret wantaim tok bilong ol dispela saveman . . . Tok i stret long ol em tok bilong Pleto.”—The New Encyclopædia Britannica (1988), Volium 25, pes 890.
“Tok bilong Misin i strongim bilip olsem hel i stap tru na em i save stap inap oltaim oltaim. Taim ol man i gat sin ol i dai, wantu tasol spirit bilong ol i save go daun long hel, na ol bai kisim strafe bilong hel, olsem ‘paia bilong i stap oltaim oltaim.’ Nambawan bikpela strafe bilong hel em man bai stap longwe long God inap oltaim oltaim.”—Catechism of the Catholic Church, bilong 1994, pes 270.
Baibel i tok wanem? “Ol man i gat laip . . . ol i save bai ol i dai. Tasol ol man i dai pinis, ol i no inap save long wanpela samting. . . . Long wanem, bai yu no inap mekim wok o tingting o kisim gutpela tingting na save long ples bilong ol man i dai pinis [“Sheol,” NW], dispela ples bai yu go long en.”—Saveman 9:4, 5, 10.
Dispela tok Hibru, Sheol, i makim “ples bilong ol man i dai pinis,” na long sampela Baibel ol i tanim olsem “hel.” Dispela skripsa i soim olsem ol man i dai pinis ol i stap olsem wanem? Yu ting ol i save kisim pen long Sheol olsem pe bilong baim ol rong bilong ol? Nogat, long wanem, “ol i no inap save long wanpela samting.” Olsem na taim Jop i kisim bikpela pen tru long wanpela sik nogut, em i krai long God olsem: “Lukautim mi long hel [tok Hibru, Sheol].” (Jop 14:13; Douay-Rheims Version) Bilong wanem Jop bai askim God long mekim olsem sapos Sheol em i ples bilong kisim bikpela pen inap oltaim oltaim? Long Baibel, hel em i matmat bilong ol man na ples we ol i no inap long mekim wanpela samting.
Dispela mining bilong hel i klia na i stret wantaim ol tok bilong Baibel, a? Yu ting wanem kain rong—maski em i bikpela rong tru—em inap mekim na God bilong pasin laikim bai givim pen long man i go inap oltaim oltaim? (1 Jon 4:8) Tasol sapos helpaia em i wanpela stori nating, orait olsem wanem long laip long heven?
Skelim ol dispela ves bilong Baibel: Song 146:3, 4; Aposel 2:25-27; Rom 6:7, 23.
TOK TRU:
God i no save givim strafe long ol man long hel
[Piksa Kredit Lain long pes 5]
Barrators—Giampolo/The Doré Illustrations For Dante’s Divine Comedy/Dover Publications Inc.